ရေဝ်၊ အံက်တဝ်ဗာ (၁၁)
ဗ္ဒါဲဖျာမျသဳတာ၊ ဍုၚ်ရေဝ်၊ တွဵုရးဍုၚ်မန် မလလောၚ်တြးလဝ် ပရေၚ်အုပ်ဓုပ်ပၞာန်ဂှ် ပ္ဍဲဂိတုအံက်တဝ်ဗာ (၁၀) အခိၚ်နူဂယး ၜိုတ် (၉) နာဍဳဂှ် သ္ကိုပ်အုပ်ဓုပ်မွဲတၠ ဒးဒုၚ်ပန်လဝ် ကဵုသေနာတ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
သ္ကိုပ်အုပ်ဓုပ်အရာပ်အံၚ်မေတ္တာ ဍုၚ်ရေဝ် ဥူအေလွေန်ဝွံ အခိၚ်တိတ်ကၠုၚ် နူကဵုသ္ၚိ နကဵုကွဳလိုန်ဓာတ် ညးမွဲဓဝ်ဂှ် သၟာသေနာတ်ဟွံတီယၟုဂမၠိုၚ် ဗက်ကၠုၚ်ကဵုကွဳလိုန်ဓာတ်တုဲ ပန်ဂစိုတ်လဝ်ကြပ်ပ်ရ။
ဟိုတ်နူဒးဒုၚ်ပန်လဝ်ကဵုသေနာတ်ဂှ်ရ သ္ကိုပ်အုပ်ဓုပ် ဥူအေလွေန်ဝွံ ပ္ဍဲကဵုစး ကေုာံ ပ္ဍဲကဵုဗုၚ်တံဂှ် ကလိဂွံဝပ် မကမ်တံဂှ်တုဲ ဟိုတ်နူအကာဲအရာ မ္ဒးဂွိၚ်တံဂှ်တုဲ နူကဵုရုၚ်ဂဥုဲဍုၚ်ရေဝ်ဂှ် ဒးပြံၚ်လွဳလဝ် ဇရေၚ်ရုၚ်ဂဥုဲမတ်မလီုရောၚ်ဂှ် ညးဒေသတံ ဟီုဂးလဝ်ရ။
ဥူအေလွေန် သ္ကိုပ်အုပ်ဓုပ် သီုကဵုဒှ်က္ဍိုပ်သ္ကိုပ်ပၞာန်ညးဍုၚ်ကွာန်ဂှ် ဂကောံလကိုဟ်ဍုၚ်ရေဝ် ဂကောံပၠန်ဂတး ဖျေံသ္ဇိုၚ်ပွိုၚ်ဍုၚ်ရေဝ် ပန်ဂစိုတ်လဝ်ဂှ် က္ဍိုပ်သ္ကိုပ်ဂကောံလကိုဟ်ဍုၚ်ရေဝ် လလောၚ်ပ္တိတ်လဝ် ပ္ဍဲကဵုမုက်လိက်ဇာဇၞိက်ပရေၚ်မၞိဟ်ညးတံရ။
ဥူအေလွေန် မဒးဒုၚ်ပန်ဂှ်ဝွံ ဒှ်ဂွံသ္ကိုပ်အုပ်ဓုပ် (၇) ဂိတုပြၚ်ညိကီုဏီတုဲ ၜိုန်ရညးဒေသတံ ဟီုဂးဒၟံၚ် ဒှ်သ္ကိုပ်အုပ်ဓုပ် ကံၚ်ဇြဳပၞာန် ပတှ်ေဖျေံစိုတ်ဂွံမွဲကီုလေဝ် နကဵုသြၚ်လောန်တိုၚ်(မ်) သ္ပဒတန်တၞဟ်ခြာမာန်ဟွံမွဲဏီရ။
သၞာံတုဲကၠုၚ် ပ္ဍဲဂိတုဒဳဇြေမ်ဗာ (၂၁) တေံဂှ်လေဝ် ကြဴနူသ္ကိုပ်အုပ်ဓုပ် အရာပ်အံၚ်မေတ္တာ ဍုၚ်ရေဝ် ဥူအံၚ်ကျဝ် ဒးဒုၚ်ပန်ဂစိုတ်တုဲဂှ် ဥူအေလွေန်ဝွံ ဒးဒုၚ်ခါန်ကၞက်လဝ် နဒဒှ်သ္ကိုပ်အုပ်ဓုပ်ရ။
ပရိုၚ်−သြၚ်လောန်တိုၚ်(မ်)
ဗီု− Social Media
sanlontai