ပ္ဍဲဍုၚ်မလေဝ်ယှာ ကြဴနူဂွံဆဵုကေတ် ကောန်ၚာ်သၟတ်မွဲတၠ စောဲလာမ်မံၚ်ဂဥုဲၜူမာဲတုဲဂှ် ရပ်ဒက်ဏာလဝ် မိယာဲကောန်ၚာ်ဂှ်

ကွာလာလာမ်ပူ၊ ဂျူလာၚ် (၁၄)

ပ္ဍဲဍုၚ်မလေဝ်ယှာ ကြဴနူစမ်ၜတ်ဂွံဆဵုကေတ် လက္ချန်ဂဥုဲၜူမာဲ ပ္ဍဲကောန်ၚာ်သၟတ်မွဲတၠ ပ္ဍဲကဵုရုၚ်ဂဥုဲထိုၚ်ပေန် မၞုံတွဵုရးပဳနာန်ဂှ်တုဲဂှ် ရပ်ဒက်လဝ် မိယာဲကောန်ၚာ်ဂှ်တုဲ စဒၟံၚ် ပရေၚ်ဂၠိုက်ဂၠါဲစၟဳတ်တံယျဂှ် ဂကောံဒပ်ဗၠာဲသၟိၚ်တံ ဟီုဂးလဝ်ရ။

ကောန်ၚာ်သၟတ်ဂှ် ဂွံအာယုက်မွဲသၞာံကဵု စှ်ဂိတုညိဏီတုဲ အခိၚ်မိယာဲကောန်ၚာ်ဂှ် ကၠုၚ်ထ္ၜးရုၚ်ဂဥုဲ ကုကောန်ၚာ်ဂှ် ဂွံဆဵုကေတ်လဝ်သာ်ဏံရောၚ်ဂှ် ဇၞော်သ္ကိုပ်ဂကောံဒပ်ဗၠာဲသၟိၚ်ခရိုၚ်ထိုၚ်ပေန် ဟီုဂးလဝ်ရ။ အကာဲအရာပရေၚ်ထတ်ယုက်ကောန်ၚာ်ဂှ်ဝွံ က္တဵုဒှ်လဝ် စဵုကဵုထိၚ်ဒက်ဟွံဂွံဂှ်လေဝ် ဟီုဂးလဝ်ရ။

ကၠာဂွိုအ်ဒှ်ပရူဂှ် ညးမဒှ်မိ အာယုက် ၂၂ သၞာံဂှ် အခိၚ်မအာဆေၚ်ပဠောံ ဗ္ဒါဲဂှ်ဂှ် ပလံၚ်လဝ်ကောန်ၚာ်ဂှ် သ္ၚိမိဇၞော်ဍေံရောၚ် သ္ဂးလဝ်တုဲ ကာလကောန်ၚာ်ဂှ် မိက်ဂွံတိက်ဂှ် လရိုဟ်ယာံတုဲ က္တဵုဒှ်လဝ် အကာဲအရာထိၚ်ဒက်ဟွံမာန်ရ။

ကြဴနူဂှ်တုဲ ပလံၚ်ဏာလဝ်ကောန်ၚာ်ဂှ် ပ္ဍဲရုၚ်ဂဥုဲတုဲ လ္ဂောံကဵုအတိုၚ်မစၟဳတ်ဂွံလဝ်ဂှ်မ္ဂး ဒဒှ်ရကောန်ၚာ်ဂှ် ဒးဒုၚ်ဗ္စလဝ် ဂဥုဲလရုစိုတ်ကဵု အာမ်ဖဳတမေန်ဂှ် စမ်ၜတ်ဂွံဆဵုကေတ်လဝ်ရောၚ် ဂကောံဒပ်ဗၠာဲသၟိၚ်တံ ဟီုဂးလဝ်ရ။

ဗွဲကြဴဂှ် အ္စာဂဥုဲဂှ် ကဵုပရိုၚ် ဇရေၚ်ဂကောံဒပ်ဗၠာဲသၟိၚ်တံတုဲဂှ် ပံက်လဝ်ဂဗုတ် နကဵုသၞောတ်အက်ဥပဒေ Section 31 (1) (a) ဂှ်လေဝ် ဂွံတီကေတ်ရ။ ကြဴနူရပ်ဒက်မိယာဲကောန်ၚာ်ဂှ်တုဲဂှ် အတိုၚ်စၟတ်သမ္တီစမ်ၜတ်လဝ်ဂဥုဲဂှ်မ္ဂး ညးဝွံလေဝ် သုၚ်စောဲလဝ် ဂဥုဲၜူမာဲဂှ် ဂွံတီကေတ်ရ။

နကဵုဂကောံဒပ်ဗၠာဲသၟိၚ်တံ သွက်ဂွံရေၚ်တၠုၚ် ပရေၚ်ဂၠိုက်ဂၠါဲချိုတ်တ်ပၠိုတ်တ်မာန်ဂှ် ယဝ်ရတီကေတ်လဝ် ပရူပရာ၊ ပရိုၚ်ဏံမ္ဂးလေဝ် သွက်ဂွံကဵုပရိုၚ်ညးသ္ကအ်မာန်ဂှ် အာတ်မိက်လဝ်ရ။

Ref: The Star/ ASIA NEWS NETWORK