ပေါဲဗတိုက်သ္ကာတ်မြဟ်ဒၟံၚ် ပ္ဍဲခလေဝ်တခေါန်ဒေၚ် လှာဒကှ်

လှာဒကှ်၊ ဂျူလာၚ်(၁၅)

တွဵုရးကရေၚ်၊ ပွိုၚ်ဍုၚ်လှာဒကှ်၊ ပ္ဍဲဂကောံကွာန်ခလေဝ်တခေါန်ဒေၚ်ဂှ် ပ္ဍဲဂိတုဂျူလာၚ် စၟတ်တ္ၚဲ (၁၄) အလုံပွိုၚ်မွဲတ္ၚဲ အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA တအ် ပေါဲဗတိုက်သ္ကာတ်မြဟ်ဒၟံၚ်ရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

အကြာ ကရောၚ်ပၞာန်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် ပ္ဍဲဂကောံကွာန်ခလေဝ်တခေါန်ဒေၚ်၊ ပွိုၚ်ဍုၚ်လှာဒကှ် တိဍာ် KNU ဒပ်မဟာ (၆)ဂှ်ကဵု ဒပ်ပံၚ်ကောံ KNLA တအ် သ္ပတံနူဂိတုဂျူလာၚ် စၟတ်တ္ၚဲ (၁၄) အခိၚ်နူဂယးတုဲ အကြာကွာန်ပုလိၚ်ကဵု ကွာန်တခေါန်ဒေၚ်ဂှ် ပေါဲဗတိုက်ၜါလ္ပာ် က္တဵုဒှ်လဝ်ရ။

ပ္ဍဲပေါဲဗတိုက်ဂှ် နူဒပ်အမၠံက်ဖျေံသ္ဇိုၚ်ကွာန်အၜေတ်၊ ပွိုၚ်ဍုၚ်မုဟ်ဍုၚ် သၟဝ်တဲကံၚ်ဇြဳပၞာန် ပန်ရီုနၚ်ကဵု လွဟ်ဇၞော် ပ္ဍဲလ္ပာ်ဂကောံကွာန်ခလေဝ်တခေါန်ဒေၚ်တုဲ ပေါဲဗတိုက်ဂှ် နူအခိၚ်နူဂယး က္တဵုဒှ်လဝ် စဵုကဵုစိုပ်အခိၚ်ဇိုၚ်သဝ်တ္ၚဲရဂှ် ညးဒေသတအ် ဟီုသ္ဂးလဝ်ရ။

ဆ္ဂး ဟိုတ်နူပေါဲဗတိုက်ၜါလ္ပာ်တုဲ အကာဲအရာဇီုကပိုက်ဒးလဝ် ပြဟ်ဟ်ဏံ ဟွံဂွံတီကေတ်ဏီတုဲ ညးဒေသလ္ၚဵုတအ် ကၟာတ်ဂွံလဝ် ပ္ဍဲပေါဲဗတိုက်နွံရဂှ် ဂွံတီကေတ်ရ။

ပ္ဍဲဂိတုဂျူလာၚ် စၟတ်တ္ၚဲ (၁၂)တုဲကၠုၚ်တေံလေဝ် ပ္ဍဲကွာန်ညုၚ်ချာန်မျာၚ် ပုလိၚ်၊ ဂကောံကွာန်ခလေဝ် တခေါန်ဒေၚ်ဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA တအ် ပေါဲဗတိုက်ၜါလ္ပာ် က္တဵုဒှ်သ္ကာတ် မြဟ်လဝ်တုဲ လ္ပာ်ကံၚ်ဇြဳပၞာန် သုၚ်စောဲပၞာန်ကျာတုဲ ပန်ရီုကဵုလဝ်ဏီရ။

ဟိုတ်နူပဋိပက္ခပရေၚ်ပၞာန်ဒှ်လဝ် ပ္ဍဲဂိတုဂျောန် သ္ကုတ်လကြဴဏံတုဲ ညးဒေသ ကောန်ညးဍုၚ်ကွာန် မၞုံပ္ဍဲဂကောံကွာန်ခလေဝ်တခေါန်ဒေၚ်၊ ပွိုၚ်ဍုၚ်လှာဒကှ်တအ် ၁၅၀၀ ပြၚ်ဂှ် ဒးဂြိပ်ဒဴပါဲဓလေတ်ဒၟံၚ် ပ္ဍဲဒၞာဲဗၠးဘုဲတုဲ နွံဒၟံၚ်ပၟိက်ကဵု အရီုဗ္စာရဏာပရေၚ်မၞိဟ် နဒဒှ်ကာတၟေၚ်ရဂှ် ဂွံတီကေတ်နူ ဂကောံဇြဟတ်ပၠန်ဂတးတအ်ရ။

ပရိုၚ်-သြၚ်လောန်တိုၚ်(မ်)

ဗီုရုပ်-KNU