ဟိုတ်နူပရေၚ်ဗ္တိုက် ဗ္ဒိုပ်ပါဲဒဴဘဲပၞာန် မုၚ်လာၚ်ခက်တုဲ ပရေၚ်ပၠန်ဂတး ညိၚ်စှ်ေအာဟွံသေၚ်ပုဟ်ဂှ် EAO တံ ကလေၚ်ခၠေဝ်ပလန်

လာၚ်ဇြာ၊ အံက်တဝ်ဗာ (၁၂)

ဟိုတ်နူပရေၚ်ဗ္တိုက်ပကီုပရာပ် ဒပ်ကံၚ်ဇြဳပၞာန် လ္တူဗ္ဒိုပ်ပါဲဒဴဘဲပၞာန် မုၚ်လိုၚ်ခက် နူကဵုတွဵုရးကချေၚ် ညးဍုၚ်ကွာန်ကောန်အရာပ်ဗွဲမဂၠိုၚ်ဂၠေၚ် ပါလုပ်သီုကောန်ၚာ်တံ မဒးချိုတ်အာလဝ်ဂှ်တုဲ ပရေၚ်ပၠန်ဂတး ညိၚ်စှ်ေအာဟွံသေၚ်ပုဟ်ဂှ် EAO တံ ကလေၚ်ခၠေဝ်လဝ်ရ။

ဒၟါနူဗ္ဒိုပ်ပါဲဒဴဘဲပၞာန် မုၚ်လိုၚ်ခက် မၞုံဗ္ဒါဲလာၚ်ဇြာ ဌာန်ဂအုပ်ဂကောံဗၠးၜးကချေၚ် (KIO/KIA) ဒးဒုၚ်ထောံမခတိုဟ် ဗ္တိုက်တုဲဂှ် ပါလုပ်သီုကောန်ၚာ်တံဂှ် ကောန်အရာပ် (၃၀) တၠ ဟွံအောန် ချိုတ်လဝ်တုဲ ဗ္ဒါဲ (၆၀) ကလိဂွံလဝ်ဝပ်ရ။

ပ္ဍဲဂိတုအံက်တဝ်ဗာ (၉) အခိၚ်သ္ဂာဗ္တံဂှ် ဒပ်ကံၚ်ဇြဳပၞာန် ကၠောန်သ္ပပန်ပှော်ဏာလဝ်တရဴကျာ ကုဗ္ဒိုပ်ပါဲဒဴဘဲပၞာန် မုၚ်လိုၚ်ခက် နကဵုတၚ်ရန်တၟံနွံနွံရောၚ် ဂကောံမၚ်ရံၚ်အခေါၚ်အရာမၞိဟ်ကချေၚ် KHRW လလောၚ်ပ္တိတ်လဝ်ရ။

ပ္ဍဲကဵုညးမချိုတ်အာဂမၠိုၚ် ကောန်ၚာ်သၟတ် ၁၃ တၠ ပါလုပ်လဝ်တုဲ လ္တူပြဝကံၚ်ဇြဳပၞာန်တံဂှ် ဂကောံဗော်သွး အပ္ဍဲဍုၚ်၊ မ္ၚးဍုၚ်ဂမၠိုၚ် ပါ်ပါဲဖျေံကဝု သ္ကာတ်တ်မြဟ်ဟ်တံ နွံဒၟံၚ်ရ။

ပြဝဗ္တိုက်ဒပ်ကံၚ်ဇြဳပၞာန် လ္တူဗ္ဒိုပ်ပါဲဒဴဘဲပၞာန် သာ်ဏံဂှ်ဝွံ ကလိလောန်ဒၟံၚ် အမှုရာဇဝတ်ပၞာန် မံက်က်ထေၚ်ၚ်ရောၚ်ဂှ် ညးမၞုံအခေါၚ်ဟီုဂး ဗော်သွးကောန်ဂကူကရေၚ် KNU ပဒိုဝ်သဝ်ကလေဝ်သေ ဟီုရ။

“ပြဝသာ်ဏံဂှ် ကလိလောန်ဒၟံၚ် အမှုရာဇဝတ်ပၞာန် မံက်က်ထေၚ်ၚ်ရောၚ်ဟီုဂှ် ပိုယ်တံ ဒုၚ်တဲကၠိုဟ်လဝ်သာ်ဏံရ” သာ်ဝွံ ပဒိုဝ်သဝ်ကလေဝ်သေ ဟီုရ။

ညးမၞုံအခေါၚ်ဟီုဂး ဒပ်ပၠတရဴကောန်ဂကူချေၚ် (CNF/CNA) သလိုၚ်ထက်နဳဂှ် ဟိုတ်နူပြဝ ကံၚ်ဇြဳပၞာန် မဗ္တိုက်ပကီုပရာပ်လဝ်ဂှ်တုဲ ပ္ဍဲပရေၚ်ပၠန်ဂတးဂှ် ညိၚ်အာဟွံသေၚ်တုဲ ဆက်တုဲဇြဟတ်ခိုဟ်ကၠုၚ်ဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ဒပ် KNU ကဵု CNF တံဝွံ ဒှ်ဂကောံရပ်လွဟ်ကောန်ဍုၚ်အရၚ် မဗ္တိုက်ပၠန်ဂတးဒၟံၚ်ကဵု ကံၚ်ဇြဳပၞာန် သ္ကာတ်တ်မြဟ်ဟ်တုဲ သၞာံဏံ အပ္ဍဲဂိတုဂျာန္နဝါရဳဂှ် ဌာန်ဂအုပ် CNF မၞုံအပ္ဍဲတွဵုရးချေၚ်ဂှ် ဒပ်ကံၚ်ဇြဳပၞာန် ကၠောန်သ္ပဗ္တိုက်ဂြာတ်လဝ်မခတိုဟ်တံဂှ်တုဲ ပ္ဍဲကဵုတိဍာ်ကဝ်တူလေဝ် KNU ဂှ်လေဝ် ဒပ်ကံၚ်ဇြဳပၞာန် ဗ္တိုက်ဂြာတ်ဒၟံၚ်မခတိုဟ်တံ ကၠောန်သ္ပဒၟံၚ်ရ။

ညးမၞုံအခေါၚ်ဟီုဂး ကံၚ်ဇြဳပၞာန် သ္ကိုပ်ဗိုလ်ဇၞော် ဇြဝ်မေန်ထောန်ဂှ် လ္တူလၟေၚ်ဒဒှ် ဗ္ဒိုပ်ပါဲဒဴဘဲပၞာန် မုၚ်လိုၚ်ခက် မၞုံဗ္ဒါဲဌာန်ဂအုပ် KIO/KIA ဒးဒုၚ်ဗ္တိုက်ဂှ် ဒဒှ်ရဒပ်ကံၚ်ဇြဳပၞာန် ကၠောန်သ္ပလဝ်ဟွံသေၚ် ကယျာန်ပါဲလဝ်တုဲ ဒၞါဲဒှ်ပရေၚ်ဗ္တိုဟ်ထ္ကးဂှ်ဝွံ ဒှ်ဒၞါဲ KIO/KIA တံ စွံလဝ် Drop Bomb ဗ္တိုဟ်ထ္ကးအာရောၚ်ဂှ် စောတ်စောဲလဝ်ရ။

ညးမၞုံတာလျိုၚ် ဂကောံမၚ်ရံၚ်အခေါၚ်အရာမၞိဟ်ကချေၚ် KHRW မွဲတၠဂှ် ကောန်အရာပ်ဗွဲမဂၠိုၚ်ဂၠေၚ် ဒးချိုတ်အာဂှ်ဝွံ ဒၟါနူပရေၚ်ဗ္တိုက်တရဴကျာ ဒပ်ကံၚ်ဇြဳပၞာန်တံရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ ကံၚ်ဇြဳပၞာန်ဂှ် အရေဝ်ဍေံတံဟီုဂှ်ကဵု မဒှ်ဒၟံၚ်ဗလးတိဏံဂှ် တၞဟ်ခြာဒၟံၚ်ဟဂှ်ရ။ အကာဲအရာက္တဵုဒှ်နူဏေံတေံ ( အံက်တဝ်ဗာ ၉) ဂှ် ရံၚ်အာမ္ဂး မၞိဟ်ဗွဲမဂၠိုၚ်ဂၠေၚ် ဒးချိုတ်အာဂှ်ဝွံ ဒၟါနူကံၚ်ဇြဳပၞာန် ထောံမခတိုဟ် ကုက္ၜၚ်ကျာတံရဏောၚ်။ ဟီုမ္ဂး လ္တူပြဝဍေံတံဂှ် သာ်ဏံရ ဍေံတံလေပ်ဟီုတဴရ” သာ်ဝွံ ညးတာလျိုၚ် KHRW ဟီုရ။

ဟိုတ်ဂှ်ရ ကုဂကောံဗော်သွး ကေုာံ မၞိဟ်ပူဂဵု မထံက်ပၚ်ရီုဗၚ်ကဵုဒၟံၚ် ပွပကီုပရာပ်ကံၚ်ဇြဳပၞာန်တံဂှ် သွက်ဂွံကေတ်ကဵုအရေဝ် ဗွဲမစိုပ်တရဴဂှ်ကီု၊ ကံၚ်ဇြဳပၞာန် မကလိလောန်ဒၟံၚ် အမှုရာဇဝတ်ပၞာန်ဂှ် သွက်ဂွံကေတ်အရေဝ်ရေၚ်တၠုၚ်ကဵု ပ္ဍဲကဵုရုၚ်သၞောဝ်ဓဝ်ဂၠးတိ ဗွဲမပြဟ်ဂှ် ဂကောံမၚ်ရံၚ်အခေါၚ်အရာမၞိဟ်ကချေၚ် KHRW လလောၚ်ပ္တိတ်လဝ် လစွံစိုတ်ရ။

အလဵုအသဳညဳသၟဟ်ဂကူ NUG ဂှ်လေဝ် ကုဒပ်ကံၚ်ဇြဳပၞာန် မကလိလောန်လဝ် အမှုရာဇဝတ်ပၞာန် လ္တူဂကူမၞိဟ်တံဂှ် နကဵုဍုၚ်သ္အာၚ်ဂမၠိုၚ် သွက်ဂွံကေတ်ကဵုအရေဝ် ဗွဲမစိုပ်တရဴဂှ် ပ္ဍဲဂိတုအံက်တဝ်ဗာ (၁၀) တေံ လလောၚ်ပ္တိတ် အာတ်မိက်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−CJ/Social Media