သမ္မတတဳမဝ်ဗၟံက် သ္ပစၟတ်သမ္တီ ကုအလဵုအသဳ NUG ဂှ် သွက်ကံၚ်ဇြဳပၞာန် ဒှ်အရာကျဗြံ ပ္ဍဲကေၚ်ကာကလုတ်တမာန်

နေဗျဳဒဝ်၊ ဂျူလာၚ် (၅)

ဍုၚ်သမ္မတဒဳမိုဝ်ကရေတ်တေတ် တဳမဝ်ဗၟံက် သ္ပစၟတ်သမ္တီ ကုအလဵုအသဳညဳသၟဟ်ဂကူ နဒဒှ်ညးစၞး ဍုၚ်ဗၟာဂှ်ဝွံ သွက်ကံၚ်ဇြဳပၞာန်သီအဝဵုဂှ် ဒှ်လက္ချန် မထ္ၜးပျးကဵုဒၟံၚ် ဒဒှ်ရကျဗြံဒၟံၚ် ပ္ဍဲပရေၚ်ကေၚ်ကာ ကလုတ်တမာန်တံယျဂှ် ညးချဳဒရာၚ်ကတိုၚ်ကၟဟ်ပရေၚ်ဍုၚ်ဗၟာတံ ဟီုလဝ်ရ။

အသေအဟာန်ယဵုဒုၚ်သစ္စာ ဂကောံအလဵုအသဳတၟိ မရနုက်ကဵု ၉ ဝါ ဍုၚ်သမ္မတဒဳမဝ်ကရေတ် တေတ်တဳမဝ်ဗၟံက် မကၠောန်ဗဒှ်လဝ် ပ္ဍဲဂိတုဂျူလာၚ် (၁) ဂှ် သွက်ဂွံတိုန်စိုပ် နဒဒှ်ညးစၞးဍုၚ်ဗၟာဂှ် သမ္မတတဳမဝ်ဗၟံက် ကော်ဘိက်လဝ် ဗွဲမလုပ်သၞောဝ်ရ။

ပ္ဍဲကဵုအသေအဟာန်ယဵုဒုၚ်သစ္စာ မကၠောန်ဗဒှ်လဝ် ပ္ဍဲနန်သမ္မတဂှ် ဝန်ဇၞော်ကာဍုၚ်သ္အာၚ် အလဵုအသဳ ညဳသၟဟ်ဂကူ NUG ဒဝ်ဇြေန်မာအံၚ်ကဵု ညးစၞး NUG စပ်ကဵုဍုၚ်သမ္မတချိတ် ဥူလေန်တ တံ တိုန်စိုပ်လဝ်ရ။

တးပါဲကၠေံ ကံၚ်ဇြဳပၞာန် မသီလဝ်အဝဵုကၟိန်ဍုၚ် နကဵုဇြဟတ်လွဟ် ဗ္ဒါဲပွိုၚ်ၜါသၞာံဂှ်တုဲ ကော်ဘိက်အလဵု အသဳညဳသၟဟ်ဂကူ မဒှ်ဂကောံဇြဟတ်ပၠန်ဂတးဂှ်ဝွံ ဒှ်ပေါဲအံၚ်ဇၞး ဂွံလုပ်စိုပ်ပ္ဍဲဍုၚ်သ္အာၚ်မာန်မွဲရောၚ်ဂှ် မဟာန်နဳထောန် ညးမပါလုပ်ဒၟံၚ်ပ္ဍဲပၠန်ဂတးက္ညၚ် ကောန်ဍုၚ်ဗၟာ စိုပ်ဂျပါန်မွဲတၠ သ္ဂးလဝ်ရ။

“နဒဒှ်ညးစၞးဍုၚ်ဗၟာတုဲ ကော်ဘိက် အလဵုအသဳ NUG ဂှ်ဝွံ ဒှ်လက္ချန် ကံၚ်ဇြဳပၞာန် ကျဗြံဒၟံၚ် ပ္ဍဲအရာလုပ် ဗွိုၚ်ဍုၚ်သ္အာၚ် ဟွံသေၚ်မ္ဂး ဒှ်ပေါဲအံၚ်ဇၞး NUG ဂွံလုပ်စိုပ်ဗွိုၚ်ဍုၚ်သ္အာၚ်မွဲရောၚ်ဂှ် ဟီုဂွံရ။ မွဲပၠန် ချိုတ်ပၠိုတ်မွဲဂှ် ထ္ၜးပျးဒၟံၚ် ဒဒှ်ရကံၚ်ဇြဳပၞာန် ကျဗြံဒၟံၚ် ပ္ဍဲပရေၚ်ကလုတ်တမာန်ဍုၚ်သ္အာၚ်တံ ထပ်ကဵု ထပ်ဂှ် မိက်ဂွံဟီုရ။ ညံၚ်ရဴတဳမဝ်ဗၟံက်ကီု သွက်ဂွံသ္ပကၠုၚ်စၟတ်သမ္တီ ကု NUG ဂှ် ပ္ဍဲကဵုညးဒုၚ်တာလျိုၚ် ညးစၞး NUG မမံၚ်တန်တဴဒၟံၚ် ပ္ဍဲကဵုဍုၚ်မဆေၚ်စပ်တံဂှ် တာလျိုၚ်နွံတုဲ ကောန်ဍုၚ်ဗၟာ နူကဵုဍုၚ်နာနာတံလေဝ် တာလျိုၚ်နွံဒၟံၚ်ရောၚ်” ဂှ် ညးသ္ဂးရ။

ကြဴနူဒပ်ပၞာန်သီအဝဵုတုဲ အလဵုအသဳညဳသၟဟ်ဂကူ ပါလုပ်သီုကဵုညးစၞး NLD ကေုာံ က္ဍိုပ်သ္ကိုပ်ကောန် ဍုၚ်အရၚ်တံဂှ် အလဵုအသဳသမ္မတဍုၚ်ချိတ် သ္ပလဝ်စၟတ်သမ္တီ အလန်ပထမကိုပ်ကၠာအိုတ်ရ။

ဗွဲကြဴဂှ် ဍုၚ်တဳမဝ်ဗၟံက် မဂ္စါန်ဒၟံၚ် ညံၚ်ဂွံဂွံအခေါၚ်လုပ် နဒဒှ်ဍုၚ်အာဇြဳယာန်မွဲဂှ် သ္ပထောံစၟတ်သမ္တီ ကု NUG နဒဒှ်ညးစၞးဍုၚ်ဗၟာ အလန်ဒုတိယပၠန်ရ။

ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သဵုနာၚ်ဂှ်လေဝ် နကဵုတဳမဝ်ဗၟံက် ဟွံသ္ပစၟတ်သမ္တီ ကုကံၚ်ဇြဳပၞာန်မွဲသာ် သ္ပထောံစၟတ်သမ္တီ ကု NUG မရုန်ဂ္စါန်ဒၟံၚ် သွက်ဖေဝ်ဒရာဒဳမဝ်ကရေဇြဳဂှ် နဒဒှ်အလဵုအသဳဂှ်ဝွံ ပ္ဍဲပရေၚ်ကလုတ်တမာန်ဂှ် ဒှ်ပေါဲအံၚ်ဇၞး တၟေၚ်တၟဟ်မွဲရောၚ်ဂှ် ညးဟီုထ္ၜးလဝ် လညာတ်ညးရ။

“နကဵုတဳမဝ်ဗၟံက် ဟွံသ္ပစၟတ်သမ္တီ ကုကံၚ်ဇြဳပၞာန်ဗၟာမွဲသာ် သ္ပထောံစၟတ်သမ္တီ ကု NUG နဒဒှ်အလဵုအသဳ မလုပ်ဒၟံၚ်ပေါဲဗ္တိုက်ရုန်ဂ္စါန်ဒၟံၚ် သွက်သၞောတ်ဖေဝ်ဒရာဒဳမဝ်ကရေဇြဳဂှ်ဝွံ ရံၚ်ကဵုဝၚ်မ္ဂး ဒှ်ကိစ္စ မ္ဒးကၠောန် ထေက်တုဲ ဟွံသ္ပစၟတ်သမ္တီ ညးစၞးကံၚ်ဇြဳပၞာန် သၞောတ်တၠအဝဵုပၞာန်ဂှ်တုဲ သ္ပထောံစၟတ်သမ္တီ ကော်ဘိက် လဝ် NUG ဂှ်ဝွံ သွက် NUG ဂှ် ပ္ဍဲပရေၚ်ချဳဒရာၚ် ကေၚ်ကာကလုတ်တမာန်ဂှ် ဒှ်ပေါဲအံၚ်ဇၞး တၟေၚ်တၟဟ်မွဲရောၚ်ဂှ် အဲညာတ်ကေတ်ရ” သာ်ဝွံ ညးသ္ဂးရ။

ဒဝ်ဇြေန်မာအံၚ် မဒှ်ဝန်ဇၞော်ကာဍုၚ်သ္အာၚ် NUG မတိုန်စိုပ်လဝ် အသေအဟာန်ယဵုဒုၚ်သစ္စာဂှ် ပအပ်ပြာပ်ကဵုလဝ် သမ္မတဍုၚ်တဳမဝ်ဗၟံက် ရုပ်ကသူဒဝ်အံၚ်သာန်သုကျဳဂှ် သမ္မတတဳမဝ်ဗၟံက် ချူပ္တိုန်ထ္မံက်ထ္ၜးလဝ် ပ္ဍဲဇာဇၞိက်ပရေၚ်မၞိဟ် Facebook ညးရ။

ဍုၚ်တဳမဝ်ဗၟံက်ဝွံ ပ္ဍဲသၞာံ ၂၀၀၂ ဂှ် ပါ်တိတ်နူဍုၚ်အေန်ဒိုဝ်နဳယှာတုဲ ဒှ်ဍုၚ်မၞုံကဵုအဝဵုအပိုၚ်အခြာ ကလိဂွံလဝ်ပရေၚ်ဗၠးၜးတုဲ ပ္ဍဲသၞာံ ၂၀၁၁ ဂှ် အာတ်ပ္တိုန်လဝ် နဒဒှ်ကောန်ဂကောံအာဇြဳယာန်ရ။

နကဵုအာဇြဳယာန် သွက်ဂွံဒုၚ်တဲ ဍုၚ်တဳမဝ်ဗၟံက် နဒဒှ်ကောန်ဂကောံဂှ် နူကဵုကောံဓရီုကဆံၚ်လ္တူဂှ် နကဵုမူ ဟိုတ်နူသ္ဂုတ်သွာတ်လဝ် လစွံစိုတ်တံတုဲဂှ်ရ ဍုၚ်တဳမဝ်ဗၟံက် လၟိဟ်မၞိဟ် (၁ ဒဿမ ၃) ပြကောဋိကိုဋ် ဓဝ်ဟေၚ် မၞုံဂှ်ဝွံ သွက်ဂွံဒှ်ကၠုၚ် ကောန်ဂကောံအာဇြဳယာန် မရနုက်ကဵု ၁၁ ဍုၚ်ဂှ် နွံဒၟံၚ်ရ။

ပရိုၚ်−သြၚ်လောန်တိုၚ်(မ်)

ဗီု−Presidencia da Republica Democratica de Timor-Leste