လ္ပာ်ကံၚ်ဇြဳပၞာန်သုၚ်စောဲပၞာန်ရီုက္ၜၚ်ကျာတုဲ ဗတိုက်ဒၟံၚ် ပ္ဍဲပွိုၚ်ဍုၚ်ထာန်တပေန်

ထာန်တပေန် -ဂျူလာၚ်(၈)

ရးဒေသဗဂေါ၊ ပွိုၚ်ဍုၚ်ထာန်တပေန်၊ ပ္ဍဲကွာန်လှေဝ်လာန်ကူ အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA တအ် ပေါဲဗတိုက်က္တဵုဒှ်လဝ် အလုံပွိုၚ်မွဲတ္ၚဲတုဲဂှ် လ္ပာ်ကံၚ်ဇြဳပၞာန် သုၚ်စောဲပၞာန်ရီုက္ၜၚ်ကျာတုဲ ဗတိုက်ပန်ပှော်ဒၟံၚ်ရဂှ် တံဒပ်ကောန်မာန်ဒိုဝ်တၟေၚ် ကရောၚ်ပၞာန်ယိုဝ်မ (၂) ဒေသပၞာန်လ္ပာ် (၂) လလောၚ်တြးလဝ် ပရိုၚ်ရ။ ။

ပ္ဍဲဂိတုဂျူလာၚ် စၟတ်တ္ၚဲ (၆) အခိၚ်နူဂယးပြဟ်တုဲကၠုၚ်တေံဂှ် ဒပ်ကံၚ်ဇြဳပၞာန် ဖံက်ပန်လွဟ်တုဲ လုပ်ကၠုၚ်လဒေါဝ်ကွာန်လှေဝ်လာန်ကူ ဇြဟတ်နွံ (၅၀)ပြၚ်ဂှ် ကြဴနူဒှ်လဝ်ပေါဲဗတိုက် ဆေၚ်မုက်ကဵု ဒပ်ပံၚ်ကောံ KNLA တအ်တုဲဂှ် လ္ပာ်ဒပ်ပံၚ်ကောံတအ် ကာကေန် ဇီုကပိုက်ဒးလဝ်တုဲ ဒးဆုတ်ကလေၚ်တိတ်လဝ်ရဂှ် သ္ဂးလဝ်ရ။

လ္ပာ်ဒပ်ပံၚ်ကောံတအ်ဂှ် အခိၚ်နူဂယး နူ(၈)နာဍဳ ကဵု (၁၁)နာဍဳဂှ် ထောံဖျေံလဝ်ဗုမ် ကဵုဒရုမ်နူဗလး အာကာသတုဲ ဗတိုက်လဝ်ကီု ပ္ဍဲသ္ၚိဒၟံၚ်ပ္ဍဲဗွိုၚ်ရုၚ်ဂဥုဲလှေဝ်လာန်ကူ ဒပ်ကံၚ်ဇြဳပၞာန်ကေတ်လဝ်ဒၞာဲဂှ် လ္ပာ်ဒပ်ပံၚ်ကောံတအ်ပန်ဗတိုက်လဝ် သီုပ္ဍဲဗလးမုက်တိ ကြပ်ပ်ရဂှ် ဂွံတီကေတ်ရ။

အခိၚ်ပေါဲဗတိုက်က္တဵုဒှ်ဒၟံၚ်ဂှ် လ္ပာ်ကံၚ်ဇြဳပၞာန် သုၚ်စောဲက္ၜၚ်ကျာသၞေၚ်ဝဲ Mi-35 တုဲ ကၠုၚ်ပန်ပှော်လဝ် စဵုကဵု (၁၂)ဝါဂှ်ရ ညးဇီုကပိုက်ဒးချိုတ်လဝ်ကဵု ညးဒးလဝ်ဘဲဝပ် လ္ပာ်ကံၚ်ဇြဳပၞာန်တအ်ဂှ် ဂြဲပ္တိတ်ဏာ လဝ်တုဲ ပ္ဍဲအခိၚ်ဒေါဝ်တ္ၚဲလေဝ် ကၠုၚ်ပန်ပှော်လဝ် ကဵုက္ၜၚ်ကျာ (၇)ဝါတုဲ ပ္တိတ်လဝ်ဇြဟတ် သွက်ဂွံ ရီုပ္တိတ် မၞိဟ်ဒးဒုၚ်ကၟာတ်လဝ်ရဂှ် ဓမံက်လဝ် ပ္ဍဲတၚ်လလောၚ်တြးရ။

လ္ပာ်ဒပ်ပံၚ်ကောံ KNLA တအ်ဂှ် အခိၚ်ထပ်ဗတိုက်လဝ်ကောန်ဒပ်ကံၚ်ဇြဳပၞာန် ဒးဒုၚ်ကၟာတ်ဒၞာဒၟံၚ်ဂှ် ကောန်ဒပ်ကံၚ်ဇြဳပၞာန် ၜိုတ်(၃၀) ဂြိပ်တိတ်အာ ပ္ဍဲသၠာတ်ဝါ ဆုတ်တိတ်လဝ်တုဲ အခိၚ်ဒပ်ပံၚ်ကောံ တအ် ဗက်ဗတိုက်လဝ်ဂှ် ဂွံညာတ်ကေတ်ချိုတ်ဒၟံၚ်ရဂှ် ဂွံတီကေတ်ရ။

ပ္ဍဲပရေၚ်ဒဒှ်ပေါဲဗတိုက်ဏံ လ္ပာ်ဒပ်ပံၚ်ကောံတအ် သ္ကိုပ်ဒပ်လ္ပာ်ကောန်မာန်ဒိုဝ် နာန်ဝေဥူ ဒးပြဟ်လလုဲ လဝ် နကဵုဘဲဝပ်လွဟ်မကမ်တုဲ သ္ဂံၚ်ကောန်မာန်ဒိုဝ် ကာကေန်မွဲတၠ၊ ဒုသ္ကိုပ်ဒပ်ကောံ KNLA မွဲတၠကီု သီုကောန်သ္ဂံၚ်မွဲတၠ ဒးလဝ်ဘဲဝပ် ဟွံဒးဒှ်ဓဝိၚ်ရဂှ် ကရောၚ်ပၞာန်ယိုဝ်မ (၂) လလောၚ်တြးလဝ်ပရိုၚ်ရ။

ပရိုၚ်-သြၚ်လောန်တိုၚ်(မ်)

ဗီုရုပ် – ဗီု Mi-35 ကံၚ်ဇြဳပၞာန်ဗတိုက်ပန်ဒၟံၚ်