ကောန်ၚာ်သၟတ် ကေုာံ ညးဗြဴ ပါဲဒဴဘဲပၞာန် နူတိဍာ် KNU တံ ဒးဒုၚ်စသိုၚ်ဒၟံၚ်ယဲဇွဟ်

ညံၚ်လေဝ်ပေန်၊ ဂျူလာၚ် (၇)

ညးဗြဴပါဲဒဴဘဲပၞာန် ကေုာံ ကောန်ၚာ်သၟတ် မဒးဂြိပ်ဒဴပါဲဒလေတ်ဒၟံၚ် ပ္ဍဲတိဍာ်အုပ်ဓုပ် ဗော်သွးကောန်ဂကူကရေၚ် KNU ဂှ် ဒးဒုၚ်စသိုၚ်ဒၟံၚ်ယဲဇွဟ်တုဲ နွံပၟိက်ဒၟံၚ်ကဵု အရီုဗၚ်ဂမၠိုၚ်ရောၚ် ဗော်သွးညးဗြဴကရေၚ် KWO ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ညးဍုၚ်ကွာန်ပါဲဒဴဘဲပၞာန် မ္ဒးဂြိပ်ဒဴပါဲဒလေတ်ဒၟံၚ်ဂမၠိုၚ်ဝွံ ဟိုတ်နူစိုပ်ကၠုၚ်ကသီုဂှ်ရ ဇွောံမစၞစ ကေုာံ ပရေၚ်ထတ်ယုက်တံဂှ် ဟွံဂွံရုမ်မ်ဂပ်ပ်တုဲ သီုကဵုဒးဒုၚ်စသိုၚ်ဒၟံၚ် ယဲဇွဟ်တံရ။

ပ္ဍဲကဵုခရိုၚ်ညံၚ်လေဝ်ပေန် ဒပ်မဟာ (၃) KNU, ခရိုၚ်ဘာပန် ဒပ်မဟာ (၅) KNU ကေုာံ ခရိုၚ်ဒူပလာယာ ဒပ်မဟာ (၆) KNU တံဂှ် က္တဵုဒှ်ဒၟံၚ် ယဲဇွဟ်ဂၠိုၚ်အိုတ်ရ။

မၞိဟ်ဗြဴပါဲဒဴဘဲပၞာန် ကေုာံ ကောန်ၚာ်သၟတ် မဒးဒုၚ်စသိုၚ်ဒၟံၚ်ယဲဇွဟ်တံဂှ် ဟိုတ်နူအခက်အခုဲဂၠံၚ်ဍာန်တုဲ ပရေၚ်မၚ်မွဲရံၚ်စံၚ် ပရေၚ်ထတ်ယုက်ဂှ်လေဝ် ဟွံစိုပ်ဒၟံၚ်ကွေံကွေံပုဟ်ဂှ် နဝ်သေသေဟေဝ် ဒုဥက္ကဌ ဗော်သွးညးဗြဴကရေၚ် KWO ဟီုရ။

“အခိၚ်ဒးဂြိပ်ဒဴဒၟံၚ်ဂှ် လၟုဟ်ဂှ်ဗြဲဂူဒၟံၚ်တုဲ ကောန်ၚာ်တံဂှ် ဒးဒုၚ်စသိုၚ်ဒၟံၚ်ယဲဇွဟ်တံရ။ ပရေၚ်ရေၚ်တၠုၚ် ပရေၚ်ထတ်ယုက်ဂှ်လေဝ် ဟွံစိုပ်ဒၟံၚ်ကွေံကွေံပုဟ်။ လၟုဟ်ဂှ် ဗြဲဂှ်လေဝ် ဂူဒၟံၚ်ကွေံကွေံဏောၚ်။ ဂၠံၚ်တရဴဂှ်လေဝ် ဒးအာဂှ်သ္ၚောဲဒၟံၚ်ဏောၚ်။ မိယာဲတံ ကောန်ၚာ်ဍောတ်တ်တံဟီုမ္ဂး ကၞဴတိက်တံဂှ် ဟွံရုမ်ဂပ်ပုဟ်။ သွက်ဂွံထိုၚ်ကၞဴဂှ်လေဝ် ဟွံပြေပြံၚ်ပုဟ်။ ဒးတိက်ဒၟံၚ်ပ္ဍဲကဵုကတိုၚ်တေံ ကတိုၚ်ဏံ။ ဒးတိက်ဒၟံၚ် ပ္ဍဲအကြာဂြိုပ် အကြာဒဵုတံဂှ်တုဲ ဒးဒုၚ်စသိုၚ်ဒၟံၚ် ယဲဇွဟ်တံရ။ စၞစသုၚ်ဂှ်လေဝ် ဟွံရုမ်ဂပ်ပုဟ်။ ပ္ဍဲကဵုဗ္ဒိုပ်ပါဲဒဴဘဲပၞာန်ဂှ်တှ်ေ ပရေၚ်မၚ်မွဲ ပရေၚ်ထတ်ယုက်ဂှ်လေဝ် ဟွံရုမ်ဂပ်ပုဟ်” သာ်ဝွံ သ္ဂးရ။

ညးဍုၚ်ကွာန်ပါဲဒဴဘဲပၞာန်ဂမၠိုၚ်ဝွံ ဟိုတ်နူဒးမံၚ်စံၚ် စသုၚ်တိက်ဒၟံၚ် ပ္ဍဲဂြိုပ်ဂှ်ရ ဒးဒုၚ်ဒၟံၚ်ဘဲဒဏ်ဇၟိတ်ကိတ်တံဂှ်တုဲ ကပေါတ်အရပ်စပ်ကၞဴတံဂှ်လေဝ် ရုမ်မ်ဂပ်ပ် ဟွံမွဲပုဟ်ဂှ် ဟီုရ။

ပ္ဍဲကဵုညးဍုၚ်ကွာန်ပါဲဒဴဘဲပၞာန် မ္ဒးဂြိပ်ဒဴပါဲဒလေတ်ဒၟံၚ် အခိၚ်ကာလဗွဲမလအ်လဂမၠိုၚ် ကောန်ၚာ်သၟတ်တံဝွံ ဗွဲမဂတာပ်အခိၚ် ဟွံဂွံစစၞစတံဂှ်ကဵု ဇွောံမစၞစ ဟွံရုမ်ဂပ်တံဂှ်တုဲ ကလိဂွံဒၟံၚ်ယဲဘဲတံတုဲ လမျီုဒးအိုတ်တံလေဝ် နွံဒၟံၚ်ရောၚ်ဂှ် ဂွံတီကေတ် အတိုၚ်ဂလာန် ညးဒုၚ်တာလျိုၚ် ပရေၚ်စန်ဒက်ဖ္တိုက်ဖ္အောဝ် ဂကောံအခေါၚ်အရာမၞိဟ်ကရေၚ် KHRG သဝ်နန္ဒသူရ။

စွံပွန်လ္တူညးဍုၚ်ကွာန်ကောန်အရာပ်တံတုဲ ဟိုတ်နူပရေၚ်ဗ္တိုက်ပန်ပှော် ဒပ်ကံၚ်ဇြဳပၞာန်တံကဵု အ​ခေါၚ်အရာမၞိဟ် ဒးဒုၚ်ဖံက်ပ္ကဝ်ဒၟံၚ်တံဂှ်တုဲ လၟိဟ်ညးပါဲဒဴဘဲပၞာန် မ္ဒးဂြိပ်ဒဴပါဲဒလေတ်ဒၟံၚ် မၞုံဒၟံၚ်အပ္ဍဲတိဍာ် KNU ဂှ် နွံဒၟံၚ် ဗ္ဒါဲ ၆ ကိုဋ်ရ။

သွက်ညးဍုၚ်ကွာန်ပါဲဒဴဘဲပၞာန်တံဂှ် ဆက်တုဲနွံပၟိက်ဒၟံၚ် အရီုဗၚ်ပရေၚ်ဗ္စာရဏာမၞိဟ်ကာတၟေၚ်ရောၚ်ဂှ် ဂကောံပရေၚ်မၞိဟ်ကရေၚ် ဟီုဂးလဝ်ရ။

ပရိုၚ်−သြၚ်လောန်တိုၚ်(မ်)

ဗီု−KNU