ထဝါဲ၊ အံက်တဝ်ဗာ(၁၂)
ရးဒေသဇၞော်တၞၚ်သြဳ။ ပွိုၚ်ဍုၚ်ထဝါဲ၊ ပၞောဝ်ကဵုမၞိဟ်တြုံ ကောန်ဒေသ ဒပ်ကံၚ်ဇြဳပၞာန် ရပ်ကေတ်ဏာလဝ် နူကွာန်မောၚ်မေဝ်ယှောၚ် ပိတၠဂှ် ၜိုန်ရကလေၚ်ဆဵုလဝ် ဇွမၞိဟ်မွဲတၠကီုလေဝ် သှ်ေမၞိဟ်ဒၟံၚ်ၜါတၠဂှ် ကၠေံဒၟံၚ်ဖိုဟ်ဏီရဂှ် ဂွံတီကေတ် နူညးဒေသတအ်ရ။
ကြဴနူညးယိုက်ဝန်ထံၚ်ထဝါဲၜါတၠ ဒးဒုၚ်ဂစိုတ်လဝ် ဗ္ဒာဲကွာန်မောၚ်မေဝ်ယှောၚ် ပ္ဍဲကဵုဂိတုအံက်တဝ်ဗာ စၟတ်တ္ၚဲ (၁) တုဲကၠုၚ်တေံတုဲဂှ် ဒပ်ကံၚ်ဇြဳပၞာန် လုပ်ကၠုၚ်ကွာန်တုဲ ရပ်ကေတ်ဏာလဝ် ကိုဝ်တာဂါန်၊ ကိုဝ်မျိုဝ်သွေ ကေုာံမောၚ်အပုကျူ အယုက် (၁၄) သၞာံ မဒှ်ကောန်ဒေသတအ်ရ။
ပ္ဍဲကဵုညးပိတၠဂှ် ကလေၚ်ဆဵုလဝ် ဇွကိုဝ်တာဂါန် ပ္ဍဲကဵုဂိတုတဝ်ဗာ စၟတ်တ္ၚဲ (၉) ပ္ဍဲကဵုၜဳထဝါဲတုဲ လ္ပာ်ဂကောံအိန်ထံၚ်ညးတအ်ဂှ် ဒဒှ်ရဒှ်ကိုဝ်တာဂါန်ဍာံဍာံ သ္ပကဵုလဝ်ဒ္တန်ရ။
ဆ္ဂးကိုဝ်မျိုဝ်သွေကဵု မောၚ်အပုကျူ အယုက် (၁၄) သၞာံ ဒပ်ကံၚ်ဇြဳပၞာန်ရပ်ကေတ်ဏာလဝ်တအ်ဂှ် စဵုကဵုဂိတုအံက်တဝ်ဗာ စၟတ်တ္ၚဲ (၁၁) ဏံ ကၠေံဒၟံၚ်ဖိုဟ်ဏီရဂှ် ညးဒေသတအ်ဟီုလဝ်ရ။
ပ္ဍဲကဵုသၞေဟ်ၜဳ ဒၞာဲဒပ်ကံၚ်ဇြဳပၞာန် ရပ်ကေတ်ဏာလဝ် ကောန်ဒေသ (၃) တၠဂှ်မ္ဂး ပါဲနူဒၞာဲဍာပ်ဍေန်ဒၟံၚ်ဆီတုဲ ဂွံဆဵုကေတ်လဝ် ကဝးဇုက်ဒက်လဝ် ဃောရပ်ကေတ်ဏာလဝ်ရဂှ် ဟီုလဝ်ရ။
ပ္ဍဲရးတၞၚ်သြဳဂှ်မ္ဂး ပ္ဍဲဂိတုသေပ်တေမ်ဗာ တုဲကၠုၚ်ဏံ ကောန်အရာပ် (၂၉) တၠ ဒးဒုၚ်ပြိုက်ဂစိုတ်လဝ်ရဂှ် ဂကောံသုတေသန ပ္ဍဲဒေသတအ်ဂှ် လလောၚ်တြးလဝ်ရ။
ပရိုၚ် – သြၚ်လောန်တိုၚ်(မ်)
ဗီု – Social Media
sanlontai