ပ္ဍဲပေါဲဗတိုက်ကျောက်ဂျဳ လ္ပာ်ကံၚ်ဇြဳပၞာန် ဇီုကပိုက်ပြဟ်လလုဲလဝ်ဂၠိုၚ်ဒၟံၚ်

ကျောက်ဂျဳ၊ ဂျူလာၚ်(၈)

ပ္ဍဲပွိုၚ်ဍုၚ်ကျောက်ဂျဳ တိဍာ်ဗော်သွးကောန်ဂကူကရေၚ် KNU ဒပ်မဟာ (၃)ဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA တအ် မွဲတ္ၚဲဓဝ် ပေါဲဗတိုက်က္တဵုဒှ်လဝ် (၃)ဝါတုဲ လ္ပာ်ကံၚ်ဇြဳပၞာန် ပရေၚ်ဇီုကပိုက် ပြဟ်လလုဲလဝ် ဂၠိုၚ်ဒၟံၚ်ရဂှ် တံဒပ်ကောန်မာန်ဒိုဝ်တၟေၚ် ကရောၚ်ပၞာန်ယိုဝ်မ (၂) လလောၚ်တြးလဝ်ရ။

ဂိတုဂျူလာၚ် စၟတ်တ္ၚဲ (၃) အခိၚ်နူဂယး ၜိုတ် (၉) နာဍဳဂှ် ကောန်ဒပ်ကံၚ်ဇြဳပၞာန် စိုပ်ကၠုၚ် ပ္ဍဲအုက်ဖျေတ် တာသုံ(အုတ်ဖြတ်တာဆုံ)၊ ပွိုၚ်ဍုၚ်ကျောက်ဂျဳ၊ ရးဗဂေါဂှ် ဂကောံဒပ်ပံၚ်ကောံ သ္ဂံၚ်နူတံဒပ်ကောန် မာန်ဒိုဝ်တၟေၚ် ကေုာံ KNLA တအ် ဗတိုက်လဝ်ဂှ် လ္ပာ်ကံၚ်ဇြဳပၞာန် ဒးချိုတ်လဝ် (၁)တၠရဂှ် ဓမံက်လဝ် ပ္ဍဲတၚ်လလောၚ်တြးရ။

ပ္ဍဲတ္ၚဲဂှ် အခိၚ်ဇိုၚ်သဝ်တ္ၚဲ ၜိုတ် (၅)နာဍဳ ဂကောံဒပ်ပံၚ်ကောံ KNLA တအ် ထပ်ဗတိုက်လဝ် ဒပ်ကံၚ်ဇြဳပၞာန် စိုပ်ဒၟံၚ်အုက်ဖျေတ်တာသုံ (အုတ်ဖြတ်တာဆုံ) ပွိုၚ်ဍုၚ်ကျောက်ဂျဳ အလန်ဒုတိယတုဲ ကောန်ဒပ်ကံၚ်ဇြဳပၞာန် (၃) တၠ ဒးချိုတ်လဝ်တုဲ ဒးလဝ်ဘဲဝပ် (၂)တၠရဂှ် လလောၚ်တြးလဝ်ရ။

သ္အာၚ်နူဂှ်ပၠန် အခိၚ်ဗ္တံ (၈)နာဍဳကဝက်ဂှ် အကြာဒပ်ကံၚ်ဇြဳပၞာန် တိုန်ကၠုၚ်လ္ပာ်ကွာန်တမာန်ကျေန် ဂတမုက်ဘာဗ္တောန်လိက် ကွာန်ကယျေန်ကျ၊ ပွိုၚ်ဍုၚ်ကျောက်ဂျဳဂှ် ကေုာံ ဒပ်ပံၚ်ကောံ KNLA တအ် ပေါဲဗတိုက်က္တဵုဒှ်လဝ်တုဲ လ္ပာ်ကံၚ်ဇြဳပၞာန် ဒးချိုတ်လဝ် (၈)တၠ ဒးလဝ်ဘဲဝပ် (၇)တၠတုဲ လ္ပာ်ဒပ်ပံၚ်ကောံ တအ် ပရေၚ်ဇီုကပိုက်ဒးဟၟဲ ဗတိုတ်လဝ်မာန်ရဂှ် ဟီုသ္ဂးလဝ်ရ။

ပ္ဍဲပွိုၚ်ဍုၚ်မုမ်၊ ပွိုၚ်ဍုၚ်ထာန်တပေန်၊ ပွိုၚ်ဍုၚ်ယှိုဲကျေန်၊ ပွိုၚ်ဍုၚ်ဖျူ၊ ပွိုၚ်ဍုၚ်ညံၚ်လေဝ်ပေန်၊ ပွိုၚ်ဍုၚ်ကျောက်ဂျဳ မၞုံပ္ဍဲရးဗဂေါဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA တအ် ပေါဲဗတိုက် ဆေၚ်မုက် က္တဵုဒှ်ဒၟံၚ်ကြပ်အရိုဟ်ဒဒှ်တ္ၚဲတုဲ လ္ပာ်ကံၚ်ဇြဳပၞာန် ပရေၚ်ဇီုကပိုက်ဒးချိုတ်လဝ် ဂၠိုၚ်ဒၟံၚ်ရဂှ် တမ်ရိုဟ်တၚ်ဂၞၚ်ပရိုၚ်တအ် ဟီုသ္ဂးလဝ်ရ။

ဒပ်ကံၚ်ဇြဳပၞာန် ဒးဂိလဝ်ဂှ် ပ္တဝ်လဝ်ကဵု ကောန်အရာပ်ညးဍုၚ်ကွာန်တအ်တုဲ ဟိုတ်နူပန်ဖျေံလွဟ်ဇၞော် ဍောတ် ပ္ဍဲကွာန် မၞုံတိဍာ် KNU ဒပ်မဟာာ (၃)တုဲ ပရေၚ်ကောန်အရာပ်ညးဍုၚ်ကွာန် ပါလုပ် သီုညးဗြဴ ကေုာံကောန်ၚာ်သၟတ်တအ် ဇီုကပိုက်ဒးချိုတ် ဂွံလဝ်ဘဲဝပ်နွံတုဲ သ္ၚိဒၟံၚ်စမြိုၚ်တအ်လေဝ် ဇီုကပိုက် ဒးလီုလာ်လဝ်နွံရ။

ပ္ဍဲခရိုၚ်ညံၚ်လေဝ်ပေန် တိဍာ် ဗော်သွးကောန်ဂကူကရေၚ် KNU ဒပ်မဟာ (၃)ဂှ် ဟိုတ်နူအကာဲအရာ ပၞာန်တုဲ သွက်ညးဒးဂြိပ်ဒဴပါဲဓလေတ်ဘဲပၞာန် ဆက်နွံဒၟံၚ်ပၟိက် အရီုဗၚ်ဗ္စာရဏာပရေၚ်မၞိဟ်ဖိုဟ်ဏီရဂှ် ဂွံတီကေတ် နူဂကောံပရေၚ်မၞိဟ် ရီုဗၚ်ဒၟံၚ်ညးပါဲဘဲပၞာန်တအ်ရ။

ပရိုၚ်-သြၚ်လောန်တိုၚ်(မ်)

ဗီုရုပ် – တံဒပ်ကောန်မာန်ဒိုဝ်တၟေၚ် ကရောၚ်ပၞာန်ရိုဝ်မ (၂)