ဟိုတ်နူပရေၚ်ကယျာန်ဓဝါန် ပေါဲရုဲမာဲတွဵုရးတုဲ ပ္ဍဲအိန္ဒိယ မၞိဟ် ချိုတ်အာ (၇) တၠ

ကာလကာတ္တာ၊ ဂျူလာၚ် (၉)

အပ္ဍဲအခိၚ်ကာလစန်ဒက်မာဲ ပ္ဍဲပေါဲရုဲမာဲဏံဂှ် ပ္ဍဲကဵုပလိုတ်ဗာန်ဂဝ် ဍုၚ်အိန္ဒိယဂှ် စပ်ကဵုပေါဲရုဲမာဲ ဒေသန္တရတုဲ ဟိုတ်နူက္တဵုဒှ်သၞဂှ်ရ မၞိဟ် (၇) တၠ ချိုတ်အာတုဲ ဂၠိုၚ်ကဵုဒါဇြိန် ကလိဂွံလဝ်ဝပ်ရောၚ်ဂှ် ဂွံတီကေတ်ရ။

ပွမက္တဵုဒှ်သၞ နူကဵုပရေၚ်ကယျာန်ဓဝါန် ပေါဲရုဲမာဲသာ်ဏံမွဲကဆံၚ်ဂှ်ဝွံ က္တဵုဒှ်လဝ် ပ္ဍဲကဵုဂျူလာၚ် (၈) တေံတုဲ အလဵုအသဳအိန္ဒိယကဵု ဗော်ဂွံအဝဵု Bharatiya Janata Party (BJP) ဂှ်ဝွံ သွက်ဂွံဂွံပရေၚ် ထံက်ဂလာန်ညးဍုၚ်ကွာန်တံ ပ္ဍဲကဵုပလိုတ်ဗာန်ဂဝ်ဂှ် အပ္ဍဲပွိုၚ်ထပှ်သၞာံဏံ ဂ္စါန်ဒၟံၚ်တၟာဂလိုၚ်ရောၚ် မဒှ်ရ။

ဒေသဂှ်ဝွံ ရံၚ်အာဝၚ်မ္ဂး ဒှ်ဒၟံၚ်ဒေသဗော်ကောန်မျူနေတ်မွဲဓဝ် အုပ်ဓလီုလဝ်လေဝ် မဒှ်ရ။

လၟိဟ်မၞိဟ် ၁၀၄ ပြကောဋိကိုဋ်ပြၚ် သွက်တွဵုရးမွဲဂှ်ဝွံ ဒးရုဲစှ်အာ က္ဍိုပ်သ္ကိုပ်မျူနဳသပေဝ် ပ္ဍဲကဵုညးစၞး မၞုံ ၂ ကိုဋ်ပြၚ်ဂှ်ဏောၚ် မဒှ်ရ။

စပ်ကဵုပရေၚ်က္တဵုဒှ်သၞဂှ်တုဲ ဂကောံဒပ်ဗၠာဲသၟိၚ်ဗာန်ဂဝ်ပလိုတ် ဟီုကဵု ဌာန်ပရိုၚ် AFP ဂှ် ပ္ဍဲကဵုကွာန်ဗွဲမဂၠိုၚ် ဂၠေၚ် အလုံတွဵုရးမွဲဂှ် ဟိုတ်နူပရေၚ်ပကီုပရာပ် မဆက်စပ်ဒၟံၚ်ကဵုပေါဲရုဲမာဲဂှ်တုဲ မၞိဟ် (၇) တၠ ချိုတ်အာလဝ်တုဲ ဂၠိုၚ်ကဵုဒါဇြိန် ကလိဂွံလဝ်ဝပ်ရောၚ် ဂွံတီကေတ်ရ။

ပရိုၚ်တမ်ရိုဟ်မွဲတၠ ဟွံမံက်ထ္မံက်ယၟုဂှ်လေဝ် ပ္ဍဲကဵုမၞိဟ်ချိုတ်အာဂမၠိုၚ် (၅) တၠဂှ်ဝွံ ဒဒှ်ရနူကဵုဗော်ဂွံ အဝဵုတွဵုရး Trinamool Congress Party ဂှ်တုဲ သှ်ေၜါတၠဂှ် နူကဵုဗော် BJP မဒှ်ရောၚ် သ္ဂးရ။

လၟေၚ်ဒဒှ်ဝွံ ဆက်စပ်ကဵု ဗော်ကောန်မျူနေတ် ဗာန်ဂဝ်ပလိုတ်အိန္ဒိယမာန်ရောၚ်ဂှ်လေဝ် ညးဆက်ဟီုလဝ်ရ။

လောန်ကၠုၚ်ၜိုတ်ပိစှော်သၞာံတေံ က္ဍိုပ်သ္ကိုပ်ဗော် Trinamool, Mamata Banerjee ဂှ် ကေတ်ဇၞးပရေၚ်အုပ်ဓုပ် နူကဵုကောန်မျူနေတ်မသ္ကိုပ်သ္ကဂှ်တုဲ အုပ်ဓုပ်ကၠုၚ်လဝ် ဗာန်ဂဝ်ပလိုတ် နူကဵုသၞာံ ၂၀၁၁ တေံရ။

အပ္ဍဲသၞာံ ၂၀၂၁ အပ္ဍဲပေါဲရုဲမာဲတွဵုရး ဗာန်ဂဝ်ပလိုတ်ဂှ် နူကဵု Trinamool လေဝ် ဂွံဇၞးလဝ်ဗွဲမဂၠိုၚ်ဂၠေၚ်တုဲ နူကဵု BJP လေဝ် ဇြဟတ်ခိုဟ်လဝ်တုဲ ညးချဳဒရာၚ်ကတိုၚ်ကၟဟ် နူကဵုသီုၜါဗော်တံဂှ်ဝွံ ဒးဒုၚ်ပန်ဂစိုတ် ကဵုသေနာတ် ဟွံသေၚ်မ္ဂး ဒးဒုၚ်ကၠတ်ကၠံက်တုဲ နဒဒှ်နဲကဲဘပဠတၟိ ဒက်ဂစိုတ်ကအ် ပ္ဍဲကဵုတၞံဆုတံတုဲ ဒးဒုၚ်ဂစိုတ်ဂယိုၚ်ဒၟံၚ်ညးသ္ကအ်ရ။

Ref: AFP