ဒပ်ကံၚ်ဇြဳပၞာန် ဒးဒုၚ်ကၠတ်ဗတိုက်လဝ် ပ္ဍဲဘုက်ပျေန်တုဲ ဒးချိုတ်လဝ် (၅) တၠ ၊ သီဂွံလဝ် လွဟ် (၃) ဒကိုအ်

ဘုက်ပျေန်၊ ဂျူလာၚ်(၆)

ရးဒေသဇၞော်တၞၚ်သြဳ ဒပ်ကံၚ်ဇြဳပၞာန်ဂေတ်ဒၟံၚ်ကၚ် ပွိုၚ်ဍုၚ်ဘုက်ပျေန် ဗ္ဒာဲကွာန်ချောၚ်မန်ဂှ် ဟိုတ်နူဒးဒုၚ် ကၠတ်ဗတိုက်လဝ်တုဲ ကောန်ဒပ်ကံၚ်ဇြဳပၞာန် ဒးချိုတ်လဝ် (၅)တၠတုဲ သီုဂွံလဝ် လွဟ် (၃)ဒကိုအ်ရဂှ် ညးတာလျိုၚ် (ပကဖ)ပွိုၚ်ဍုၚ်ဘုက်ပျေန်တအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

ပ္ဍဲဂိတုဂျောန် တုဲကၠုၚ် စၟတ်တ္ၚဲ (၃) အခိၚ်ဇိုၚ်သဝ်တ္ၚဲဂှ် နူပ္ဍဲဍုၚ်ဘုက်ပျေန် လ္ပာ်လေညာမဏ္ဍိုၚ်ဂှ် ဒပ်ကံၚ်ဇြဳပၞာန် ဂေတ်ဒၟံၚ်ကၚ် နကဵုကွဳစက်သ္ၚိ (၂) ဖ္ဍိုက် ဇြဟတ်မၞုံ (၂၀) ပြၚ်ဂှ် ဒပ်ပံၚ်ကောံဒပ်စဵုဒၞာဒေသတအ် ကၠတ်ဗတိုက် လဝ်ရ။

ဟိုတ်နူကၠတ်ဗတိုက်လဝ်ဏံ ပရေၚ်ပန်ပှော်ၜါလ္ပာ် က္တဵုဒှ်လဝ် လအ်အခိၚ်ၜိုတ်မွဲနာဍဳတုဲ လ္ပာ်ကံၚ်ဇြဳပၞာန် ဇီုကပိုက်ဒးချိုတ်လဝ် နွံရ။

အတိုၚ်တၚ်ဂၞၚ်(ပကဖ)ပွိုၚ်ဍုၚ်ဘုက်ပျေန်မ္ဂး ပ္ဍဲကဵု ကောန်ဒပ်ကံၚ်ဇြဳပၞာန် ဒးချိုတ်လဝ်ဂှ် ကောန်ဒပ် ကံၚ်ဇြဳပၞာန် ခမရ ၅၉၉ ဖျေံသ္ဇိုၚ်ဘုက်ပျေန် (၃)တၠ၊ ကောန်ဒပ် ခမရ ၅၆၀ (၁)တၠ ကေုာံ ကောန်ဒပ်တံဒပ် ခလရ ၂၂၄ (၁)တၠ အပံၚ်လၟိဟ် (၅)တၠ ဒးချိုတ်လဝ်ရဂှ် ဟီုသ္ဂးလဝ်ရ။

ၜိုန်ရဒပ်ကောန်ဒပ်ကံၚ်ဇြဳပၞာန် ဒးဒုၚ်ကၠတ်ဗတိုက် လဝ်ကီုလေဝ် စဵုကဵုဂိတုဂျူလာၚ် စၟတ်တ္ၚဲ (၅)ဏံ လ္ပာ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန် ဟၟဲတုဲ အကာဲအရာပရေၚ်ပၞာန် ညိၚ်ဝတ်ဒၟံၚ်ရဂှ် ညးတာလျိုၚ် (ပကဖ)ဘုက်ပျေန်မွဲတၠ ဟီုသ္ဂးလဝ်ရ။

ပ္ဍဲဂိတုမေ စၟတ်တ္ၚဲ (၈) တုဲကၠုၚ်တေံလေဝ် ဟိုတ်နူသၞေဟ်ကၚ်စၟဳစၟတ် ဒဒန်လေညာ-ဗာန်ဂလာ မၞုံဗ္ဒာဲကွာန်ဗာန်ဂလာ၊ ပွိုၚ်ဍုၚ်ဘုက်ပျေန်ဂှ် ဒးဒုၚ်ဗတိုက်လဝ်တုဲ ကောန်ဒပ်ကံၚ်ဇြဳပၞာန် (၂)တၠ ဒးချိုတ်လဝ်ရဂှ် ဂွံတီကေတ်ရ။

ပရိုၚ်-သြၚ်လောန်တိုၚ်(မ်)

ဗီုရုပ်- ပကဖ ပွိုၚ်ဍုၚ်ဘုက်ပျေန်