မတ်မလီု – ဂျူလာၚ်(၆)
သ္ပတံနူဒပ်ပၞာန်သီအဝဵုကၟိန်ဍုၚ်ဗၟာတုဲ စဵုကဵုဂိတုဂျူလာၚ် စၟတ်တ္ၚဲ (၄)ဏံ အလုံမွဲကၟိန်ဍုၚ် ကွးဘာတြုံဗြဴ ဒးဒုၚ်ဖျေံလဝ်ဒဏ်ထံၚ်စာတ် နကဵုၝောံပိုဒ်ဟွံဗဗွဲဓဝ် ပ္ဍဲရုၚ်သၞောဝ်ဓဝ် သၟဝ်တဲကံၚ်ဇြဳပၞာန် နွံ(၁၃၈)တၠ ရဂှ် AAPP လလောၚ်တြးလဝ်ရ။
ပ္ဍဲကဵုဂှ် ကွးဘာတြုံ (၁၀၇)တၠ ကွးဘာဗြဴ (၃၁)တၠ ပါလုပ်ဒၟံၚ်တုဲ ပ္ဍဲရးလဂုၚ် (၆၅)တၠ ပါလုပ်ဒၟံၚ် ဂၠိုၚ်အိုတ်ရဂှ် ဓမံက်ထ္ၜးလဝ်ရ။
ပ္ဍဲဂိတုဂျောန် စၟတ်တ္ၚဲ (၃၀)ဂှ်လေဝ် ဒုတိယဥက္ကဋ္ဌ သမဂ္ဂကွးဘာတက္ကသိုလ်ပရေၚ်ပိုန်ဒြပ်လဂုၚ်၊ ကိုဝ်ထေတ်ပိုၚ်သိုဝ် ကွးဘာသၞာံတတိယ ဌာပညာစရၚ်အၚ်ဂှ် ရုၚ်သၞောဝ်ဓဝ်လဂုၚ်သ္ကုၚ်ဗၟံက် ဖျေံလဝ်ဒဏ်ကမၠောန် ကေုာံ ထံၚ် (၁၀)သၞာံ နကဵုၝောံပိုဒ် ဗတိုက်သရိုဟ်ပွပ္ကီုပရာပ်ရ။
ဟိုတ်နူကံၚ်ဇြဳပၞာန်သီအဝဵုတုဲ အလုံမွဲကၟိန်ဍုၚ်ဂှ် ဒးဒုၚ်ပ္ကီုပရာပ်ပြိုက်ဂစိုတ်လဝ်တုဲ ညးဒးပြဟ်လလုဲ လဝ် စဵုကဵု (၃၇၄၅)တၠနွံတုဲ ညးဒးဒုၚ်ရပ်လဝ်လေဝ် နွံစဵုကဵု (၂၃၆၇၄)တၠရ။
သ္အာၚ်နူဂှ်ပၠန် ဆက်စပ်ကဵုပရေၚ်ပၠန်ဂတးက္ညၚ်တုဲ ညးဒးဒုၚ်ထိၚ်ဒဝ်လဝ်ပ္ဍဲထံၚ်စာၚ် ဒးဒုၚ်ဖျေံလဝ်ဒဏ် ဂစိုတ် (၁၁၅)တၠနွံတုဲ သီုညးဒးဒုၚ်ဖျေံလဝ်ဒဏ်ဂစိုတ်(၄၂)တၠ ဟိုတ်နူညးဒးဒုၚ်ဖျေံလဝ်ဒဏ်ဂစိုတ် (၁၂၁)တၠဂှ်ရ အပံၚ်လၟိဟ်ဒးဒုၚ်ဖျေံလဝ် ဒဏ်ဂစိုတ် (၁၅၇)တၠ နွံကၠုၚ်ရဂှ် ဂွံတီကေတ်ရ။
ပရိုၚ် – သြၚ်လောန်တိုၚ်(မ်)
ဗီုရုပ် – CJ
sanlontai