လ္တူဥက္ကဌ ဌာန်ရိုဟ်ကၞက်နဳပေါန် ဂ္စါန်ဒၟံၚ်ပရေၚ်ၜိုဟ်လလမ်ဍုၚ်ဗၟာဂှ် ဒဒှ်ရဂကောံဒေါအ်ပန်ပှော် (၇) ဂကောံ ထံက်ဂလာန်ဂှ် ပ္တိတ်လိက်

လ္ဂုၚ်၊ ဂျူလာၚ် (၆)

ဥက္ကဌ ဌာန်ရိုဟ်ကၞက်နဳပေါန် သာသာကာဝါ နဒဒှ်ညးစၞးတၟေၚ် အလဵုအသဳဂျပါန် စပ်ကဵုဍုၚ်ဗၟာ လ္တူမပ္တိတ်ဒၟံၚ်ဇြဟတ် လ္တူပရေၚ်ၜိုဟ်လလမ် ကေုာံ အရီုဗၚ်စပ်ကဵုပရေၚ်ဗ္စာရဏာမၞိဟ်တံဂှ် ဂကောံ EAO ထ္ပက်လဝ်စၟတ်တဲ NCA (၇) ဂကောံတံ ထံက်လဝ်ဂလာန်ရောၚ် ပ္ဍဲဂိတုဂျူလာၚ် (၅) တေံ လလောၚ်ပ္တိတ်လဝ်ရ။

ဌာန်ရိုဟ်ကၞက်နဳပေါန် သာသာကာဝါ မသ္ကိုပ်သ္ကဂှ်ဝွံ သွက်ပရေၚ်ဖောအ်ဗြေဝ်တောတက် ဒေသကောန်ဍုၚ်အရၚ်တံဂှ် ထံက်ပၚ်ကဵု ကိုန်စဳမာန်ဍုၚ်တၟိတံကီု၊ ထံက်ပၚ်ကဵု ဘာဗ္တောန်လိက်၊ ရုၚ်ဂဥုဲတံဂှ် ကၠောန်ၜိုတ်လဝ်ရောၚ် သ္ဂးရ။

ပ္ဍဲကဵုအရီုဗၚ် စပ်ကဵုပရေၚ်ဗ္စာရဏာမၞိဟ်တံဂှ်လေဝ် ပ္ဍဲကဵုတိဍာ် ဂကောံ NCA-S EAO (၇) ဂကောံဇကုတံဂှ် အပ္ဍဲသၞာံ ၂၀၂၂−၂၀၂၃ မတြးကဵုလဝ်ဇွောံမသ္ဇိုၚ်တံဂှ် လၟိဟ်ရိုက်သ္ၚု ၆၄၀၀၀ တြးမာန်လဝ်တုဲ သွက်သၞာံ ၂၀၂၃−၂၀၂၄ သွက်ဂွံဆက်တြးကဵုဂှ် စဳဇန်ဒၟံၚ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

ဟိုတ်ဂှ်ရ နူကဵုအလဵုအသဳအဆက်က်တေံဂှ်ရ IDPs မၞုံအပ္ဍဲတိဍာ်ကောန်ဍုၚ်အရၚ်ဇကုတံ နူကဵုအလဵုအသဳအဆက်က်တေံဂှ်ကီု၊ ပူဂဵု မရီုဗၚ်ထံက်ပၚ်ကဵုဒၟံၚ် ညးပါဲဒဴဘဲပၞာန်တံကဵု ညးဒဒိုက်တံ ကေုာံ လ္တူပွမဟီုဖ္ဍိုက်ဂရိုက်ဒၟံၚ် လ္တူပူဂဵု မချဳဒရာၚ်က္တိုၚ်ကၟဟ်ဒၟံၚ် ပ္ဍဲဌာန်ရိုဟ်ကၞက်နဳပေါန်တံဂှ် နကဵုဂကောံ NCA-S EAO (၇) ဂကောံတံ ဒစဵုဒစးဟီုဂှ် လလောၚ်ပ္တိတ်လဝ်ရ။

စပ်ကဵုကိစ္စ မပါလုပ် ပ္ဍဲတၚ်လလောၚ်တြးဂှ်တုဲ နူကဵုသြၚ်လောန်တိုၚ်(မ်) ၜိုန်ရဆက်စၠောံလဝ် သ္ကိုပ်ဗိုလ်ဇၞော် ဃောန်ဥက္ကာ ဂၞန်ဖုၚ်ဌာန်ပရိုၚ်ဂမၠိုၚ် မထ္မံက်ထ္ၜးလဝ် သ္ဂောံဆက်စၠောံ သီုဂၞန်ဖုၚ်သေံ သီုဂၞန်ဖုၚ်ဗၟာဂှ်ကီုလေဝ် ဒုၚ်တဲသှ်ကဵုလဝ်ဂှ် ဟွံမွဲရ။

ပ္ဍဲကဵုတၚ်လလောၚ်တြးဂှ် အခိၚ်လၟုဟ်ဝွံ သွက်ဒတုဲဖဵုညးဍုၚ်ကွာန်ကောန်ဍုၚ်အရၚ် မဒးဒုၚ်ဒၟံၚ်ဘဲဒဏ်ပဋိပက္ခဇကုတံဂှ် ဒဒှ်ရထံက်ဂလာန် ဌာန်ရိုဟ်ကၞက်နဳပေါန်ဂှ်ကဵု ဥက္ကဌသာသာကာဝါ ပေၚ်ၚ်ဂှ်တုဲ ပံၚ်တောဲရေၚ်တၠုၚ်အာဏောၚ်ဂှ် ဂကောံ NCA-S EAO (၆) ဂကောံတံ ထ္ပက်စၟတ်တဲ တုပ်လဝ်စိုတ်ရောၚ် ထ္မံက်ထ္ၜးလဝ်ရ။

ပ္ဍဲကဵုဂကောံရပ်လွဟ်ကောန်ဍုၚ်အရၚ် မထ္ပက်လဝ်စၟတ်တဲဒေါအ်ပန်ပှော် မတုပ်လဝ်စိုတ် ထ္ပက်လဝ်စၟတ်တဲတံဂှ် ဗော်ဗၠးၜးရးရခေၚ် (ALP) ၊ ဒပ်ပၞာန်ဒတုဲဖဵု ဒဳမဝ်ကရေဇြဳကရေၚ် (DKBA) ၊ ကံၚ်ဇြဳပရေၚ်ၜိုဟ်လလမ်ကရေၚ် (KNU/KNLA-PC) ၊ ဗော်ဒဳမဝ်ကရေတ်တေတ်လာဟူ (LDU) ၊ ဗော်ဍုၚ်မန်တၟိ (NMSP) ကေုာံ ဌာန်ဂအုပ်ဗၠးၜးကောန်ဂကူပအိုဝ် (PNLO) တံ မဒှ်ရ။

ဂကောံရပ်လွဟ်ကောန်ဍုၚ်အရၚ် မဒေါအ်လဝ်ပန်ပှော်ဂှ်ဝွံ တိုန်စိုပ်လဝ်ပေါဲသဳကၠဳပရေၚ်ၜိုဟ်လလမ် ကံၚ်ဇြဳပၞာန် မကော်ဘိက်လဝ် ဟွံအောန်နူကဵု (၅) ဝါတုဲ ပ္ဍဲကဵုဏံ ကံၚ်ဇြဳကလေၚ်ပ္တန်ရးသေံ (RCSS) လေဝ် ပါလုပ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−ဌာန်ရိုဟ်ကၞက်နဳပေါန် (ဗီုတြေံ)