ပရေၚ်ဗဒိုပ်ပါဲဘဲပၞာန် မုမ်လိုၚ်ခေတ် ဒးဒုၚ်ဗတိုတ်လဝ်ဂှ် NUG ပျုတ်ဗ္ဒေက်သ္ကာတ်တ်မြဟ်ဟ်

မတ်မလီု – အံက်တဝ်ဗာ (၁၁)

ပရေၚ်ဒပ်ကံၚ်ဇြဳပၞာန် ဂြာတ်ထောံဖျေံဗုမ် ဗတိုက်ပန်လဝ် ဗဒိုပ်ပါဲဘဲပၞာန်မုမ်လိုၚ်ခေတ် ဗ္ဒာဲဍုၚ်လိုၚ်ဇြာ တွဵုရးကချေၚ်ဂှ် ဟိုတ်နူက္လိလောန်ဒၟံၚ် ဒုဟ်ရာဇဝတ် လ္တူကောန်ဂကူမၞိဟ် ကေုာံဒုဟ်ရာဇဝတ်ပၞာန်ဂှ်ရ ပျုတ်ဗ္ဒေက်အာ သ္ကာတ်တ်မြဟ်ဟ်ရဂှ် အလဵုအသဳညဳသၟဟ်ကောန်ဂကူ (NUG) လလောၚ်တြးလဝ် ပရိုၚ်ရ။

ပ္ဍဲဂိတုအံက်တဝ်ဗာ စၟတ်တ္ၚဲ (၉) တုဲကၠုၚ်တေံ အခိၚ်ဗ္တံ ၜိုတ် (၁၁)နာဍဳဂှ် ဟိုတ်နူလ္ပာ်ကံၚ်ဇြဳပၞာန် ဗတိုက်ပန်ပှော်လဝ်ဗဒိုပ်ပါဲဘဲပၞာန် မုမ်လိုၚ်ခေတ်ဂှ်ရ ဒးချိုတ်လဝ် ဟွံအောန်နူ (၃၀)တၠ ပါလုပ်သီုကောန်ၚာ်ရ။

နကဵု NUG ဂှ် ဒတူလာၚ်အာ မွဲကရောံကဵုကောန်ဂကူကချေၚ်တအ်မွဲစွံရဂှ် ဟီုလဝ်တုဲ သွက်မၞိဟ်ဒးဇီုကပိုက်ဆောံလေၚ်လဝ်တအ်ဂှ် ပ္တိတ်အာဇြဟတ် သွက်ဂွံက္လေၚ်ကေတ်ကဵု ပရေၚ်ဗဗွဲဓဝ် ဒဵုအစောန်အိုတ်ရောၚ်ဂှ် ကဵုလဝ်သမ္တီရ။

အခိၚ်လၟုဟ်ဏံမ္ဂး ဆက်ကၠောန်ရေၚ်တၠုၚ်ဒၟံၚ် ကမၠောန်ဂၠိုက်ဂၠာဲရီုဗၚ် ပ္ဍဲဗလးမုက်တိတုဲ မၞိဟ်ဇီုကပိုက်ဒးလဝ်ဘဲဝ်ကဵု မၞိဟ်ဒးချိုတ်လဝ် သာတုဲဂၠိုၚ်ကၠုၚ်မာန်ဒၟံၚ်ရဂှ် ဓမံက်ထ္ၜးလဝ်ရ။

သ္အာၚ်နူဂှ်ပၠန် ဟိုတ်နူဒပ်ကံၚ်ဇြဳပၞာန် ဗတိုက်ပန်ပှော်လဝ်ဂှ် ပါဲနူဗဒိုပ်ပါဲဘဲပၞာန်တုဲ ဘာဗ္တောန်လိက် (၁)ဘာ၊ ဘာထိၚ်ဒဝ်ကောန်ၚာ် (၁)ဘာ၊ ဘာကျာ် (၁)ဘာ သီုသ္ၚိဒၟံၚ်ကောန်အရာပ်တအ် ဒးလီုလာ်ဆောံလေၚ်လဝ်ရဂှ် ဂွံတီကေတ်ရ။

ကံၚ်ဇြဳပၞာန်ဂှ် ကမၠောန်ပ္တဝ်လဝ် ဗဒိုပ်ပါဲဘဲပၞာန် ဒၞာဲကောန်အရာပ်ညးဍုၚ်ကွာန်တအ် မံၚ်တန်တဴဒၟံၚ် ဒၞာဲဌာန်ပ္တဝ်ပၞာန်ဟွံသေၚ် သီုတၚ်ရန်တၟံနွံနွံတုဲ ဗတိုက်ဒၟံၚ်ဂှ် ဒှ်က္လိလောန်ဒၟံၚ် ဂဗုတ်ရာဇဝတ်က္လိလောန်ဒၟံၚ် လ္တူကောန်ဂကူမၞိဟ် ကေုာံဂဗုတ်ရာဇဝတ်ပၞာန် မံက်က်ထေၚ်ၚ်ရဂှ် NUG ဟီုရ။

ပရေၚ်ကံၚ်ဇြဳပၞာန် ဗတိုက်ပန်လဝ် ဗဒိုပ်ပါဲဒဴပၞာန်မုမ်လိုၚ်ခေတ်ဂှ် ကေတ်အခေါၚ်ခိုဟ် လ္တူကၟိန်ဍုၚ်နာနာ စွံဒၟံၚ်အာရီု လ္တူပဋိပက္ခပၞာန် အေဿရေကဵု ဟာမေတ်သ်တုဲ က္လိလောန်လဝ် ဒုဟ်ရာဇဝတ်ပၞာန်ရဂှ် ဟီုလဝ်ရ။

နကဵုကၟိန်ဍုၚ်နာနာလေဝ် ညံၚ်ကံၚ်ဇြဳပၞာန် ဟွံဂွံထပ် က္လိလောန် ဗီုပြၚ်က္လိလောန်လဝ်လၟုဟ်ဂှ် သွက်ဂွံတာဒၞာကေတ်အရေဝ် အတိုၚ်တၚ်သ္ဂုတ်သွာတ်ကုလသမဂ္ဂ ပိုဒ် (၂၆၆၉) ဗွဲမစိုပ်တရဴ သ္ကာတ်တ်မြဟ်ဟ် ဗွဲမဂတာပ်အခိၚ်ကီု သွက်ဂွံပံၚ်တောဲကဵု အလဵုအသဳညဳသၟဟ်ကောန်ဂကူမွဲစွံ ဗွဲမစိုပ်တရဴကီုဂှ် သ္ပဂရုအာတ်မိက်လဝ်ဗ္တိုက်ဖ္အောဝ်လဝ် ဗွဲမဇြိုဟ်နက်ရဂှ် ဓမံက်ထ္ၜးလဝ်ရ။

အခိၚ်လၟုဟ်ဏံ ဇွမၞိဟ်ဒးချိုတ်လဝ် ပ္ဍဲကဵုပရေၚ်ပရော ဗဒိုပ်ပါဲဘဲပၞာန်မုမ်လိုၚ်ခေတ် ဒးဒုၚ်ဂြာတ်ထောံဖျေံလဝ်ဗုမ်တအ်ဂှ် တ္ၚဲဏံ ပ္ဍဲအခိၚ်ဒေါဝ်တ္ၚဲ ရာဒနာမိက် တိုပ်ဂြးလဝ်ရဂှ် ဓမံက်ထ္ၜးလဝ် ပ္ဍဲမဳဒဳယာဒေသဂှ်ရ။

ပရိုၚ် – သြၚ်လောန်တိုၚ်(မ်)

ဗီု – The Kachin Net