မတ်မလီု – ဂျူလာၚ်(၁၅)
သွက်ဂွံထပ်ရေၚ်တၠုၚ်ကေတ်အရေဝ် လ္တူကံၚ်ဇြဳပၞာန်သီအဝဵုဂှ် ညးအုပ်ကာကၠတ်ထဝ်ကၟိန်ဍုၚ်ပံၚ်ကောံ ဍုၚ်ကနေဒါ ကေုာံ ဌာနဝန်ဇၞော်ပရေၚ်ဍုၚ်သ္အာၚ် NUG တအ် ဆဵုဂဗသဳကၠဳလဝ်ရဂှ် လလောၚ်တြးလဝ်ပရိုၚ်ရ။
ပ္ဍဲဂိတုဂျူလာၚ် စၟတ်တ္ၚဲ (၁၃) တုဲကၠုၚ်တေံ အလဵုအသဳကနေဒါ ဆဵုဂဗလဝ် ကုဝန်ဇၞော်ကၟိန်ဍုၚ် ဌာနဝန်ဇၞော်ပရေၚ်ဍုၚ်သ္အာၚ် အလဵုအသဳ NUG ရဂှ် သ္ဂးလဝ်ရ။
ပ္ဍဲပေါဲဆဵုဂဗဂှ် နကဵုကၟိန်ဍုၚ်ကနေဒါ တၚ်အလဵုအသဳပရေၚ်ညဳသၟဟ်ကောန်ဂကူကၠောန်ရေၚ်တၠုၚ်လဝ်တအ်ဂှ် ဒုၚ်တၠုၚ်လဝ်တုဲ သွက်ဂွံစဵုဒၞာကဵု ကောန်အရာပ် ကေုာံ သွက်ဂွံဒ္ဂေတ်ဗက် အတိုၚ်သၞောဝ်ဥပဒေကၟိန်ဍုၚ်နာနာ သွက်ဂွံကၠောန်ရေၚ်တၠုၚ်အာ အရာနွံပၟိက်တအ်ဂှ်လေဝ် ဗတိုက်ဖ္အောဝ်လဝ်ရ။
သ္အာၚ်နူကၟိန်ဍုၚ်ကနေဒါတုဲ သွက်ကိစ္စကၟိန်ဍုၚ်မိတ်ပွံၚ်ကနေဒါတအ် ဂွံကေတ်အရေဝ်တပ်ဒဏ် ကုကံၚ်ဇြဳပၞာန်ဂှ်လေဝ် ဒှ်သဳကၠဳလဝ်ရဂှ် ဓမံက်လဝ် ပ္ဍဲတၚ်လလောၚ်တြးရ။
သ္အာၚ်နူဂှ်ပၠန် စၞးဝန်ဇၞော်ပရေၚ်ဍုၚ်သ္အာၚ်ကနေဒါ Mélanie Joly ဂှ် ဝန်အပ္ဍဲကၠတ်ထဝ်ကၟိန်ဍုၚ် Robert Oliphant ပျုတ်ဗ္ဒေက်လဝ် ကမၠောန်ပြကံၚ်ဇြဳပၞာန် သီကေတ်လဝ်အဝဵုရဂှ် ဟီုသ္ဂးလဝ်တုဲ ပွပ္ကီုပရာပ်၊ ပရေၚ်ဖံက်ပ္ကဝ်အခေါၚ်အရာမၞိဟ်ကီု သီုကဵုပရေၚ်ပရောပ္တဝ်လဝ်ကဵုကောန်အရာပ်ညးဍုၚ်ကွာန်တုဲ ဗတိုက်ဒၟံၚ်တအ်ဂှ်လေဝ် ဒှ်သဳကၠဳလဝ်ရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – NUG
sanlontai