ပ္ဍဲဍုၚ်ကြုက် ဟိုတ်နူဗြဲရိုပ်ဂူတုဲ မၞိဟ် (၁၅) တၠ ချိုတ်တုဲ သွက်ဂွံပ္တိတ်ဇြဟတ် အစဳဇန်ပရေၚ်စဵုဒၞါတံဂှ် သၟိၚ်တၠအဝဵုကြုက်တံ အာတ်မိက်သမ္မတယှဳ

ဗေကျေန်၊ ဂျူလာၚ် (၇)

ပ္ဍဲဍုၚ်ဇၞော် ဍုၚ်ချံၚ်ကေန် မၞုံဒိုဟ်ဗာယပ်ဍုၚ်ကြုက်ဂှ် ဟိုတ်နူဗြဲရိုပ်ဂူလဝ်တုဲ အပံၚ်မၞိဟ် ၁၅ တၠ ချိုတ်အာလဝ်တုဲ သွက်ဂွံစဵုဒၞါ ညးဍုၚ်ကွာန်ဂမၠိုၚ် နူကဵုရာသဳဥတုအကာဲအရာပရေံဒၟံၚ်ဂှ် သွက်ဂွံကၠောန်သ္ပ ပရေၚ်ပ္တိတ်ဇြဟတ် သၠဲသၠဲလးလးတံဂှ် သမ္မတယှဳကျေန်ဖျေန် အာတ်မိက်လဝ်ရ။

ဟိုတ်နူဗြဲရိုပ်ဂူလဝ်တုဲ ဍာ်ကလိုပ်က္တဵုဒှ်လဝ်တုဲ အပ္ဍဲသတ္တာဟပြဟ်ဟ်ဏံ တိပလေတ်ဗၠိုက် သ္ကဵုမၞိဟ်ချိုတ်မာန်တံ က္တဵုဒှ်လဝ်ရ။

ဍာ်ကလိုပ်ဍာ်ဇၞော် အပ္ဍဲဍုၚ်ချံၚ်ကေန်ဂှ်ဝွံ သ္ၚိဒၟံၚ်ဂၠိုၚ်ကဵုလ္ၚီ၊ ဒဒန်ဂၠံၚ်တံ လီုလာ်လဝ်တုဲ သ္ၚိ ကေုာံ ကွဳစက်ဂမၠိုၚ်တံလေဝ် ဟဳဗက်အာ ကရောံဍာ်ထ္ပက်တံအိုတ်ရ။

ပ္ဍဲဂိတုဂျူလာၚ် (၅) အခိၚ်နူဂယးပြဟ်ဟ်ဂှ် ကရောံမၞိဟ် (၁၅) တၠ ချိုတ်အာဂှ် ဒဒှ်ရ မၞိဟ် (၄) တၠ ကၠေံဒၟံၚ်ဂှ် အေဂျေန်ဇြဳပရိုၚ်သေန်ဟွာ အလဵုအသဳကြုက်ပိုၚ် ဟီုဂးလဝ်ရ။

ဟိုတ်နူဗြဲရိုပ်ဂူလဝ်တုဲ ဘဝပရေၚ်မၞိဟ် လၟိဟ်ၜိုတ်မွဲကိုဋ်ပိဠက်ပြၚ်တံ လီုလာ်အာလဝ်တုဲ သြောံသ္ၚုသတ်ဂန်တံ ၜိုတ် (၇၅၀၀) ဟက်တာပြၚ် လီုလာ်အာလဝ်ရ။

ပ္ဍဲကဵုဍာ်ကလိုပ်ဍာ်ဇၞော် အပ္ဍဲခရိုၚ်ဝန်ဇြိုဝ် မၞုံဒိုဟ်ဨသာန် ချံၚ်ကေန်ဂှ် ပရေၚ်ပိုန်ဒြပ် ဒးဆောံလေၚ်လဝ် စဵုကဵုသြန်ယောန် ၂၂၇ ဒဿမ ၈ မဳလျာန် နွံဂှ် ဌာန်ပရိုၚ်ဗလးရုပ်ရမျာၚ်ကၟိန်ဍုၚ် CCTV ဟီုဂးလဝ်ရ။

သမ္မတကြုက်ယှဳဂှ် ဂီုကၠီုလမျီုဒြပ်ရတ် ညးဍုၚ်ကွာန်ဂမၠိုၚ် သ္ဂောံချိုတ်ပၠိုတ်ဂှ်ဝွံ ဒဒှ်ရဒှ်အကာဲအရာ ဒးကဵုက္ဍိုပ် ကဆံၚ်လ္တူအိုတ်ဂှ် စၞောန်ပ္ညုၚ်လဝ် သၟိၚ်တၠအဝဵုမဆေၚ်စပ်ဂမၠိုၚ်တုဲ သွက်ဂွံသၠုၚ်ပ္တိုန် တၚ်ကဵုသတိ၊ ကောံဓရီုပံၚ်တောဲတံဂှ် ကဵုလဝ်ကသပ် ကုဌာန်ဂအုပ်ပရေၚ်ထိၚ်ဒက်ဍာ်ဇၞော်ဍာ်ကလိုပ် ကေုာံ ပရေၚ်ဟံၚ်ပြာ်ဗြဲဝၚ်၊ ဌာနဝန်ဇၞော် စပ်ကဵုကောပ်ကာဲဖန်ဇန်ဇြဟတ်ဓာတ် ကေုာံ တမ်ရိုဟ်ဍာ်တံရ။

ဌာနဝန်ဇၞော်ပရေၚ်ဘဏ္ဍာ ကေုာံ ဌာနဝန်ဇၞော်ဆက်စပ်တၞဟ်သ္အာၚ်ဂမၠိုၚ်ဝွံ သွက်ချုၚ်ကေန် သ္ဂောံရေၚ်တၠုၚ်ဟံၚ်ပြာ် ဘဲအန္တရာယ်တံဂှ် စၟတ်သမ္တီလလောၚ်တြးလဝ် သြန်ဗွဝ်ကာတၟေၚ် ၃၂၀ မဳလျာန်ယောန်ရ။

အတိုၚ်လိက်ဒုၚ်စဳရေၚ် ဌာန်ပရိုၚ် CCTV ကၟိန်ဍုၚ်ကြုက်ပိုၚ်ဂှ်မ္ဂး နကဵုဌာနဝန်ဇၞော် စပ်ကဵုတမ်ရိုဟ်ဍာ်တံဂှ်လေဝ် သွက်ဂွံကလေၚ်ပၠန် အကာဲအရာဍာ်ဇၞော်ကာတၟေၚ်တံဂှ် ရေၚ်တၠုၚ်ဒၟံၚ်ကမၠောန်တံရောၚ်ဂှ်လေဝ် ဂွံတီကေတ်ရ။

မၞိဟ်ချိုတ်ဂၠိုၚ်တုဲ သီုကဵုအရာမဆောံလေၚ်တံလေဝ် ဂၠိုၚ်လဝ် ပ္ဍဲကဵုဒေသဏံဂှ် ဗြဲရိုပ်ဂူ ဗွဲမသ္ကာတ်မြဟ်ဏောၚ်ဂှ် တုဲကၠုၚ်သတ္တာဟတေံ လလောၚ်တြးလဝ်ရ။

Ref: Straitstimes