မတ်မလီု၊ အဝ်ဂါတ် (၂၇)
ကၠုၚ်စိုပ် သၞာံ ၂၀၂၃ ဏံ သွက်ပၠန်ဂတးဥတုက္ညၚ်ဂှ် ကၠေံစိုတ်ဒးရုန်ဂ္စါန်အာဂှ်ရ သွာၚ်နာနာ ပွမပံၚ်တောဲသဳကၠဳ ကဵုဂကောံမဟာမိတ်တံဂှ် ဒးသၠုၚ်ပ္တိုန်ရေၚ်တၠုၚ်အာရောၚ် သ္ကိုပ်ဝန်ဇၞော်အလဵုအသဳညဳသၟဟ်ဂကူ NUG မာန်ဝေန်ခိုၚ်တာန် ဟီုရ။
ပ္ဍဲကောံဓရီုကမ္မတဳဗဟဵု ထ္မံက်ရုပ်ရဴပရေၚ်အုပ်ဓုပ်ညးဍုၚ်ကွာန်ဒေသန္တရ အလဵုအသဳညဳသၟဟ်ဂကူ NUG ပ္ဍဲဂိတုအဝ်ဂါတ် (၂၆) ဂှ် သ္ကိုပ်ဝန်ဇၞော် မာန်ဝေန်ခိုၚ်တာန် ဟီုလဝ် သာ်ဏံရ။
သ္ကိုပ်ဝန်ဇၞော် မာန်ဝေန်ခိုၚ်တာန်ဂှ် ဌာနဝန်ဇၞော်ကာစဵုဒၞါတံကဵု ဌာနဝန်ဇၞော်ကာအပ္ဍဲဍုၚ်တံ နွံပၟိက်သ္ဂောံရေၚ်တၠုၚ်ပံၚ်တောဲကြပ်ပ်တုဲ အပ္ဍဲသၞာံကၠုၚ်စိုပ် ပွိုၚ်မွဲသၞာံဏံ သွာၚ်နာနာ ပွမပံၚ်တောဲရေၚ်တၠုၚ် ကဵုဂကောံမဟာမိတ်တံဂှ် သ္ဂောံရေၚ်တၠုၚ်ကၠောန်ၜိုတ်အာ နွံပၟိက်ရောၚ် သာ်ဝွံ သ္ဂးရ။
သ္အာၚ်နူဂှ်ပၠန် စပ်ကဵုပွမကံက်အခေါန်ၚာၚ်တုဲ ညးဍုၚ်ကွာန်တံ ညံၚ်တာလျိုၚ်ဂွိုအ်ဂၠိုၚ်ဂှ်ကဵု အခက်အခုဲကဏ္ဍပရေၚ်စဳရေၚ်ဂဗုတ်တံဂှ် သွက်ဂွံပံၚ်တောဲရေၚ်တၠုၚ်အာ ကဵုဌာနဝန်ဇၞော်ကာအပ္ဍဲဍုၚ်တံဂှ်လေဝ် ဖ္တိုက်ဖ္အောဝ်လဝ်ရ။
ပ္ဍဲအခိၚ်ကာလ ပရေၚ်ပၠန်ဂတး အကြာတမ်ရိုဟ်ဇြဟတ်မၞိဟ်၊ ဇြဟတ်သြန်တံ ဟွံဍိုက်ပေၚ်ဂှ် စိုပ်ကၠုၚ် ဒဵုကဵုအကာဲအရာဗီုလၟုဟ်ဂှ်ရ သွက်ဂွံဂ္စါန်အာ ၜါဆဂှ် မာန်ဝေန်ခိုၚ်တာန် ဖ္တိုက်ဖ္အောဝ်လဝ်ရ။
ပ္ဍဲကောံဓရီုကမ္မတဳဗဟဵု ထ္မံက်ရုပ်ရဴပရေၚ်အုပ်ဓုပ်ညးဍုၚ်ကွာန် ဒေသန္တရအခိၚ်အကြာ အလဵုအသဳ NUG ဂှ် သဳကၠဳလဝ် သီုကဵုအကာဲအရာ မရေၚ်တၠုၚ်ထ္မံက်ရုပ်ရဴ သွက်လၟေၚ်ကမၠောန်ဂတတံကဵု တၚ်သ္ဂုတ်သွာတ်မဖျေံလဝ်တံရောၚ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)