တယိတ်ချံၚ်၊ အံက်တဝ်ဗာ (၁၁)
စနူဂိတုအံက်တဝ်ဗာ (၉) အခိၚ်နူဂယးဂှ်တုဲ နူကဵုဒပ်ကံၚ်ဇြဳပၞာန် ထပ်ကၠောန်သ္ပစံၚ်ပလီုပလာ်ဒၟံၚ် ကွာန်ယၚေဝ်၊ ပွိုၚ်ဍုၚ်တယိတ်ချံၚ်၊ ရးဒေသဇၞော်တၞၚ်သဳဂှ် ဂွံတီကေတ် အတိုၚ်ဂလာန်ညးဒေသတံရ။
ကရောၚ်ပၞာန်ကံၚ်ဇြဳပၞာန် ဇြဟတ်ဒပ် (၈၀) ပြၚ် ပါလုပ်ဂှ်ဝွံ ကြဴနူလုပ်စိုပ်ကၠုၚ် အပ္ဍဲကွာန်ယၚေဝ် ညးဒေသတံ မဂြိပ်ဒဴပါဲဒလေတ်တိတ်အာဂှ်တုဲ စံၚ်ပလီုပလာ်လဝ် သ္ၚိဒၟံၚ်ဂမၠိုၚ်ရ။
ဟိုတ်နူဒပ်ကံၚ်ဇြဳပၞာန် စံၚ်ပလီုပလာ်လဝ်ဂှ်ရ ပြဟ်ဟ်ဏံ သ္ၚိဒၟံၚ် (၁၀) မဟွံက ပၟတ်တူလီုလာ်လဝ်တုဲ လၟိဟ်ချိုတ်တ်ပၠိုတ်တ် ဟွံဂွံတီကေတ်ဏီပုဟ်ဂှ် ညးဒေသတံ ဟီုရ။
အပ္ဍဲကွာန်ယၚေဝ် မဒးဒုၚ်စံၚ်ပလီုပလာ်လဝ်ဂှ် ကောန်ဂကောံဒပ်ကံၚ်ဇြဳပၞာန်တံ ဟိုတ်နူဆက်ဖျေံဒၟံၚ်ဒပ်ဂှ်ရ ညးဒေသဂမၠိုၚ် ဟွံဂံၚ်စဴဌာန်ဒၟံၚ်မွဲသာ် ဒးမၚ်ရံၚ်ဒၟံၚ် အကာဲအရာတံရောၚ်ဂှ် သ္ဂးရ။
ဒပ်ကံၚ်ဇြဳပၞာန် မထ္ပက်ကရောၚ်ပၞာန် လုပ်စိုပ်ကၠုၚ် အပ္ဍဲကွာန်ယၚေဝ်ဂှ် ဟိုတ်နူကောန်ကွာန်ယၚေဝ် ဗိုလ်ယှေန်တ သ္ကိုပ်သ္ကပါလုပ်ကၠုၚ်ဂှ်ရ အကြာညးဍုၚ်ကွာန်တံဂှ် ပရေၚ်ဒှ်ဓဝိၚ်တံ သၠုၚ်တိုန်ဒၟံၚ်ရ။
ကရောၚ်ပၞာန်ဏံဝွံ စနူဂိတုသေပ်တေမ်ဗာ သတ္တာဟလက္ကရဴအိုတ်ဂှ်တုဲ ဂေတ်ဒၟံၚ်ကွာန်မွဲတုဲမွဲ ထ္ပက်ဒၟံၚ်ကရောၚ်ပၞာန် ၜိုတ် (၁၀) ကွာန် ပါလုပ်သီုကဵုကွာန်ကျံက်ခမံက်၊ ဝါယျေတ်၊ ဒုၚ်ကုန်၊ ကမျာၚ်၊ ယၚေဝ် အပ္ဍဲပွိုၚ်ဍုၚ်တယိတ်ချံၚ်တံဂှ်ရ။
ဟိုတ်နူဒပ်ကံၚ်ဇြဳပၞာန် ထ္ပက်လဝ်ကရောၚ်ပၞာန်ဂှ်ရ ညးဒေသဂၠိုၚ်ကဵုလ္ၚီ နူကဵုကွာန် (၁၀) ကွာန် ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံရ။
တုဲကၠုၚ် ပ္ဍဲဂိတုသေပ်တေမ်ဗာ (၂၅) တေံ ကရောၚ်ပၞာန်ကံၚ်ဇြဳပၞာန်ဝွံ စံၚ်ပလီုပလာ်လဝ် သ္ၚိဒၟံၚ် နူကဵုကွာန်ကတောဲ (၂) မတုဲ လုပ်ဂၠိုက်ဂၠါဲ အပ္ဍဲသ္ၚိတံဂှ်တုဲ ကေတ်ဏာလဝ် ကပေါတ်မၞုံကဵုၚုဟ်မးတံဂှ် ဂွံတီကေတ် ဇရေၚ်ညးဒေသတံရ။
ပရိုၚ်−သြၚ်လောန်တိုၚ်(မ်)
ဗီု−Social Media
sanlontai