ဖျေံကဵုလဝ်တန်ဗ္တောန်ဆေၚ်ကဵုပရေၚ်ဂီုကၠီုညးဍုၚ်ကွာန် ပ္ဍဲဒေသပၞာန်လ္ပာ် ကရေၚ်ဍာဲ

ကရေၚ်ဍာဲ – အံက်တဝ်ဗာ(၁၂)

ကိစ္စဆေၚ်စပ်ကဵု ပရေၚ်ဂီုကၠီုညးဍုၚ်ကွာန် ကောန်ဒပ် ဒပ်ပၞာန်စဵုဒၞာညးဍုၚ်ကွာန် (PDF)၊ ဌာနဝန်ဇၞော်ပရေၚ်စဵုဒၞာ၊ အလဵုအသဳညဳသၟဟ်ကောန်ဂကူတအ် ဒးဒ္ဂေတ်ဗက်ဂှ် ဖျေံကဵုလဝ် ပ္ဍဲဒေသပၞာန်လ္ပာ် ကရေၚ်ဍာဲရဂှ် MOD လလောၚ်တြးလဝ် ပရိုၚ်ရ။

ပ္ဍဲကဵုဂိတုသေပ်တေမ်ဗာ သတ္တာဟလကြဴဴအိုတ် တုဲကၠုၚ်တေံဂှ် ဗ္တောန်ဖျောန်ဖျေံပ္တိုန်ကဵုလဝ် ညးတာလျိုၚ်ဌာနပရေၚ်ဂီုကၠီုညးဍုၚ်ကွာန် ကေုာံသၞဴဴဒဴအလုံတံဒပ်မွဲ မွဲကရောံကဵုသ္ဂံၚ် PDF မၞုံပ္ဍဲဒေသပၞာန်လ္ပာ်တအ် လိက်စံၚ်လလောၚ်တြးအခေါၚ်အရာမၞိဟ် (Universal Declaration of Human Rights)၊ သၞောဝ်ဥပဒေရီုဗၚ်ဗ္စာရဏာပရေၚ်မၞိဟ်ကၟိန်ဍုၚ်နာနာ (International Humanitarian Law)၊ ဒ္ဂေတ်ဝတ်ကောန်သ္ဂံၚ်ဂမၠိုၚ် (Code of Conduct)တအ် ပ္ဍဲကဵုဌာန်မုက်ပၞာန် မွဲဒၞာဲရ။

ပ္ဍဲကဵုတန်ဗ္တောန်ဂှ် သောၚ်ကလးကဵုလဝ် ဗီုပြၚ်ဒပ်ပၞာန်စဵုဒၞာညးဍုၚ်ကွာန်၊ ဌာနဝန်ဇၞော် ပရေၚ်စဵုဒၞာ၊ အလဵုအသဳညဳသၟဟ်ကောန်ဂကူ ဂွံက္တဵုဒှ်ကၠုၚ်ကီု၊ ဗီုပြၚ်ဒက်ပ္တန်ကီု၊ တၚ်ရန်တၟံ ကေုာံလၟေၚ်က​မၠောန်တအ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

သ္အာၚ်နူဂှ်ပၠန် တၚ်အပိုၚ်အခြာ ဆေၚ်ကဵုသွာၚ်ပၞာန်တအ်ဂှ် သွက်ဂွံသောၚ်စိုတ် ဂွံညာတ်ကၠးဂှ် အစဳအဇန်နတဲတအ်လေဝ် ပ္ကတ်ပကေၚ်ကဵုလဝ်ရဂှ် ဂွံတီကေတ်ရ။

ပရိုၚ် – သြၚ်လောန်တိုၚ်(မ်)

​ဗီု – MOD