သတအ်ဟုမ် – ဂျောန်(၃၀)
အခိၚ်ကၟိန်ဍုၚ်သွဳဒေန်ပ္တိတ်ဒၟံၚ်ဇြဟတ် သွက်ဂွံလုပ်ဂကောံနေတိုဝ်ဂှ် ကမၠောန်တူရကဳဒေါသဒးတိတ် မၞိဟ်တြုံမွဲတၠ ဗစာ်ပြကိုဟ်ကိုဝ်ရာမ်မွဲစံၚ် ပ္ဍဲမ္ၚးဗလဳစတအ်ဟုမ်ဗဟဵုတုဲ စံၚ်ပလီုပလာ်လဝ်ရ။
ညးတြုံကၠောန်သ္ပလဝ်ပွဏံဂှ် ဗၠာဲသၟိၚ်တအ် စောဲလဝ်ဂဗုတ် နကဵုပွကဆော်က္တဵုဆီ ညံၚ်ဂွံဒှ်ပရေၚ်ကလိုက်ကၟဵု ပ္ဍဲကောန်ဂကူမွဲ ဟွံသေၚ်မ္ဂး ပ္ဍဲလတူဂကူမွဲဂကောံရဂှ် ဂွံတီကေတ်ရ။
ပ္ဍဲသွဳဒေန်ဂှ် ပရေၚ်ထ္ၜးဆန္ဒ သွက်ဂွံဒစဵုဒစးအေဿလာန် ကေုာံ သွက်အခေါၚ်အရာကာဒ် အဆက်က်တအ်ဂှ် ညံၚ်သွဳဒေန်ဂွံလုပ်ဂကောံနေတိုဝ် သ္ပကဵုဆုတ်ကလေၚ်ဒၟံၚ်တုဲ ကၠောန်သ္ပလဝ်ပရေၚ်ဗတိုက်ပြိုက် ဍုၚ်ဇၞော်အာန်ကာရာရ။
ကြဴနူရုယှာ ဝေၚ်ပၞာန်လောန်ၜက် လ္တူယူကရုၚ် ပ္ဍဲသၞာံတုဲကၠုၚ်တေံတုဲဂှ် ၜိုန်ရသွဳဒေန်အာတ်မိက်လဝ် သွက်ဂွံလုပ်ဂကောံနေတိုဝ်ကီုလေဝ် ညးလုပ်ဂကောံမဟာမိတ် တူရကဳဂှ်မ္ဂး သွဳဒေန်ဂှ် ကဵုလဝ်အခေါၚ် ကုညးဒးဒုၚ်ပတှ်ေကေတ်လဝ် မၞိဟ်ပ္ကီုပရာပ်ဇူဗဒီုရဂှ် စောတ်စောဲလဝ်တုဲ အာတ်မိက်လဝ် လၟေၚ်ကမၠောန် သွက်ဂွံပြံၚ်စၠောံကဵု ညးတၠဒုဟ်ဒဏ်ရဂှ် ဂွံတီကေတ်ရ။
ဝန်ဇၞော်ပရေၚ်ဍုၚ်သ္အာၚ်တူရကဳဂှ်မ္ဂး ဟီုပျုတ်ဗ္ဒေက်လဝ် ကမၠောန်ပြဝဏံတုဲ ပွမသၠးကဵုလဝ်အခေါၚ် ပေါဲထ္ၜးဆန္ဒပရေၚ်ဒစဵုဒစး ကုအေဿလာမ် ပ္ဍဲအခေါၚ်ဟီုဂးဓမံက်ထ္ၜး ဗၠးဗၠးၜးၜးဂှ် ဒုၚ်တဲဟွံမာန်ရဂှ် ချူပ္တိုန်လဝ် ပ္ဍဲတွောတ်တာရ။
ပ္ဍဲပေါဲထ္ၜးဆန္ဒဂှ် ပၞောန်ညးစဳဇန်လဝ်ၜါတၠ မွဲတၠဂှ် သာ်ဗစာ်လဝ် မုက်လိက်ပြကိုဟ်ကိုဝ်ရာမ်တုဲ ကၠာနူဟွံဂွံစုတ်ဂတှ်ေဖျုန်သကှ်ဏီဂှ် လိုန်ဆိုန်ကဵုဒၞပ်တုဲ အခိၚ်ဟီုဒၟံၚ်ဂလာန် ကုညးထ္ၜးဆန္ဒမွဲတၠ နကဵုစက်သၠဲရမျှာၚ် စံၚ်ပလီုလဝ်ရဂှ် ညးဂဗဆဵုနမတ်တအ် ဟီုသ္ဂးလဝ်ရ။
နဒဒှ်ဒစဵုဒစး ကုပရေၚ်ထ္ၜးဆန္ဒစံၚ်ပလီုဂှ် ကျာ်နာဲညး ဇၞော်ပြဲတဴရဂှ် ဟီုကညာၚ်ကရေဲလဝ် နဘာအာရာပ်တုဲ ညးတြုံပ္တိတ်လဝ်ဇြဟတ် သွက်ဂွံကၠဟ်ကဵုမတၟံမွဲတၠဂှ်လေဝ် ဒပ်ဗၠာဲသၟိၚ်ရပ်လဝ်တုဲ ညးထံက်ဂလာန်ကဵု ပေါဲထ္ၜးဆန္ဒမွဲတၠဂှ်မ္ဂး စံၚ်ထောံညိ ကညာၚ်ကရေဲတုဲ ကဵုလဝ်ဇြဟတ်ရဂှ် ဂွံတီကေတ်ရ။
ဒပ်ဗၠာဲသၟိၚ်သွဳဒေန်ဂှ် ဟိုတ်နူပေါဲထ္ၜးဆန္ဒပရေၚ်ဒစဵုဒစးကိုဝ်ရာမ်ဂှ် ပ္ဍဲအခိၚ်တုဲကၠုၚ်ခြာဟွံလအ်ဏံ ဟီုတးပါဲလဝ် ပရေၚ်ပ္တိုန်ထ္ၜးဗွဲမဂၠိုၚ်ကီုလေဝ် ရုၚ်သၞောဝ်ဓဝ်ဂှ်မ္ဂး ဖံက်ပ္ကဝ်လဝ် ပရေၚ်ဟီုဂးဗၠးၜးရဂးတုဲ ကလိလောန်တၚ်သ္ဂုတ်သွာတ်တအ်ဂှ်တုဲ တးပါဲလဝ်ရ။
ပရေၚ်ထ္ၜးဆန္ဒဂှ် ဇီုကပိုက်ဒး လ္တူပရေၚ်လၟေၚ်ကမၠောန်သွဳဒေန် နေတိုဝ်ဗီုလဵုရောဂှ် ချိၚ်ခယျဟွံမာန်ရဂှ် သ္ကိုပ်ဝန်ဇၞော် ဟီုသ္ဂးလဝ် ပ္ဍဲပေါဲသောၚ်ကလးပရိုၚ်ရ။
“အရာဏံ ၜိုန်ရကၠောန်လဝ် အတိုၚ်သၞောဝ်ကီုလေဝ် ဟွံထေက်ကဵုဒှ်ပုဟ်” ဂှ်ဟီုလဝ်တုဲ သွက်ဂွံဖျေံသ္ဂုတ်သွာတ် စပ်ကဵုပရေၚ်စံၚ်ပလီုလဝ် ပြကိုဟ်ကိုဝ်ရာမ်ဂှ် တုဲတဴဒၟံၚ်ကဵု ဒပ်ဗၠာဲသၟိၚ်တအ်ရဂှ် ညးဟီုသ္ဂးလဝ်ဏီရ။
ပၞောဝ်ညးပါလုပ်ၜါတၠ ညးမွဲတၠဂှ် ညးတေံ ဒှ်သၟာဒဒိုက်အဳရာတ် ပ္တိတ်ဒၟံၚ်ဇြဟတ် သွက်ဂွံတာဒၞာပြကိုဟ်ကိုဝ်ရာမ်မွဲတၠရဂှ် ဟီုလဝ် ပ္ဍဲပေါဲသောၚ်ကလးပရိုၚ် တုဲကၠုၚ် ခြာဟွံလအ်ဏီတေံရ။
ဟိုတ်နူတၚ်သ္ဂုတ်သွာတ်ဒပ်ဗၠာဲသၟိၚ် ကဵုလဝ်အခေါၚ် သွက်ဂွံထ္ၜးဆန္ဒ ပ္ဍဲတ္ၚဲသၠးပွးမောဿလေန်တအ်တုဲ ညးစၞးဗလဳတအ် စိုတ်ဒးလီုလဝ်ရဂှ် ဒါရိုက်တာဗလဳဂှ် ဟီုသ္ဂးလဝ်ဏီရ။
အတိုၚ်ဒါရိုက်တာခါလ်ဖဳ ဟီုသ္ဂးလဝ်မ္ဂး သွက်အခန်ကၞာအဳဒ်ဂှ် ကၟဳၜိုတ်မွဲဠက် တိုန်စိုပ်ဒၟံၚ် ဘာတိုန်ဝတ်ဗလဳသတအ်ဟုမ် ဇၟာပ်ပ်သၞာံရဂှ် ဂွံတီကေတ်ရ။
ကြဴနူသၟာပရေၚ်ဍုၚ်ကွာန်တၞုၚ်တဲပုၚ် ဒိၚ်မက်မွဲတၠ စံၚ်ပလီုပြကိုဟ်ကိုဝ်ရာမ် ဗ္ဒာဲရုၚ်ကလုတ်တူရကဳ ပ္ဍဲဍုၚ်သတအ်ဟုမ်တုဲဂှ် ပရေၚ်သဳကၠဳ တူရကဳကဵု သွဳဒေန် ပ္ဍဲလကြဴနူ ဂိတုဂျာန္နဝါရဳသ္ကုတ်လကြဴဏံ ဒးဒေါံဒီုလဝ်ရဂှ် ဂွံတီကေတ်ရ။
Ref : Reuters
sanlontai