ဒဒန် ဂၠံၚ်ကွဳစက်တိုန်ဒဵု ကျာ်ဣသိယဵု ဒးဒုၚ်ဖံက်ဗ္တိုဟ်ပလီုပလာ်လဝ်

ကျာ်ထဝ်၊ ဂျူလာၚ် (၇)

ဒဒန် ဂၠံၚ်ကွဳစက်တိုန်ဒဵု ကျာ်ဣသိယဵု ပွိုၚ်ဍုၚ်ကျာ်ထဝ် တွဵုရးဍုၚ်မန်ဂှ်ဝွံ ပ္ဍဲဂိတုဂျူလာၚ် ၆ အခိၚ်ဇိုၚ် သဝ်တ္ၚဲ ၜိုတ် (၃) နာဍဳဂှ် ဒးဒုၚ်ဖံက်ဗ္တိုဟ်လဝ်မာၚ် ပလီုပလာ်လဝ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ဒပ်ပၞာန်ဗၠးၜးကောန်ဂကူကရေၚ် KNLA, ဂကောံဒပ်ပံၚ်ကောံ PDF တံ ဖံက်ဗ္တိုဟ်ပလီုပလာ်လဝ် ဒဒန်ဂြိုပ်လေဝ်ဖာ မၞုံသ္ၚောဲနူကဵုဂၠံၚ်ကွဳစက်တိုန်ဒဵု ကျာ်ဣသိယဵု ၜိုတ်ပွိုၚ် ၁၀ မိနေတ်ပြၚ်ဂှ်ရ။

ဟိုတ်နူဒးဒုၚ်ဖံက်ဗ္တိုဟ်မာၚ် ပလီုပလာ်လဝ်ဂှ်ရ ဒဒန်ဂြိုပ်လေဝ်ဖာ ဇမၠိၚ်နွံ ၜိုတ် (၇၀) ပေ သရိုဟ်စှ်ေ လီုလာ်အာလဝ်တုဲ မၞိဟ်ကလိဂွံဝပ်ဇီုကပိုက်ဟွံမွဲပုဟ်ဂှ် သ္ဂးရ။

ဟိုတ်နူဒဒန်ဂြိုပ်လေဝ်ဖာ ဒးဒုၚ်ပလီုပလာ်ဂှ်ရ ကွဳစက်လ္ပာ်တိုန်တံ အာကၠုၚ်ဟွံဂွံရတုဲ ညးလ္ၚောဝ်ကျာ် ဣသိယဵု မၞုံဒၟံၚ်လ္တူဒဵုတေံ (၂၀၀) ပြၚ်ကဵု မၞိဟ်မံၚ်တန်တဴဒၟံၚ်လ္တူဒဵုတံ သွက်ဂွံကလေၚ်စှ်ေ လ္ပာ်ကေန်မန် ချံၚ်ဂှ် ဒှ်ဒၟံၚ်အခက်အခုဲရောၚ် ဂွံတီကေတ်ရ။

ဒပ်ကံၚ်ဇြဳပၞာန်ဝွံ ဖျေံဒပ် လ္တူဒဵုကျာ်ဣသိယဵုတံကီု၊ သုၚ်စောဲ ဂၠံၚ်တိုန်ဒဵုတုဲ ဟိုတ်နူကၠောန်သ္ပယိုက် ဏာနၚ်ဒၟံၚ် ဇွောံမကဵုလွဟ်လက်နက်တံဂှ်ရ ဒးဒုၚ်ဖံက်ဗ္တိုဟ်မာၚ် ပလီုပလာ်လဝ်ရောၚ် ညးတာလျိုၚ် ခရိုၚ်သဓီု KNU မွဲတၠ ဟီုရ။

ဂကောံဒပ်ပံၚ်ကောံ KNLA ဝွံ တုဲကၠုၚ်ပ္ဍဲဂိတုဂျောန် (၂၉) တေံလေဝ် ဖံက်ဗ္တိုဟ်ပလီုပလာ်လဝ် ဒဒန်ဂျုၚ်အုက် လ္တူဂၠံၚ်လ္ဂုၚ်−မတ်မလီု မၞုံဗ္ဒါဲကွာန်ယှိုဲယျံၚ်ပျ၊ ပွိုၚ်ဍုၚ်ၜဳကလေၚ်ဂှ်ဏီရ။

ပရေၚ်ဖံက်ဗ္တိုဟ်မာၚ်ပလီုပလာ် ဒဒန်ဂျုၚ်အုက်ဂှ်ဝွံ ကၠောန်သ္ပလဝ် သွက်ဂွံထပိုတ် ဂၠံၚ်တရဴထံၚ်ပၚ် ဇွောံမ ဒပ်ကံၚ်ဇြဳပၞာန် လ္ဂောံကဵုပရေၚ်ပၞာန်တံရောၚ်ဂှ် ဂွံတီကေတ် အတိုၚ်တၚ်လလောၚ်တြး ညးတာလျိုၚ်ခရိုၚ်သဓီု KNU ရ။

ပရိုၚ်−သြၚ်လောန်တိုၚ်(မ်)

ဗီု−ချာန်နေဝ်တြးဝါဒကံၚ်ဇြဳပၞာန်