ဂျာကာတာ၊ ဂျူလာၚ် ၃၁
ပ္ဍဲဂိတုဂျူလာၚ် ၂၉ တေံ ကြဴနူသမ္မတ ပရာဗိုဝ်ဝဝ်ကဵု သ္ကိုပ်ဝန်ဇၞော် အာန်ဝါ အေဗရာဟေန်တအ် ဆဵုဂဗညးသ္ကအ်တုဲဂှ် သွက်ဂွံဖဍိုန်ဖျေံအသိၚ် ပဋိပက္ခ သေံ−ကာမ္ဗောဒဳယျာဂှ် ပံၚ်တောဲကၠောန်မံၚ်ကဵု မလေဝ်ယှာ က္တိုၚ်ၚ်ကၟဟ်ဟ်ရောၚ် နူနန်သမ္မတ အေန်ဒိုဝ်နဳယှာ ဟီုရ။
ကြဴနူဥက္ကဌအာဇြဳယာန် သ္ကိုပ်ဝန်ဇၞော်မလေဝ်ယှာ အာန်ဝါ လုပ်ပညဳပညပ်ကဵု ပရေၚ်ဒေါအ်ပန်ပှော် အကြာသေံကဵု ကာမ္ဗောဒဳယျာဂှ်တုဲ ဂွံမွဲတ္ၚဲဂှ် သမ္မတအေန်ဒိုဝ်နဳယှာ ပရာဗိုဝ်ဝဝ် ဒုၚ်တဲဆဵုဂဗလဝ်ညး သွက်ဂွံသဳကၠဳချပ်ဂၞန် သွက်လၟေၚ်သၞာံရ။
ဟိုတ်နူယဲကပ်ဂၠးတိကီု သီုကဵုအပြံၚ်အလှာဲပရေၚ်ဍုၚ်ကွာန် သီုပ္ဍဲၜါဍုၚ်ဏံဂှ်တုဲ ပေါဲသဳကၠဳချပ်ဂၞန်လၟေၚ်သၞာံ ဟွံဒှ်ကၠောန်ကၠုၚ်လဝ် နူသၞာံ ၂၀၁၇ တေံဂှ်ဝွံ ဒှ်စက်ယန်ကဆံၚ်သၠုၚ် မဆေၚ်စပ်ကဵုပရေၚ်ၜါဍုၚ်ဏံ သွက်ဂွံပံၚ်တောဲရေၚ်တၠုၚ်အာ ဗွဲမစှ်ေကဵုမဟာဗျူဟာမွဲရ။
သမ္မတ ပရာဗိုဝ်ဝတ် ဟီုဂးထိုၚ်သးတဴ လ္တူပရေၚ်အာက္ဍိုပ် သ္ကိုပ်ဝန်ဇၞော်အာန်ဝါ ဒဒှ်မလုပ်သောၚ်ကလးကဵုလဝ် ပဋိပက္ခအပ္ဍဲဒေသ ဗွဲမအံၚ်ဇၞးမာန်ဂှ်ရ။
ပ္ဍဲအရာထိၚ်ဒဝ် ပရေၚ်ညိၚ်ဝဝ်အပ္ဍဲဒေသဂှ် ထံက်တဴဂလာန် အခန်ကဏ္ဍ မလေဝ်ယှာ ဥက္ကဌအာဇြဳယာန်ဂှ် ပေၚ်ၚ်ရောၚ် သမ္မတအေန်ဒိုဝ်နဳယှာ ဟီုရ။
နကဵုညးတအ် နူဒၞါဲလဵုဒှ်ဒှ် နဗီုပြၚ်လဵုဒှ်ဒှ် ဂွံရီုဗၚ်အာဂှ် ဒှ်မံၚ်ဒတုဲရရောၚ် ညးဟီုကၠုၚ်လဝ်ရ။
ပ္ဍဲအရာထိၚ်ဒဝ် ဂီုကၠီုဒေသဂှ် ပွမပံၚ်တောဲရေၚ်တၠုၚ် အကြာကောန်ဂကောံအာဇြဳယာန်တအ်ဂှ် ပၟိက်ဇၞော်တဴရောၚ် အာန်ဝါ ဟီုလဝ်ရ။
ပ္ဍဲအရာမၚ်ရံၚ်လ္ၚတ် ဂီုကၠီုဒေသဂှ် ဗွဲတၟေၚ် မလေဝ်ယှာ၊ အေန်ဒိုဝ်နဳယှာ၊ သေန်ကာပေါဝ်၊ ဗရူနာၚ်၊ ဖဳလေတ်ဖေန် ဍုၚ်တအ်ဏံ ကြက်ကေတ်အာလျိုၚ် သွက်ဂွံမၚ်ရံၚ် လၟေၚ်ကမၠောန်ပရေၚ်ၜိုဟ်လလမ်တံဂှ်ဏောၚ် အာန်ဝါ ဟီုကၠုၚ်လဝ်ရ။
ပေါဲသဳကၠဳချပ်ဂၞန်ကၠောံသၞာံ မရနုက်ကဵု ၁၃ ဝါဏံဂှ်ဝွံ အကြာအာန်ဝါကဵု ပရာဗိုဝ်ဝဝ်ဂှ် ဒှ်အလန်ကၠာအိုတ်ရ။
Ref: CNA