KNU ဟီု ဒပ်ကံၚ်ဇြဳပၞာန် က္ၜၚ်ကျာမပါမ္ဂး ဗ္တိုက်ပၞာန်ဟွံလေပ်ရ

ညံၚ်လေဝ်ပေန်၊ အံက်တဝ်ဗာ (၁၂)

ဒပ်ကံၚ်ဇြဳပၞာန် မပြဟ်လလုဲဂၠိုၚ်ဒၟံၚ် ပ္ဍဲကဵုပေါဲဗ္တိုက်ဗလးတိတံဂှ် က္ၜၚ်ကျာဟွံပါမ္ဂး စိုပ်ဒၟံၚ်ဍာ် ဗ္တိုက်ပၞာန်ဟွံဂွံရဂှ်တုဲ ဒမြိပ်ဒးချိုတ်တံဂှ်လေဝ် ဂၠိုၚ်ကၠုၚ်ဒၟံၚ်ရောၚ် ညးမၞုံအခေါၚ်ဟီုဂး KNU ပဒိုဝ်သဝ်တဝ်နဳ ဟီုဂးလဝ်ရ။

ပ္ဍဲကဵုတိဍာ်အုပ်ဓုပ်ကဝ်တူလေဝ် ဗော်သွးကောန်ဂကူကရေၚ် KNU ဂှ် အကြာဒပ်ကံၚ်ဇြဳပၞာန်ကဵု ဒပ် KNLA, KNDO တံဂှ် အပ္ဍဲသၞာံဏံ အပ္ဍဲပွိုၚ် ၉ သၞာံဂှ် ပေါဲဗ္တိုက်အပံၚ် ၃၀၀၀ ပြၚ် က္တဵုဒှ်လဝ်ရောၚ် ပ္ဍဲဂိတုအံက်တဝ်ဗာ ၁၁ တေံ KNU ဗဟဵု လလောၚ်ပ္တိတ်လဝ်ပရိုၚ်ရ။

အပ္ဍဲပေါဲဗ္တိုက်တံဏံဂှ် နူကဵုဒပ်ကံၚ်ဇြဳပၞာန်ဂှ် ပါလုပ်သီုကဵုသၞာဲဒဴမၞုံကဵုကဆံၚ်ဂမၠိုၚ်ဂှ် ကောန်ဒပ်အပံၚ် ၃၈၆၅ တၠ ချိုတ်အာလဝ်တုဲ ၂၂၆၀ တၠ ဇီုကပိုက်ကလိဂွံလဝ်ဝပ်ရောၚ် ပါလုပ် ပ္ဍဲတၚ်လလောၚ်တြးဂှ်ရ။

ညးမၞုံအခေါၚ်ဟီုဂး KNU ပဒိုဝ်သဝ်တဝ်နဳဂှ် ကောန်ဂကောံဒပ်ကံၚ်ဇြဳပၞာန် ပ္ဍဲဗလးတိဏံဂှ်ဝွံ စိုတ်ဓာတ်တံလေဝ် လီုလာ်ဆောတ်ယောၚ်ဒၟံၚ်တုဲ ပေါဲဗ္တိုက်က္တဵုဒှ်ယျဟီုမ္ဂး စိုပ်အာဍာ် က္ၜၚ်ကျာဟွံပါမ္ဂး ဗ္တိုက်ပၞာန်ဟွံဂွံတံရဂှ်တုဲ ဒမြိပ်ကောန်ဒပ်ကံၚ်ဇြဳပၞာန် ချိုတ်တံဂှ်လေဝ် ဂၠိုၚ်ကၠုၚ်ဒၟံၚ်ရောၚ် ဟီုရ။

သ္အာၚ်နူဂှ်ပၠန် ဟိုတ်နူကဵုအကာဲအရာ ဗလးတိ ဒပ်ကံၚ်ဇြဳပၞာန် မ္ဒးဂဗဒၟံၚ် ပရေၚ်ချိုတ်ဇီုကပိုက်တံဂှ်တုဲ ပရေၚ်အုပ်ဓလီုတိဍာ် ဒပ်ကံၚ်ဇြဳပၞာန်တံ အောန်စှ်ေကၠုၚ်တုဲ တိဍာ်ဆောံလေၚ်တံလေဝ် ဆက်တုဲထပ်က္တဵုဒှ်ဒၟံၚ်ဏီရောၚ်ဂှ် ပဒိုဝ်သဝ်တဝ်နဳ သ္ဂးရ။

အတိုၚ် KNU လလောၚ်ပ္တိတ်လဝ်ဂှ်မ္ဂး ပ္ဍဲကဵုပေါဲဗ္တိုက်က္တဵုဒှ်လဝ် အပ္ဍဲပွိုၚ် ၉ ဂိတုဂှ် လ္ပာ်ဒပ်ပၞာန်ဗၠးၜးကောန်ဂကူကရေၚ် KNLA, ဒပ်စဵုဒၞါကောန်ဂကူကရေၚ် KNDO တံဂှ် ဒးသၠးလဝ်လမျီု သွက်ဍုၚ်သွက်ဂကူဂှ် ၁၁၂ တၠ နွံတုဲ ၃၉၉ တၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ်ရ။

စနူဒပ်ကံၚ်ဇြဳပၞာန် သီအဝဵုတေံတုဲ စဵုကဵုဂိတုဂျူလာၚ် သၞာံ ၂၀၂၃ ဂှ် ဟိုတ်နူပရေၚ်ဗ္တိုက်ပၞာန်ထ္ပက် ဒပ်ပံၚ်ကောံမဟာမိတ် KNLA တံဂှ်တုဲ ဗ္ဒိုပ်ဒပ်ကံၚ်ဇြဳပၞာန် ၆၂ ဆောံလေၚ်အာလဝ်ရ။

အပ္ဍဲကာလသီအဝဵုဏံ တိဍာ်ထိၚ်ဒဝ် KNU တံလေဝ် သာတုဲသၠဲလးကၠုၚ်ဂှ် ဇာဇၞိက်အထံက်ရီုပရေၚ်ၜိုဟ်လလမ်ကရေၚ် KPSN လလောၚ်ပ္တိတ်လဝ် လိက်ဒုၚ်စဳရေၚ်ရ။

ပရိုၚ်−သြၚ်လောန်တိုၚ်(မ်)

ဗီု−MOI