မဝ်သကိုဝ်၊ အဝ်ဂါတ် (၂၇)
သမ္မတရုယှာ ဗလာဒဳမာပူတေန် ကဵုလဝ်အမိၚ် သွက်ဂွံသၠဲပ္တိုန် ပမာဏဒပ်ပၞာန်ညးတုဲ ပြဝလၟုဟ်ဝွံ အရာမဂ္စါန် သွက်ဂွံဖအောန်ဖျေံ ဇြဟတ်ပၞာန် ကရေန်မလေန် သၞာံဗွဲမဂၠိုၚ်ဂၠေၚ် မပဵုဒၟံၚ်တံဂှ် ပြံၚ်လှာဲကၠေံတုဲ ပ္ဍဲကဵုဗလးပၞာန် ပေါဲပၞာန် မဒှ်ဒၟံၚ် ပ္ဍဲယူကရုၚ် အခိၚ်ဗွဲမလအ်လဂှ် ဒှ်လက္ချန် ဆောံလေၚ်ဂၠိုၚ်မွဲ ဗွဲမသ္ကာတ်မြဟ်ရ။
သမ္မတရုယှာ ပူတေန် ထ္ပက်စၟတ်တဲတုဲ ယၚ်အမိၚ်မပ္တိုန်လဝ် ပ္ဍဲဝါပ်သာ်ကရေန်မလေန်ဂှ်ဝွံ စဵုကဵုဂိတုဂျာန္နဝါရဳ ကၠုၚ်စိုပ်သၞာံဏံ နူကဵုလၟိဟ်မၞိဟ် ယိုက်ဂၠေၚ်ဒၟံၚ်တာလျိုၚ် ဗၞတ် (၁၃၇,၀၀၀) ဂှ် သွက်ဂွံသၠုဲပ္တိုန် လၟိဟ်မၞိဟ် စဵုကဵု (၁.၁၅) ပြကောဋိကိုဋ်ဂှ်တုဲ သွက်ဂွံပါဲလဝ် သြန်ထံက်ပၚ်တံဂှ် ကဵုလဝ်အမိၚ် ကုအလဵုအသဳရ။
စပ်ကဵု ပွမသၠုဲပ္တိုန်ကၠုၚ် တီတီကၠးကၠး သာ်ဏံတုဲ ဗီုလဵုကောပ်ကာဲဖန်ဇန်အာရောၚ်ဟီုဂှ် ညးလ္ၚတ်သ္ၚဳဂၠိပ် ပရေၚ်ပၞာန်တံ အံသဝ်ဒၟံၚ်ဖိုဟ်ရ။
သွက်ဂွံပြံၚ်လှာဲ လၟိဟ်ဂကောံဒပ်ရပ်လွဟ်ရုယှာ သီုဖအိုတ်ဂှ် သမ္မတရုယှာ ပူတေန် အပ္ဍဲပွိုၚ် (၅) သၞာံဂှ် လလောၚ်ပၟိၚ်လဝ် အလန်ကိုပ်ကၠာအိုတ်တုဲ ညးတာလျိုၚ်တံဂှ် သွက်အပြံၚ်အလှာဲဏံဂှ် ဟွံသောၚ်ကလးမွဲသာ် ပွမထ္မံက်ထ္ၜးလဝ် ပ္ဍဲကဵုအစဳဇန်ဗလးရုပ်ရမျာၚ် အလဵုအသဳပိုၚ်ဂှ် နွံလဝ် ညိညဟေၚ်ရ။
အပ္ဍဲပၞာန်ပူတေန် မသၠိုၚ်လုပ်ၜက်ၜေတ်ယူကရုၚ်ဂှ် ရုယှာဝွံ သီုကဵုပွမဒးဝပ်ချိုတ်ဂျိုၚ်တံ မပါလုပ်ဂှ် မၞုံကၠုၚ်စဵုကဵု (၈၀၀၀၀) ရောၚ် သၞာဲဒဴလ္ပာ်ပၞာန် အမေရိကာန်တံ ချိၚ်ခယျလဝ်ရ။
အခိၚ်ပေါဲဗ္တိုက်လလအ်ပွိုၚ် (၆) ဂိတုဒတုဲဂှ် ပူတေန် သွက်ဂွံဆုတ်ကလေၚ် ဒဒှ်ရအစဳဇန်ဟွံမွဲဂှ် နကဵုလက္ချန်ပြာပြာကတ်တ် ညးလ္ၚတ်သ္ၚဳဂၠိပ်လ္ၚဵုတံ ထ္မံက်ထ္ၜးလဝ်ဏီရ။
“အခိၚ်မစၟဳဒၟံၚ် သ္ဂောံဗတုဲဗဒှ်ထောံပေါဲပၞာန် ဗွဲမပြဟ်ဂှ် ပြဝဏံဝွံ ဒှ်ပွချဳဒရာၚ် မ္ဒးကၠောန်မွဲဟွံသေၚ်ပုဟ်၊ ဒှ်ပဋိပက္ခမဂၠိၚ်သ္ၚောဲမွဲရ” သာ်ဝွံ သုတေသဳကေၚ်ကာမူဝါဒ ကဆံၚ်သၠုၚ် ဒါရာ နူ RAND Corp သ္ပလဝ်တၚ်စၟတ်ရ။
ပေါဲပၞာန်ယူကရုၚ် သ္ဂောံလောန်ၜက်အာ ကၠုၚ်စိုပ်ရာသဳၜိုဟ်ဂံက်ဏံမာန်ဂှ် သက်သဳတံလေဝ် မၞုံဒၟံၚ်ရ။
ပ္ဍဲလ္ပာ်ဗၟံက် ကဵု လ္ပာ်သၠုၚ်ကျာတံဂှ် ပၞာန်ထ္ပက်ရုယှာတံ သ္ၚောဲဇးအာသိုက်က်တုဲ သွက်ဂွံပ္ညဳပ္ညပ်သဳကၠဳ ဟွံသေၚ်မ္ဂး သွက်ဂွံကၠောန်သ္ပ ကဵုကေတ်တံဂှ် ဟွံဒှ်ဒတုဲဏီတုဲ သွက်ဂွံပလှ်ဖျေံ အလဵုအသဳကိယေပ် ကေုာံ သွက်ဂွံသီကေတ်တိဍာ် ယူကရုၚ် မဂၠိုၚ်ဂၠေၚ်ဂှ် ရံၚ်ကေတ်ရုယှာ စၟဳစလဝ်ရောၚ်။
Ref: The Straits time