ဗဂေါ၊ အံက်တဝ်ဗာ(၁၁)
ပရေၚ်ဍာ်ဇၞော်က္တဵုဒှ်ဒၟံၚ် ပ္ဍဲဍုၚ်ဗဂေါ၊ ရးဒေသဇၞော်ဗဂေါဂှ် သွက်သ္ဂောံက္လိဂွံ အခေါၚ်ရီုဗၚ် ဒးအာတ်မိက်ဒၟံၚ်အခေါၚ် ဇရေၚ်ဂကောံအုပ်ဓုပ်ကံၚ်ဇြဳပၞာန်တုဲ ပရေၚ်ဒးဒုၚ်ဘပဠဒၟံၚ်လေဝ် နွံရဂှ် ဂကောံရီုဗၚ်ဟံၚ်ပြာ်ပရေၚ်မၞိဟ် ဟွံမိက်ဓမံက်ယၟုတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲဍုၚ်ဗဂေါဂှ် မွဲကရောံကဵုဗြဲဂူတရိုပ်စှ်ေ လောန်နူဗၞတ်ဗ္ၜတ် ပ္ဍဲပွိုၚ် ၆၀ သၞာံဂှ် ပ္ဍဲကဵုစြာၚ်ဍာ် ကေုာံကၟိုန်ကြိုၚ်ဍာ်တအ်ဂှ် ဍာ်ပေၚ်တုဲ ကၟိုဟ်တိုန်ဂှ် ဟိုတ်နူဒးဖံက်ပရိုဟ်ပ္တိတ်ဒၟံၚ်ဍာ်ဂှ်ရ သ္ပတံနူဂိတုအံက်တဝ်ဗာ စၟတ်တ္ၚဲ (၈)တုဲကၠုၚ်တေံတုဲ ဍာ်ဇၞော်ကၟိုဟ်ဒၟံၚ် အလုံမွဲဍုၚ်ရ။
ဂကောံရီုဗၚ်ဟံၚ်ပြာ်ပရေၚ်မၞိဟ် နူရးဒေသဇၞော် ကေုာံတွဵုရးနာနာတအ်ဂှ် သွက်သ္ဂောံက္လိဂွံအခေါၚ်ရီုဗၚ် ဒးအာတ်ဒၟံၚ်အခေါၚ် ဇရေၚ်ကံၚ်ဇြဳပၞာန်တုဲ က္လိဂွံအခေါၚ်ဟေၚ် ဂွံရီုဗၚ်ကဵုမာန်ရဂှ် ဂွံတီကေတ် နူဂကောံရီုဗၚ်ဟံၚ်ပြာ်ပရေၚ်မၞိဟ်တအ်ရ။
ပ္ဍဲအရာအာတ်အခေါၚ်ဇရေၚ်ကံၚ်ဇြဳပၞာန်ဂှ် နကဵုတၚ်ထ္ၜးဟိုတ်ပရေၚ်ဂီုကၠီု မ္ၚးနူစရၚ်ယၟုဂကောံတုဲ မၞိဟ်ပါလုပ်သီုဖအိုတ်တအ်ဂှ် ဒးဒုၚ်စၟဳစၟတ်ဒၟံၚ်တုဲ ဍေံတအ်ဟွံတီမွဲသာ် ယဝ်ရရီုဗၚ်ဟံၚ်ပြာ်ဒးမ္ဂး ဂကောံသၟဝ်တဲကံၚ်ဇြဳပၞာန်တအ် ဘပဠဟီုဂးဒၟံၚ် နွံရဂှ် ဟီုလဴလဝ်ရ။
သ္အာၚ်နူဂှ်ပၠန် နကဵုဂကောံရီုဗၚ်ဟံၚ်ပြာ်ပရေၚ်မၞိဟ် ကၠုၚ်ရီုဗၚ်ဟံၚ်ပြာ်တအ်ဂှ် ဒေါံဟွံဂွံဒးကၠုၚ်ကဵုစရၚ် ပ္ဍဲဗဒိုပ်ပံၚ်ကောံရီုဗၚ်ဟံၚ်ပြာ် ဍေံတအ်ပိုၚ်ခြာလဝ်ဂှ်တုဲဟေၚ် သွက်ဂွံရီုဗၚ်ကဵုဂှ် ဂကောံအုပ်ဓုပ်ကံၚ်ဇြဳပၞာန်တအ် စၞောန်ပ္ညုၚ်လဝ်ရ။
လၟုဟ်ဏံ ဟိုတ်နူဍာ်ဇၞော်ပ္ဍဲဗဂေါတုဲ ဒးပံက်လဝ်ဗဒိုပ်ရီုဗၚ်ဟံၚ်ပြာ်ယာယဳ ဟွံအောန်နူ (၂၂) ဗဒိုပ်နွံတုဲ ညးဍုၚ်ကွာန် ဒးဘဲဒဏ်ဍာ်တအ် ပိလက်ပြၚ် ကၠုၚ်ဇူဗ္ဒာဲဒၟံၚ်တုဲ ကောန်ဒေသ ညးဍုၚ်ကွာန်ဒးပြံၚ်ပဆုဲလဝ် ပ္ဍဲဒၞာဲဗၠးဘဲ နွံဗ္ဒာဲ ပန်လက်ရဂှ် ဂွံတီကေတ် အတိုၚ်လဟီု ဂကောံရီုဗၚ်ဟံၚ်ပြာ်မၞိဟ်တအ်ရ။
ဟိုတ်နူဍာ်ဇၞော်တုဲ မၞိဟ်ကၟာတ်ဂွံဒၟံၚ် ပ္ဍဲသ္ၚိဒၟံၚ် မၞုံအရာပ်ဇၞော် လ္တူဍုၚ်ဗဂေါ (၈) အရာပ်တအ်လေဝ် ဆက်နွံဒၟံၚ်ဂှ်ရ ပ္ဍဲကဵုဂိတုအံက်တဝ်ဗာ စၟတ်တ္ၚဲ (၁၀) ဂှ်လေဝ် ဒးဆက်ကၠောန်ဒၟံၚ် ကမၠောန်ရီုဗၚ်ဟံၚ်ပြာ်ဏီရဂှ် ဟီုလဝ်ရ။
ဟိုတ်နူဍုၚ်ဗဂေါ ဍာ်ဇၞော်တုဲ ဘာဗ္တောန်လိက် ဟွံအောန်နူ (၃၄) ဘာ ဒးကၟာတ်လဝ် မွဲချိုန်ခနတုဲ သွက်ညးဍုၚ်ကွာန်ဒးဘဲဒဏ်ဍာ်တအ်ဂှ် နွံဒၟံၚ်ပၟိက် အရီုဗၚ်ဇွောံမစၞစသ္ဇိုၚ် ကေုာံဍာ်သုၚ်ရ။
ပ္ဍဲကဵုဂိတုမေတုဲကၠုၚ်တေံလေဝ် ဟိုတ်နူလဗိုတ်ကျာဇၞော် ဇြဟတ်သ္ကာတ်မြဟ် မိုဝ်ခါတုဲ သွက်သ္ဂောံက္လိဂွံအခေါၚ်ရီုဗၚ်ဟံၚ်ပြာ် ပ္ဍဲတွဵုရးရးခေၚ် ဒးဇီုကပိုက်လီုလာ်အာလဝ်ဂှ် ဒးမၚ်လဝ် တၚ်သ္ပကဵုအခေါၚ်ကံၚ်ဇြဳပၞာန်တုဲ ဂကောံဍုၚ်သ္အာၚ်တအ် ဟိုတ်နူဟွံဂွံအခေါၚ်တုဲ ဟွံက္လိဂွံလဝ် အခေါၚ်ရီုဗၚ် ပ္ဍဲဗလးမုက်တိရ။
ပရိုၚ် – သြၚ်လောန်တိုၚ်(မ်)
ဗီု – MFSD
sanlontai