“ပ္ဍဲပိုဲ သွာၚ်ခက်ခုဲဝါတ်ဂါတ်အိုတ်ဂှ် ယဝ်ရဒးဟီုတှ်ေ ဒှ်သွာၚ်စဵုဒၞာကဵု သွာၚ်စဳရေၚ်သၞောဝ်ဓဝ်ရ”

ကံၚ်ဇြဳဖေတ်ဒရေဝ်ဍုၚ်မန် (MSFC) ကလေၚ်ဒက်ပ္တန်လဝ် နူကဝ်မတဳရေၚ်တၠုၚ်ကေၚ်ကာဍုၚ်မန်ကာလအကြာဂှ် စဓမံက်ဒၟံၚ်ရုပ်ရဴလၟေၚ်ကမၠောန်ကဏ္ဍ (၁၀)ကဏ္ဍ နူသၟဝ်ကဝ်မတဳချူဓဇက်သၞောဝ်၊ စဳရေၚ်သၞောဝ်ဓဝ် ကေုာံ ကဝ်မတဳပရေၚ်အုပ်ဓုပ်ရ။

ဟိုတ်ဂှ်ရ စပ်ကဵုအကာဲအရာဓမံက်ရုပ်ရဴ ပရေၚ်ချူဓဇက်သၞောဝ်၊ စဳရေၚ်သၞောဝ် ကေုာံပရေၚ်အုပ်ဓုပ်ကီု၊ အခက်ခုဲ ဒးဆေၚ်ဒၟံၚ်မုက်ကီု၊ ပရေၚ်ပံၚ်တောဲရေၚ်တၠုၚ်ကၠောန်ဒၟံၚ် မွဲကရောံကဵု အလဵုအသဳပရေၚ်ညဳသၟဟ်ကောန်ဂကူ (NUG)တုဲ ဆက်စၠောံသၟာန်လဝ်ကဵု ညးလုပ်ဂကောံကံၚ်ဇြဳဖေတ်ဒရေဝ်ဍုၚ်မန် (MSFC) နာဲထဝ်ရတ်ရ။

၁။ ကၠာအိုတ်ဏံ နကဵု MSFC ပ္ဍဲကဵုလၟေၚ်ကမၠောန် (၁၀)ဂကူဂှ် တၚ်လဵု ဓမံက်ဒၟံၚ်ရုပ်ရဴ ၜိုတ်ဂလိုၚ်လဵုရရော။ ပ္ဍဲအရာဓမံက်ရုပ်ရဴဂှ် အခက်ခုဲဗီုလဵု နွံရော။

ပ္ဍဲကဵုကောံဓရီုကံၚ်ဇြဳ ကၠောန်ဗဒှ်ဒၟံၚ် လၟေၚ်သတ္တာဟဂှ် ပ္တိုန်ထ္ၜးလဝ် တၚ်ကၠောန်ရေၚ်တၠုၚ်လဝ် နွံရ။ ပ္ဍဲကဵုကောံဓရီုကမ္မတဳပိတန် လၟေၚ်သတ္တာဟဂှ်လေဝ် ဗက်ကဵုကဝ်မတဳတုဲ ကၠောန်လဝ် နွံရ။ ပ္ဍဲကဵု (၁၀) ဌာနဂှ်တှ်ေ ဌာနကမၠောန်လ္ၚဵုတအ်ဂှ် စကၠောန်ရေၚ်တၠုၚ်ဒၟံၚ်ဂှ် နွံရ။ ဌာနပ္ဍဲပိုဲဂှ် ပ္ဍဲကမၠောန်ဂှ်တှ်ေ ဗက်ကဵုဌာနမဆေၚ်စပ်တုဲ ပိုၚ်ခြာလဝ်နွံဒၟံၚ်ဂှ်ရ လၟေၚ်ကမၠောန်လ္ၚဵုဂှ် ဌာနလးထ္ၜးကဵု ကၠးကၠးပ္ဍးပ္ဍးဟွံဂွံလေဝ် နွံရ။ ကမၠောန်လ္ၚဵုဂှ် အကာဲအရာလးထ္ၜးကဵုဂွံ နွံ။ မိက်ဂွံကဵုကၠိုဟ်ကေတ်လ္တူပိုဲရ။ ဌာနလၟေၚ်ကမၠောန် ဗ္ဂေတ်ဂွံဒၟံၚ်လၟုဟ်ဂှ်တှ်ေ ပရေၚ်ပညာ၊ ပရေၚ်ထတ်ယိုတ်၊ လလောၚ်ပရိုၚ်ကဵု လၟေၚ်ကမၠောန် အရီုဗၚ်ဗ္စာရဏာပရေၚ်မၞိဟ်တအ်ရ နွံဒၟံၚ်။ ဌာနပရေၚ်ဆက်ဆောံသွာၚ်မ္ၚးဂှ် ညံၚ်ဂွံဗ္ဂေတ်အာကမၠောန်မာန် ဃောကေတ်ဒၟံၚ်ဇြဟတ်ဖိုဟ်ရ။ ညးလုပ်ဂကောံ ပါလုပ်ဒၟံၚ် ပ္ဍဲဌာနတအ်လေဝ် တၚ်ညးတအ်ကၠောန်ရေၚ်တၠုၚ်လဝ်ဂှ် ပ္တိုန်ထ္ၜးလဝ် ပ္ဍဲကောံဓရီုဌာနဂှ်တှ်ေ နွံဒၟံၚ်ရ။

၂။ တုဲပၠန် ပ္ဍဲကဏ္ဍပရေၚ်စဵုဒၞာကဵု စဳရေၚ်သၞောဝ်ဓဝ် သွက်ဂွံဓမံက်ရုပ်ရဴဟီုတှ်ေ လ္ပာ်ဂကောံဇြဟတ်ပၠန်ဂတးတအ် ၜိုတ်ဂလိုၚ်လဵု ပါလုပ် ဗပေၚ်လဝ်ဇြဟတ်မာန်ယျရော။ အခက်ခုဲဗီုလဵု နွံဒၟံၚ်ရော။

ပ္ဍဲပိုဲ သွာၚ်ခက်ခုဲဝါတ်ဂါတ်အိုတ်ဂှ် ယဝ်ရဒးဟီုတှ်ေ ဒှ်သွာၚ်ပရေၚ်စဵုဒၞာကဵု သွာၚ်စဳရေၚ်သၞောဝ်ဓဝ်ရ။ သတ္တာဟတုဲကၠုၚ်တေံ ပ္တိုန်ထ္ၜးလဝ် နွံရ။ အတိုၚ်ဟီုလဝ် သတ္တာဟကၠာတေံဂှ်ရ။ ပ္ဍဲကဵုတွဵုရးပိုဲဂှ် ယဝ်ရဒးပ္တဝ်ရံၚ်ကဵု ဒေသတၞဟ်ဏောၚ်တှ်ေ ဂကောံပါလုပ်ဒၟံၚ် ပ္ဍဲပၠန်ဂတးက္ညၚ်ဏံဂှ် အကာဲအရာတွဵုရးပိုဲ စန်ပကောံဟွံမာန်ရ။ ပရေၚ်ထိၚ်ဒဝ်အုပ်ဓုပ်တိဍာ်ဟၟဲဂှ်ရ သွာၚ်စဳရေၚ်သၞောဝ်ဓဝ်ဂှ် ဒးကုတ်ဗပိုတ်ထောံလဝ်ပေၚ်ၚ် ဟီုစမာန်ရ။

၃။ အခိၚ်လၟုဟ်ဏံရော နကဵု MSFC ပံၚ်တောဲကဵု ဂကောံဇြဟတ်ပၠန်ဂတးပါလုပ် သီုအလဵုအသဳပရေၚ်ညဳသၟဟ်ကောန်ဂကူ NUG တုဲ ဗီုပြၚ်လဵု ကၠောန်ရေၚ်တၠုၚ်ဒၟံၚ် နွံရော။

ပ္ဍဲအလဵုအသဳပရေၚ်ညဳသၟဟ်ကောန်ဂကူ NUG ဂှ် နူညးလုပ်ကံၚ်ဇြဳ MSFC ဂှ် ဝန်ဇၞော်ကၟိန်ဍုၚ်မွဲတၠကီု ဒုဝန်ဇၞော်ၜါတၠ ပံၚ်တောဲ ကၠောန်ရေၚ်တၠုၚ်ဒၟံၚ်ရ။ သွာၚ်ညးတအ်ပါလုပ်ပံၚ်တောဲရေၚ်တၠုၚ်ဒၟံၚ်ဂှ်တှ်ေ နကဵုကံၚ်ဇြဳပိုဲ ပါလုပ်ပြံက်စောန် ဟၟဲပုဟ်။ တၚ်ဝန်ဇၞော်တအ် ကၠောန်ရေၚ်တၠုၚ်လဝ် ဗွဲခမ္ဍန်ဂှ်တှ်ေ ကံၚ်ဇြဳဂှ် သောၚ်ကလးကဵု သောၚ်ၚ်ကၠးကၠးတုဲ ပရေၚ်ပံၚ်တောဲကၠောန်ရေၚ်တၠုၚ် နွံပၟိက်ဂှ် သဳကၠဳ ပ္ဍဲကံၚ်ဇြဳတုဲ လၟေၚ်ကမၠောန်နွံပၟိက်တအ်ဂှ် သဳကၠဳ ပ္ဍဲကံၚ်ဇြဳတုဲ ပံၚ်တောဲကၠောန်ရေၚ်တၠုၚ်ဒၟံၚ်ရ။

၄။ အလန်လကြဴအိုတ်ဏံ ကိစ္စကိုန်စဳမာန် သၞေဟ်က္ၜၚ်ကျာကဵု သၞေဟ်က္ၜၚ် သိုၚ်ခၞံ ပ္ဍဲတွဵုရးဍုၚ်မန် ညံၚ်ညးဒေသတအ် ဟွံဂွံဂိ ညံၚ်ဟွံဂွံဒးဒုၚ်သီတိကၠအ်ဂှ် ပံၚ်တောဲကဵု ဂကောံညးအရာပ် ဒေသတအ်တုဲ ရေၚ်တၠုၚ်အာဏောၚ်ဟီုဂှ် ပ္ဍဲလ္တူကိစ္စဏံရော နကဵု MSFC ညံၚ်ညးဒေသတအ် ဟွံဂွံဂိ ဗီုပြၚ်လဵု ကၠောန်သ္ပရေၚ်တၠုၚ်ကဵုဒၟံၚ်နွံရော။

အတိုၚ်ပိုဲဟီုကၠုၚ်လဝ်တုဲဂှ်ရ ပရေၚ်ပံၚ်တောဲရေၚ်တၠုၚ်ကဵု ဂကောံညးအရာပ် ပ္ဍဲဒေသတအ်ဂှ် သၞေဟ်က္ၜၚ်ကျာ မွဲဂကူဓဝ်ဟွံသေၚ်ပုဟ်။ ကိစ္စဒးဒုၚ်သ္ပလဝ်အဓမ္မပါဲနူဂှ် ပံၚ်တောဲကဵု ဂကောံပ္ဍဲဒေသတအ်တုဲ ပကောံပကေဝ်ဒၟံၚ် တၚ်ဂၞၚ်ရ။ အခိၚ်တ္ၚဲဏံ ပ္ဍဲဒေသပိုဲ ပၟတ်ပၞာန် သာတုဲဂဵုသၠာန်ကၠုၚ်ဒၟံၚ်ရ။ အခိၚ်တ္ၚဲဏံ ညးဍုၚ်ကွာန်လ္ၚဵုတအ်ဂှ်လေဝ် သွက်ဂွံပါဲဓလေတ်ဘဲဒဏ်ပၞာန် ညးဍုၚ်ကွာန်တအ်ဂှ်လေဝ် စဳဇန်ဒၟံၚ်ရ။ ညံၚ်ပိုဲဂွံရီုဗၚ် ညးဍုၚ်ကွာန် ပလေဝ်ပလေတ်ဒၟံၚ် သွက်ဂွံပါဲဓလေတ်ဘဲဒဏ်ပၞာန်ကဵု ဒေသဘဲဒဏ်ပၞာန်ကၠုၚ်စိုပ်ဒၟံၚ်ဂှ် အခိၚ်လၟုဟ်ပြဟ်ဟ်ဏံ သဳကၠဳဒၟံၚ် ပ္ဍဲကံၚ်ဇြဳဏံ နွံဒၟံၚ်ရ။ ယွံ၊ တၚ်ဂုဏ်ရ။