ပ္ဍဲပွိုၚ်ဍုၚ်ရေဝ် ကံၚ်ဇြဳပၞာန်ပတေၚ်ဓရတ်လဝ်ပရေၚ်ဂီုကၠီုဂှ်ရ ညးဒေသတံဒးဂဗမံၚ်အခက် 

ရေဝ်၊ ဂျူလာၚ်(၉) 

အပ္ဍဲပွိုၚ်ဍုၚ်ရေဝ်၊ တွဵုရးဍုၚ်မန် လလောၚ်တြးလဝ်ပရေၚ်အုပ်ဓုပ်ပၞာန်ဂှ် သ္ပပ္တံနူဂိတုဂျောန် သတ္တဟလက်ကရဴအိုတ်တုဲကၠုၚ်တေံတုဲ အဖဝ်ပေါဲဗ္တိုက်ၜါလ္ပာ်တံဂှ် ပရေၚ်ပၞာန်သာတုဲကြံၚ်မ္ၚိုဟ်ကၠုၚ်လဝ်တုဲ ကံၚ်ဇြဳပၞာန်တံ ပတေၚ်ဂြတ်ကၠုၚ်လဝ်ပရေၚ်ဂီုကၠီုရဂှ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်(မ်)ရ။ 

အကြာဒပ်ပၞာန်ဗၠးၜးကောန်ဂကူကရေၚ် KNLA မပါလုပ် ကရောၚ်ပၞာန်ပံၚ်တောဲ ဂကောံဇြဟတ်ပၠန်ဂတးတံကဵု ဒပ်ကံၚ်ဇြဳပၞာန်တံဂှ် သ္ပပ္တံနူဂိတုဂျောန် စၟတ်တ္ၚဲ ၂၅ တေံတုဲ ပရေၚ်ပန်ပှော်ၜါလ္ပာ် က္တဵုဒှ်လဝ်အဆက်ဟွံပိုတ်သ္ကုတ်တုဲ လ္ပာ်ကံၚ်ဇြဳပၞာန်တံ မ္ၚးနူလွဟ်ဇၞော်ဂှ် ပွဗ္တိုက်တရဴကျာတံဂှ်လေဝ် ကၠောန်သ္ပလဝ်ရ။ 

ပ္ဍဲအကာဲအရာဏံဂှ် ဟိုတ်နူဒးဂွိၚ်မံၚ်ကဵု ပရေၚ်ဂီုကၠီုတိဍာ်ဂှ်ရ ဒပ်ကံၚ်ဇြဳပၞာန်တံ ရုၚ်ဌာနဆေၚ်စပ် မၞုံပ္ဍဲဍုၚ်ခေါဇာ ကေုာံ ဍုၚ်လၟိုၚ် နွံပ္ဍဲပွိုၚ်ဍုၚ်ရေဝ်တံဂှ် ရုပ်သီကၠုၚ်သိုက်က်အိုတ်ရ။ 

မွဲလ္ပာ်ပၠန်ဂှ်တှ်ေ ကံၚ်ဇြဳပၞာန်တံ ဟိုတ်နူပတေၚ်ဓရတ်လဝ်ပရေၚ်ဂီုကၠီုတံဒၞါဲစုၚ်ကီု၊ ပန်ပှော်လွဟ်ဇၞော်ပ္ဍဲကွာန်ကြာန်န်တံ မွဲဏှမွဲဏှကီုဂှ်ရ စနူကဵုပရေၚ်အာကၠုၚ်တံဂှ် ဒးဂဗကၠုၚ်မံၚ်အခက်ရဂှ် ညးဒေသဍုၚ်ရေဝ်မွဲတၠဂှ် ဟီုရ။ 

“ဍေံတံဂှ် စွံအဓိကကဵုပရေၚ်ဂီုကၠီုတုဲ ဒးအုပ်ဓုပ်မံၚ်ရ၊ သ္ပပ္တံနူလလောၚ်တြးပရေၚ်အုပ်ဓုပ်ပၞာန်တုဲဂှ် လ္ပာ်ပရေၚ်ဖောအ်ဗြေဝ် ဇြဟတ်ဍိုန်ကၠုၚ်ရ။ ပရေၚ်ဆက်စၠောံလ္ပာ်ဂၠံၚ်ဂှ်လေဝ် ဟွံပြေပြံၚ်ရပုဟ်။ ရုၚ်ဌာနဆေၚ်စပ်တံ သ္ဇက်ဂွံအာကၠုၚ်ဂှ် ခက်ခုဲကၠုၚ်ရ။ ဗီုကၠာတေံဟွံသေၚ်ရတုဲ ပရေၚ်တာဒၞါတံ ဂၠိုၚ်ကၠုၚ်ရ။ ညးမံၚ်လ္တူဍုၚ်တံကီု၊ ညးမံၚ်ပ္ဍဲကွာန်တံကီု လ္ၚဵုတံဂှ် ကၠောန်ကိစ္စရုၚ်တှ်ေ အခက်အခုဲတံနွံကၠုၚ်ရ။ ဍေံတံလေဝ် ပတေၚ်ဓရတ်ကၠုၚ်ပရေၚ်ဂီုကၠီုဂှ်ရ ညးအာဍုၚ်သ္အာၚ်တံ သၟတ်တံဂှ် ကိစ္စ Passport တံ ကိစ္စ လ.ဝ.က တံဂှ် ဒှ်ကၠုၚ်အခက်အခုဲရ”ဂှ် ညးသ္ဂးရ။ 

အပ္ဍဲပွိုၚ်ဍုၚ်ရေဝ် အဖဝ်ပရေၚ်ဂီုကၠီုတေၚ်ဂြတ်မံၚ်တံဂှ် ပရေၚ်တိဍာ်လေဝ်ဟွံၜိုဟ်သြိုဟ်ဂှ်ရ ညးသြန်လှုဲမာန်တံဂှ် ဆုဲပြံၚ်မံၚ်ကၠုၚ် ပ္ဍဲဍုၚ်ဇၞော်တံတုဲ လ္ပာ်ပရေၚ်ပညာတံဂှ်လေဝ် မ္ၚးနူဍုၚ်သ္အာၚ်ဂှ် ပြံၚ်စွံကၠုၚ် ပွိုၚ်ဍုၚ်တၞဟ်ဟ် မၞုံပ္ဍဲတွဵုရးတံရဂှ် ဂွံတီကေတ် အတိုၚ်လဟီု ရဲဍုၚ်တံဂှ်ရ။ 

သ္ပပ္တံနူဂိတုဂျောန် စၟတ်တ္ၚဲ ၁၈ တေံတုဲ မွဲဒမြိပ်ဂၠံၚ် စၟတ်(၈) မတ်မလီု-ရေဝ်-ထဝါဲဂှ် ဒပ်ပၞာန်ဗၠးၜးကောန်ဂကူကရေၚ် KNLA မပါလုပ် ကရောၚ်ပၞာန်ပံၚ်ကောံ ဂကောံဇြဟတ်ပၠန်ဂတးတံ စကၠောန်သ္ပလဝ် ပရေၚ်ထိၚ်ဒဝ်တိဍာ်တံရ။ 

ဂကောံဒပ်ပံၚ်ကောံတံ လ္ဂောံကဵုပရေၚ်ဂီုကၠီုကဵု ပရေၚ်အုပ်ဓလီုတိဍာ်တံတုဲ လ္တူမကၠောန်သ္ပကၠုၚ်ပရေၚ်စၟဳတ်တံဂှ် လ္ပာ်ကံၚ်ဇြဳပၞာန်တံ သ္ပပ္တံနူဂိတုဂျောန် စၟတ်တ္ၚဲ ၂၀တေံတုဲ နူကဵုဒပ်အမၠံက်ဂှ် စပန်ပှော်ကၠုၚ်နကဵုလွဟ်ဇၞော်တုဲ ဒတုံဗ္တိုဟ်လဝ် ပ္ဍဲကၠအ်ထၜိုတ်ရ။ ညးဒေသဍုၚ်လၟိုၚ်မွဲတၠဂှ်လေဝ် ဟိုတ်နူပွပန်ပှော်လွဟ်ဇၞော်ဒပ်ကံၚ်ဇြဳပၞာန်တံတုဲ ပရေၚ်အာကၠုၚ်တရဴတံကဵု ပရေၚ်လုပ်ဝၚ်ကမၠောန်တံဒှ်တံ ဒးဂွိၚ်ဂွါဲမံၚ်ရဂှ် ဟီုကဵုဌာန်ပရိုၚ်သြၚ်လောန်တိုၚ်(မ်)ရ။ 

” အာလ္ပာ်မတ်မလီုကဵုဒှ် အာလ္ပာ်ဇြပ်ဗုကဵုဒှ် အကြာဂှ် အဃောအာဂှ် ဖေက်ပေါဲဗ္တိုက်ဒှ်လေဝ် ဒးဖေက်။ ပ္ဍဲအကြာဂှ် ဂွိၚ်ဖေက်ဍေံတံပန်ကွဳစက်ညးဍုၚ်ကွာန်ဂှ်လေဝ် ဒးဂွိၚ်။ အရာရာအိုဿီု ဒးဂွိၚ်မံၚ်ဖအိုတ်ရ။ ကိုပ်ကၠာဂွိုအ်လုပ် ပွိုၚ်ဍုၚ်ဇြပ်ဗုဂှ်မ္ဂးတှ်ေ အခိၚ်အာဒၞါဲဂှ်တှ်ေ ညးဍုၚ်ကွာန်တံ သီုဒးဖ္ဍောတ်မံၚ်ဂါထာရ” ဂှ်ညးသ္ဂးရ။ 

တုဲကၠုၚ်ပ္ဍဲဂိတုဂျောန် စၟတ်တ္ၚဲ ၂၅ဂှ်လေဝ် ပွိုၚ်ဍုၚ်ရေဝ် ကွာန်သၞေဟ်ခရေၚ် နွံဗ္ဒါဲဗ္စပ်က္ၜဳဂှ် ဂကောံဒပ်ပံၚ်ကောံတံ လုပ်စိုပ်ဍိုက်ဗ္တိုက်လဝ်တုဲ ကံၚ်ဇြဳပၞာန်တံ ကလေၚ်ပၠန်လဝ်ကဵုတရဴကျာဂှ်ရ ညးဒေသသၞေဟ်ခရေၚ်တံ ဇီုကပိုက်ချိုတ်တံလေဝ် နွံလဝ်ရ။ 

ဗွဲကြဴဏံ ဒပ်ကံၚ်ဇြဳပၞာန်တံ ကၠုၚ်စိုပ်ဖျေံလဝ်ဗ္ဒိုပ် ပ္ဍဲဘာလကျာ် ကွာန်သၞေဟ်ခရေၚ်တုဲ နကဵုတၚ်စောတ်စောဲ ညးဒေသတံ ဆက်စပ်မံၚ်ကဵု ဂကောံဒပ်စဵုဒၞါညးဍုၚ်ကွာန် PDFတံသ္ဂးတုဲ ညးဍုၚ်ကွာန်ကောန်အရာပ် ၁၅တၠဂှ် ခြာကဵုတ္ၚဲတုဲ ရပ်ဒက်မံၚ်ရဂှ် ဂွံတီကေတ် နူဇရေၚ်ညးဒေသတံရ။ 

ကြဴနူဒပ်ပၞာန်သီအဝဵုတုဲ တမ်ဒပ်ကံၚ်ဇြဳပၞာန်၊ ဗ္ဒိုပ်ဒပ်ကဵု ရုၚ်ဌာနဆေၚ်စပ် မၞုံအပ္ဍဲပွိုၚ်ဍုၚ်ရေဝ် ဒးဒုၚ်လလောၚ်တြးလဝ်ပရေၚ်အုပ်ဓုပ်ပၞာန်တံ ဒးဒုၚ်ဗ္တိုက်မံၚ် မွဲဏှမွဲဏှတုဲ တိဍာ်လ္ၚဵုတံဂှ်လေဝ် ဂကောံဇြဟတ်ပၠန်ဂတးတံ ထိၚ်ဒဝ်မာန်ကၠုၚ်လဝ် မဒှ်ရ။ 

ပရိုၚ်-သြၚ်လောန်တိုၚ်(မ်) 

ဗီု-TLT