ဗဝ်လခေဝ်- ဂျူလာၚ်(၇)
တွဵုရးကရေၚ်ဍာဲ၊ ပွိုၚ်ဍုၚ်ဗဝ်လခေဝ် ပ္ဍဲပေါဲဗတိုက် ပွိုၚ်ဍုၚ်ယွာတေတ် ဒၞာဲက္ၜၚ်ကျာပၞာန် ကံၚ်ဇြဳပၞာန် ဒးဒုၚ်ပန်ဖျေံလဝ်ဂှ် ဒပ်ပၞာန်ဗၠးၜးညးဍုၚ်ကွာန် ကောန်ဂကူကရေၚ်ဍာဲပံၚ်ကောံ – တံဒပ် ကလလတ ၉၄၂၂ ဓမံက်ထ္ၜးလဝ် မွဲကရောံကဵု ဗီုရုပ်တအ်ရ။
ပ္ဍဲဒၞာဲက္ၜၚ်ကျာကံၚ်ဇြဳပၞာန် ခရိုဟ်လီုစှ်ေလဝ်ဂှ် ဂွံလဝ်အခေါၚ် တက်ကေတ်ဗီုရုပ် နကဵုဒရုမ်တုဲ ကဝေက်က္ၜၚ်ကျာခရိုဟ်လီုလဝ် ဟၟဲရပုဟ်ဂှ် တံဒပ် ကလလတ – ၉၄၂၂ လလောၚ်တြးလဝ် ပ္ဍဲဂိတုဂျူလာၚ် စၟတ်တ္ၚဲ(၅)ရ။
စဵုကဵုအခိၚ်လၟုဟ် စပ်ကဵုကိစ္စဂှ်တုဲ ၜိုန်ရလ္ပာ်ကံၚ်ဇြဳပၞာန်ဟွံဂွံလလောၚ်တြးလဝ် မမိက်ကဵုမွဲမွဲဏီလေဝ် ပ္ဍဲချာန်နေဝ်တေဝ်လဳဂရာမ် တြးဝါဒဂှ်မ္ဂး ပရေၚ်ဟီုဂးပါဲတး နွံဒၟံၚ်ရ။
ဂကူက္ၜၚ်ကျာကံၚ်ဇြဳပၞာန် ခရိုဟ်လီုစှ်ေလဝ်ဂှ် စဵုကဵုလၟုဟ်ဏံ ဟွံဂွံတီကေတ်ဏီရဂှ် ညးအုပ်ကာနာနာ KNPLF ဥူလဝ်ယျေန်သိုဝ် ဟီုကဵု ဌာန်ပရိုၚ်သြၚ်လောန်(မ်)ရ။
“သက်သဳသ္ဂံၚ်ပိုဲ ဆဵုလဝ်နမတ် နွံရ။ ခရိုဟ်လီုစှ်ေအာဟီုဂှ် ဂုဏ်နူသက်သဳညာတ်လဝ်နွံ ဟီုဒၟံၚ်ရ။ ဂကူက္ၜၚ်ကျာဂှ်တှ်ေ ဒဵုကဵုလၟုဟ် ဟွံဂွံတီဏီပုဟ်။ ဂကူလွဟ်ပန်ဖျေံလဝ်ဂှ်လေဝ် လၟုဟ်ဏံ ဟီုဟွံဂွံဏီပုဟ်” ဂှ် ညးဟီုသ္ဂးလဝ်ရ။
ပ္ဍဲဂိတုဂျောန် စၟတ်တ္ၚဲ (၃၀) တုဲကၠုၚ်တေံဂှ် အကြာဒပ်ကံၚ်ဇြဳပၞာန်ကဵု ဒပ်ပၠန်ဂတးပံၚ်ကောံကရေၚ် ဍာဲတအ် ပေါဲဗတိုက်သ္ကာတ်မြဟ်လဝ် ပ္ဍဲဗ္ဒာဲကွာန်တာသာန်လေဝ်တုဲ ပ္ဍဲပေါဲဗတိုက်ဂှ် က္ၜၚ်ကျာ ကံၚ်ဇြဳပၞာန်မွဲဖ္ဍိုက် စဵုဒၞာပန်ပှော်ကဵုလဝ်ရ။
သ္ပတံနူ ဂိတုဂျောန် သ္ကုတ်လဒေါဝ်တုဲဂှ် ပ္ဍဲပယျဵုသေံ-ကရေၚ်ဍာဲဂှ် ဒပ် KNPLF ပြံၚ်ကၠောံကၠုၚ် နူဒဒှ် BGF ကံၚ်ဇြဳပၞာန် ကေုာံ ကံၚ်ဇြဳပၞာန် ပေါဲဗတိုက်သ္ကာတ်မြဟ်လဝ်ရ။
ပ္ဍဲတွဵုရးကရေၚ်ဍာဲ သၞာံဏံ ကလေၚ်ဗတိုက်ပန်ဗတိုက်လဝ် က္ၜၚ်ကျာကံၚ်ဇြဳပၞာန် ဒှ်ကၠုၚ်မရနုက်ကဵု ၜါဝါတုဲ ပ္ဍဲအခိၚ်သၞာံမံက်တုဲကၠုၚ်ဏံဂှ် ဟိုတ်နူဒပ်ပၠန်ဂတးပံၚ်ကောံတအ် ဗိုၚ်ပန်ပှော်လဝ် က္ၜၚ်ကျာ သၞေၚ်ဝဲကံၚ်ဇြဳပၞာန် ကၠုၚ်ပလံၚ်ဇွောံမတုဲ ပရေၚ်ဒဒှ်က္ၜၚ်ကျာ်သၞေၚ်ဝဲ စှ်ေဟွံဂွံ ကလေၚ်ပဝ်တိုန်အာလဝ် ကေၚ်ဒှ်နွံကၠုၚ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – KNPLF
sanlontai