သွက်ဂွံဖအောန်ဖျေံကဵု အခိၚ်ကာလယိုက်ဂၠေၚ်တာလျိုၚ်ပၞာန်ဂှ် အလံၚ်သမ္မတ ဗော်ဒစဵုဒစးထိုၚ်ဝါန် ကဵုကတိ

တိုၚ်ပေ၊ ဂျူလာၚ် (၅)

ပရေၚ်ဒးယိုက်ဂၠေၚ်တာလျိုၚ်ပၞာန် ဟွံဒေါအ်ဟွံဂွံ ပ္ဍဲထိုၚ်ဝါန် လမျီုစလုပ်အာ ပ္ဍဲဂိတုဂျာန္နဝါရဳ ကၠုၚ်စိုပ်ဏံဂှ် ဗတးထောံလက်ဗၠိုက်ဏောၚ်ဂှ် အလံၚ်ညးစၞးသမ္မတ လ္ပာ်ဒစဵုဒစး ဟီုဂးလဝ်ရ။

ပရေၚ်မ္ဒးယိုက်ဂၠေၚ်တာလျိုၚ်ပၞာန် ပၟိက်ဇၞော်ကွေံကွေံဟွံသေၚ်ဂှ် ယဝ်ရပြေပြံၚ်အာကဵု အလဵုအသဳကြုက်မ္ဂး ဖအောန်ဖျေံမာန်ရောၚ်ဂှ်လေဝ် ညးဆက်ဟီုဂးလဝ်ရ။

ပရေၚ်ဆက်ဆောံ ဗေကျေန် ကေုာံ ထိုၚ်ဝါန် မဒုၚ်ရုဲစှ်လဝ် နကဵုသၞောတ်ဒဳမဝ်ကရေဇြဳဂှ်ဝွံ ပေါဲရုဲမာဲမကၠောန်ဗဒှ်အာ ယးသၞာံဂတး ပ္ဍဲဂိတုဂျာန္နဝါရဳ ၁၃ တေံဂှ် ဒှ်မံၚ်ပြသၞာအဓိကမွဲတုဲ အခိၚ်ပြဟ်ဟ်ဏံဂှ် ကြုက်ဝွံ ဟီုဒၟံၚ် တ္ကအ်ဂှ် နဒဒှ်အပိုၚ်ဍေံတံတုဲ လုပ်စိုပ်သီဏာဂှ်လေဝ် ဒးဂွိၚ်ဒၟံၚ်ကီုရ။

ပရေၚ်ဂွိၚ်ဂွါဲ ကုပရေၚ်ဂီုကၠီုတံ ဇၞော်ပၟဝ်ကၠုၚ်ဗက် သမ္မတထိုၚ်ဝါန်ဂှ်လေဝ် အမိၚ် မၞိဟ်တြုံသီုဖအိုတ် ဟွံဒေါအ်ဟွံဂွံ သွက်ဂွံလုပ်ပၞာန် နူပန်ဂိတုဂှ် ဂလိၚ်ပ္တိုန်ထောံအာယုက် စဵုကဵုမွဲသၞာံရ။

အလံၚ်ညးစၞး ဗော်ကူမေန်တာန် မဒှ်က္ဍိုပ်သ္ကိုပ်ဒစဵုဒစးဂှ် ဗော်ဂွံအဝဵုလၟုဟ်ဂှ်ဝွံ ထ္မံက်ဒၟံၚ်ရုပ်ရဴ အန္တရာယ်ပေါဲပၞာန်တံဂှ်တုဲ ညးဂှ်တှ်ေ ညံၚ်ပရေၚ်ၜိုဟ်လလမ် ဂွံချိုတ်ပၠိုတ်ဂှ် ကၠောန်အာကမၠောန်ရောၚ် ရဴဝွံ ကညာၚ်ကမြဴလဝ်ရ။

ကြုက်ဂှ်လေဝ် ဒဒှ်ရထိုၚ်ဝါန် ဒှ်အပိုၚ်ဍေံဂှ် ဟီုဂးဒၟံၚ်လၟိုန်တုဲ သွက်ဂွံဒုၚ်တဲ အဝဵုအပိုၚ်အခြာကြုက်ဂှ် သၠုၚ်ပ္တိုန်ဒၟံၚ် ဇြဟတ်ဂရိုဟ် သီုပရေၚ်ကလုတ်တမာန် သီုပရေၚ်ပၞာန်တံရ။ အလဵုအသဳထိုၚ်ဝါန်လၟုဟ်ဂှ် နကဵုကောန်ညးဍုၚ်ကွာန်တံ အနာဂတ်ညးတံ ညးတံသ္ဂုတ်သွာတ်စကေတ်တ်ဏောၚ်ဂှ် ဟီုဂးလဝ်ရ။

KMT ဝွံ အခိုက်အလေံညးတံမ္ဂး ပရေၚ်ဆက်ဆောံ မစုက်လုက်ကဵု ဍုၚ်ကြုက်တံဂှ် လေပ်ဒးဂၞပ်ဂၠိုၚ်တုဲ သမ္မတထိုၚ်ဝါန် သာၚ်အေန်ဝါန်လၟုဟ်ဂှ် ဂလာန်ဍုၚ်ကြုက် မဟီုဂးလဝ် သီုၜါလ္ပာ်ဝွံ ဒှ်လစှ်ေဍုၚ်ကြုက် မွဲဓဝ်ရောၚ်ဂှ် တးပါဲလဝ်ဂှ်ရ ပေကျေန် ဒေါသတိတ်ဒၟံၚ် မဒှ်ရ။

တၚ်ဒတူလိုၚ် KMT ဒဒှ်ရထိုၚ်ဝါန် ကေုာံ ဍုၚ်ကြုက်သီုၜါဏံ ဒှ်ဍုၚ်ကြုက် မွဲဍုၚ်ဓဝ်ဂှ်ဝွံ ဒဒှ်ရထံက် ဂလာန်ဂှ် က္ဍိုပ်သ္ကိုပ်ဗော်ဒစဵုဒစး ဟီုဂးလဝ်ရ။

သမ္မတသာၚ်အေန်ဝါန်ဝွံ ပ္ဍဲသၞာံ ၂၀၁၆ ဂှ် ကေတ်လဝ်တာလျိုၚ် သမ္မတတုဲ ဟိုတ်နူအပိုၚ်အခြာသၞာံတံဂှ်တုဲ ကလေၚ်လုပ်စိုပ် ပေါဲရုဲမာဲမွဲဝါမွဲပၠန် ဟွံမာန်ရပုဟ်ဂှ် ဂွံတီကေတ်ရ။

Ref: Reuters