သၟာပရေၚ်ဍုၚ်ကွာန်ကြုက် ဂြိပ်တိတ်ကၠုၚ်လဝ်နူဍုၚ် ဂွံအခေါၚ်ဗ္ဒဗ္ဒာဲ ပ္ဍဲကနေဒါ

တိုၚ်ပေ၊ အံက်တဝ်ဗာ (၁၁)

ကြဴဴနူဒးဒုၚ်မၚ်ရံၚ်စၟဳစၟတ်ကဵု ညးပိုၚ်ပြဳအဝဵုကြုက်တအ်တုဲ သၟာပရေၚ်ဍုၚ်ကွာန်ဒစဵုဒစးကြုက် ချေန်ဇြေန်မေန် ဂြိပ်တိတ်ကၠုၚ်နူဍုၚ်ဂှ် ကလိဂွံအခေါၚ်ဗ္ဒဗ္ဒာဲ ပ္ဍဲကၟိန်ဍုၚ်ကနေဒါရ။

သၟာပရေၚ်ဍုၚ်ကွာန်ဒစဵုဒစးကြုက် ချေန်ဇြေန်မေန်ဂှ် နဒဒှ်စၟတ်သမ္တီပေါဲဂစိုတ်မၞိဟ် တဳယာန်နာန်မာန် ၁၉၈၉ ဂးတုဲ ဟိုတ်နူပလံၚ်ဗစိုပ်လဝ် လိက်ပံက်ထိုၚ်ကီု၊ ချူလဝ်လိက်ပရေၚ်ပါ်ပါဲကီုဂှ်ရ ဒးဒုၚ်မၚ်ရံၚ်သၟာန်သၟုက်စၟဳစၟတ်ဒၟံၚ်ကဵု ညးပိုၚ်ပြဳအဝဵုကြုက်တအ်ရ။

သၟာပရေၚ်ဍုၚ်ကွာန် ချာန်ဇြေန်မေန် ဒးဒုၚ်ကော်ဒၟံၚ်ဖုၚ်ကဵု ဒပ်ဗၠာဲသၟိၚ်ကြုက်တအ် အရိုဟ်ဒဒှ်တ္ၚဲဂှ် ပ္ဍဲကဵုဂိတုဂျူလာၚ် စၟတ်တ္ၚဲ (၂၁) တုဲကၠုၚ်တေံဂှ်မ္ဂး ဖေက်လကိုတ်အာ လ္တူဒပ်ဗၠာဲသၟိၚ်တအ် စၟဳစၟတ်လဝ် ပရေၚ်ထတ်ယိုတ်စိုတ်ဂှ်တုဲ ဖျေံလဝ်သ္ဂုတ်သွာတ် သွက်ဂွံစ္ဍးတိတ်အာ နူဍုၚ်ရ။

​ဃောတိတ်ကၠုၚ်နူကဵုဍုၚ်ဂှ် ချာန်ဇြေန်မေန် မံၚ်တန်တဴလဝ် ပ္ဍဲထိုၚ်ဝါန် ပါလုပ်သီုဍုၚ်လဴ လကြဴအိုတ်ဏံမ္ဂး အာတ်မိက်လဝ် အခေါၚ် ဗ္ဒဗ္ဒာဲ ပ္ဍဲကၟိန်ဍုၚ်တတိယရ။

ကြဴနူဂှ် ရုၚ်သၟိၚ်ဇၞော်မဟာကုလသမဂ္ဂဆေၚ်ရာကဵုသၟာဒဒိုက်ဂှ် ဆက်စၠောံလဝ် ဇရေၚ်မာဿတာချာန်မေန်ဇြေန်တုဲ သွက်ဂွံစ္ဍးတိတ် ကၟိန်ဍုၚ်တတိယဂှ် ဒုၚ်ကေတ်တဲ ဗွဲမလုပ်သၞောဝ်တုဲ က္လိဂွံလဝ်အခေါၚ်ဗ္ဒဗ္ဒာဲ ပ္ဍဲကၟိန်ဍုၚ်ကနေဒါရ။

ပ္ဍဲကဵုအေန်တာဗျူဌာန်န်ပရိုၚ် RFA တၞဟ်ခြာမွဲဂှ်မ္ဂး မာဿတာချာန် စိုပ်ဒၟံၚ်ကနေဒါဂှ် နကဵုညး သွက်ပရေၚ်မံၚ်စံၚ် ဂၠာဲအာကမၠောန် မမိက်ကဵုမွဲမွဲတုဲ သွက်ဂွံကလေၚ်စပ္တန်ဘဝညး စၟဳပတှ်ေလဝ်ရဂှ်လေဝ် ဟီုထ္ၜးလဝ်ရ။

“အခိၚ်တတ်ကၠောံသၞေဟ်က္ၜၚ်ကျာ ဗာန်ကူဗာဂှ်တှ်ေ အဲမိပ်လောန်မံဟဂှ်ရ၊ ဖျုန်ဂြိုဟ်ကောန်တၟံအဲ ၜိုဟ်သြိုဟ်အာရ၊ တုဲတှ်ေ ညံၚ်ကဵုစိုပ်အာ ဂၠးကဝ်ဗၠးၜးမွဲ အဲဂွံဒုၚ်စသိုၚ်ရ” ဂှ် ချာန်ဟီုလဝ်ရ။

သ္အာၚ်နူဂှ်ပၠန် အလဵုဇကုညး ညးမၚ်မွဲအာ ညံၚ်ဂွံခိုဟ်အိုတ်ရောၚ်ဒှ်တုဲ ကၠောန်ရေၚ်တၠုၚ်အာ ပရေၚ်ရီုဗၚ် ညံၚ်ညးချဳဒရာၚ်ကတိုၚ်ကၟဟ် ဒဳမဝ်ကရေဇြဳတအ် ဂွံပလှ်ဖျေံအဝဵု ဗော်ကောန်မျူနေတ်ကြုက် ညံၚ်ဇြဟတ်ဂွံခိုဟ်တိုန်ရောၚ်ဂှ် ဟီုလဝ်ရ။

အလဵုအသဳဗော်ကောန်မျူနေတ်ကြုက်ဂှ် ပါဲနူရပ်ဒက်ဖျေံထံၚ် ညးချဳဒရာၚ်ကတိုၚ်ကၟဟ်ပရေၚ်ဍုၚ်ကွာန်တအ်တုဲ ယဝ်ရလုပ်ဗ္ဒဗ္ဒာဲ ပ္ဍဲကၟိန်ဍုၚ်အာယှဒိုဟ်အဂၞဲမ္ဂးလေဝ် ပရေၚ်ဖ္အောဝ်စကာကဵု အလဵုအသဳကၟိန်ဍုၚ်မဆေၚ်စပ်တအ် ရပ်စပ်မွဲကဆံၚ် နွံဒၟံၚ်ရဂှ် ဂွံတီကေတ်ရ။

Ref – RFA