မတ်မလီု – ဂျူလာၚ်(၈)
ဗတိုက်သရိုဟ်ကုတ်ဗပိုတ်အာရိုဟ်ကၞက် အလဵုအသဳပၞာန်၊ ဂကောံပၞာန်၊ တၠအဝဵုပၞာန် (ပၞာန်ပိသာ်) နကဵုစိုတ်ဓာတ်လုပ်ပေါဲဗတိုက် သေဝ်ဗေန်ဂျူလာၚ်ရောၚ်ဂှ် ဂကောံသမဂ္ဂကွးဘာ ဆေၚ်ရာအလုံကၟိန်ဍုၚ်ဗၟာ ဗ.က.သ လလောၚ်တြးလဝ်ရ။
ပ္ဍဲဂိတုဂျူလာၚ် စၟတ်တ္ၚဲ (၇) တ္ၚဲဏံဂှ် လလောၚ်တြးလဝ် နဒဒှ်ဂကောံ ဗ.က.သ က္ဍိုက်က္ဍိုပ်တုဲ စၟတ်သမ္တီလုပ် တ္ၚဲလုပ်ပေါဲဗတိုက်သၞောတ်တၠအဝဵုပၞာန် ပိုတ်သ္ကုတ် ပေၚ် (၆၁)သၞာံဂှ်ရ။
ဂကောံပၞာန်ဂှ် ထပ်သီကေတ်လဝ်အဝဵုကၟိန်ဍုၚ် မံက်မံက်ထေၚ်ထေၚ် ဗွဲအဓမ္မ မွဲအလန်ပၠန်တုဲ ညးဍုၚ်ကွာန်တအ်ဂှ် ပ္ဍဲကဏ္ဍစုၚ် မပ္တံကဵုပရေၚ်ပိုန်ဒြပ်၊ ပရေၚ်မၞိဟ်၊ ပရေၚ်ပညာ ယုတ်သဝ်စှ်ေကၠုၚ် နူအခိၚ်ကၠာတေံတုဲ ဒပ်ပၞာန်ဖေတ်သေတ်ကဵု ဆောဗွက်လကြဴတအ်ဂှ် ပလီုပလာ်ပြိုက်ဂစိုတ်ဒၟံၚ် လမျီု သ္ၚိဌာန် ပိုန်ဟာန် ညးဍုၚ်ကွာန်ကောန်ဂကူစုၚ် ဒးဒုၚ်ပ္ဍဵုပ္ဍိုက်ဒၟံၚ်တုဲ က္လိလောန်ဒၟံၚ် ဂဗုတ်ရာဇဝတ်ပၞာန် မံက်မံက်ဂတဝ်ဂတဝ် အရိုဟ်ဒဒှ်တ္ၚဲရဂှ် သ္ဂးလဝ်ရ။
“ဗတိုက်သရိုဟ်ကုတ်ဗပိုတ်ရိုဟ်ကၞက် ဒပ်ပၞာန်ဖေတ်သေတ် ကၠိၚေတ်ဒၟံၚ်ကဵု ထၞဟ်ဆီညးဍုၚ်ကွာန်တအ်တုဲ ဒက်ပ္တန်အာ အဝဵုအာဏာညးဍုၚ်ကွာန်ရောၚ်” ဂှ် ဂကောံ ဗ.က.သ ကဵုလဝ်သမ္တီရ။
သွက်ဗတိုက်သရိုဟ်ကုတ်ဗပိုတ်ရိုဟ်ကၞက် အလဵုအသဳပၞာန်၊ ဂကောံပၞာန်၊ သၞောတ်တၠအဝဵုပၞာန် ဒက်ပ္တန်လဝ်ကဵု ယန္တရာဗျူရောကရေဇြဳပၞာန် (ပၞာန်ပိသာ်)ဂှ် ဒှ်တာလျိုၚ်အလုံညးဍုၚ်ကွာန် ကောန်ဂကူစုၚ် ဒးဒုၚ်ပ္ဍဵပ္ဍိုက်ဒၟံၚ်တအ်ရဂှ် ဓမံက်လဝ် ပ္ဍဲတၚ်လလောၚ်တြးရ၊
ဂကောံ ဗ.က.သဂှ် ဆက်ဂိုၚ်ရပ်လဝ် စိုတ်ဓာတ်သေဝ်ဗေန်ဂျူလာၚ်တုဲ လုပ်အာပေါဲဗတိုက် မွဲကရောံကဵု အလုံညးဍုၚ်ကွာန်မွဲ ဒးဒုၚ်ပ္ဍဵပ္ဍိုက်ဒၟံၚ် စဵုကဵုသၞောတ်တၠအဝဵုပၞာန်(ပၞာန်ပိသာ်) ရိုဟ်ကၞက်ပိုတ် သ္ကာတ်သ္ကာတ်မြဟ်မြဟ်ဏောက်ဂှ် ကဵုလဝ်ကတိရ။
ပရေၚ်ပၠန်ဂတးကွးဘာ စက္တဵုဒှ်လဝ် ပ္ဍဲသၞာံ ၁၉၆၂ ၊ ဂိတုဂျူလာၚ် စၟတ်တ္ၚဲ (၇)ဂှ် ဒှ်ပရေၚ်ပၠန်ဂတးသၞောတ်တၠအဝဵုပၞာန်ဍုၚ်ဗၟာ စလုပ်ကၠုၚ်လဝ်ပေါဲဗတိုက် အလန်ကိုပ်ကၠာအိုတ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – ABSFU
sanlontai