နေဗျဳဒဝ်၊ အံက်တဝ်ဗာ(၁၂)
ပွဖျေံဒဏ်ထံၚ်မွဲအာယုက် ကုကောန်ဂကောံကံၚ်ဇြဳပၞာန်တြေံ ဒုသ္ကိုပ်ပၞာန်ဇၞော် မိုဝ်မျေတ်ထောန် ကေုာံ သ္ကိုပ်ဗိုလ်ဇၞော် ယာန်နံၚ်သဵု မက္လိလောန်လဝ် အမှုဖံက်သစ္စကုကၟိန်ဍုၚ်တံကဵု အမှုစလာဘ်ဗ္ဇဴမပါလုပ်တံဂှ် ဒုဟ်ဒဏ်ဍိုန်ၜတ်မံၚ်ရဂှ် ညးခါတ်အကာဲပရေၚ်ဍုၚ်ကွာန်တံ ပါ်ပါဲလဝ်ရ။
ကံၚ်ဇြဳပၞာန်သီအဝဵုဂှ် ဒုသ္ကိုပ်ပၞာန်ဇၞော်မိုဝ်မျေတ်ထောန်ကေုာံ သ္ကိုပ်ဗိုလ်ဇၞော်ယာန်နံၚ်သဵုတံ အခိၚ်ယိုၚ်ဂၠေၚ်မံၚ်တာလျိုၚ်ဂှ် သုၚ်စောဲအခေါၚ်အဝဵုတံတုဲ က္လိလောန်ပွဖံက်သစ္စကုကၟိန်ဍုၚ်တံ၊ ကေတ်ကၠုၚ်ပရၚ်တဲလာဘ်ဗ္ဇဴ နူဇရေၚ်တၠကမၠောန်ပရေၚ်ပိုန်ဒြပ်တံ၊ ပါလုပ်ကၠောန်သ္ပကၠုၚ်လဝ် ပ္ဍဲပရေၚ်ပိုန်ဒြပ်လ္ပာ်အရာပ်တံရဂှ် သ္ဂးရ။
ဟိုတ်နူပြဝတံဏံတုဲ ကြဴနူပံက်ဂဗုတ်စၟဳတ် နကဵုၝောံပိုဒ်ဆေၚ်စပ် ပ္ဍဲရုၚ်သၞောဝ်ဓဝ်ပၞာန်တံ ကုညးတံၜါတၠဂှ်တုဲဂှ် ဖျေံစၟတ်ထောံဒုဟ်ဒဏ် ဒဏ်ထံၚ်မွဲအာယုက် ညဳသၟဟ်ကဵု ပွိုၚ်(၂၀)သၞာံဂှ်ရဂှ် ပ္ဍဲဂိတုအံက်တဝ်ဗာ စၟတ်တ္ၚဲ (၁၀)ဂှ် ကံၚ်ဇြဳပၞာန် လလောၚ်ပ္တိတ်လဝ်ရ။
ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သဵုနာၚ်ဂှ်တှ်ေ ဒုဟ်ဒဏ် သ္ကိုပ်ဗိုလ်ပၞာန်ၜါတၠတံ က္လိလောန်လဝ်တံဂှ် သုၚ်စောဲအခေါၚ်အဝဵုတုဲ ဟိုတ်နူသ္ကဵုဇီုကပိုက်ကၠေံ လ္တူကၟိန်ဍုၚ် တၟာဂလိုၚ်ဂှ်ရ ဒးဖျေံစၟတ်ဒဏ်ဂစိုတ်ရောၚ်မဒှ်တုဲ ပ္ဍဲလၟေၚ်ဒဒှ်ဏံဂှ် ဒုဟ်ဒဏ်ဍိုန်ၜတ်မံၚ်ရဂှ် ပါ်ပါဲလဝ်ရ။
“အမှုဍေံတံကလိလောန်လဝ်ဂှ် ဍာံဍာံဂှ် ဒးဖျေံစၟတ် ဒဏ်ထံၚ်မွဲအာယုက်ရ။ ဒးကဵုဒဏ်ဂစိုတ်ရ။ ကုဂျေန်မဳ ကေုာံ ဇြေယျာတဝ်တံပန်တၠ က္လိလောန်လဝ်လ္တူကၟိန်ဍုၚ်ၜက်က်ၜေတ်တ် ဗီုဍေံတံမုဟွံမွဲမွဲသာ်ဂှ် ကဵုဒဏ်ဂစိုတ်ထ္မံက်ရုပ်ရဴနတဲတုဲတှ်ေ မေန်အံၚ်လှာၚ်ဂစိုတ်လဝ်ရ။ ဂှ်တှ်ေ ယဝ်ရမိက်ဂွံကၠောန်ကွေံကွေံတှ်ေ ဒုဟ်ဒဏ်ထေက်ကြိုက်အိုတ်ဂှ်တှ်ေ နကဵုကဆံၚ်ဒၞါဲဏံ စလာဘ်ဗ္ဇဴၜက်က်ၜေတ်တ်ဂလိုၚ်ဏံ၊ သုၚ်စောဲအဝဵုဟွံဒးကဵုဒၞါဲတံဂှ် ဒှ်ကိစ္စထေက်ကဵု ဒးကဵုဒဏ်ဂစိုတ်ရ။ လၟုဟ်ဂှ် ကိစ္စဒဏ်ထံၚ်မွဲအာယုက်ဟီုဂှ်တှ်ေ လက္ကရဴအိုတ်တှ်ေ ကၠောန်စဵုကဵုစိုပ်ကဆံၚ်ဗၠးတိတ်ရ” သာ်ဝွံ သ္ဂးရ။
ဒုသ္ကိုပ်ပၞာန်ဇၞော်မိုဝ်မျေတ်ထောန် မဒှ်မၞိဟ်ပတှ်ေက္ဍိုပ်သ္ကိုပ်ပၞာန်ဂှ် ဒှ်ညးယိုက်ဂၠေၚ်လဝ်တာလျိုၚ် နဒဒှ် ဥက္ကဋ္ဌ ကဝ်မယှေန်ပရေၚ်ဓလိုက်တမ်ရိုဟ်ကၟိန်ဍုၚ်ဗၟာ၊ ဥက္ကဋ္ဌကဝ်မတဳကောပ်ကာဲပရေၚ်သုၚ်စောဲသြန်ဍုၚ်သ္အာၚ်၊ ဥက္ကဋ္ဌကဝ်မတဳဗဟဵု ပရေၚ်သၠာဲဂတးဗၞိက်ကေုာံ ပရေၚ်ဗၞိက်ဇွောဝ်စှ်ေ သ္ဂောံမြက်ဇက်ဍာံစၟတ်တံ မဒှ်ရ။
သ္အာၚ်နူဂှ်ပၠန် သ္ကိုပ်ဗိုလ်ယာန်နံၚ်သဵု ညးမဒှ်အထံက် ဒုသ္ကိုပ်ဗိုလ်ဇၞော် မိုဝ်မျေတ်ထောန်ဂှ်လေဝ် ကေတ်လဝ်တာလျိုၚ် နဒဒှ်ဝန်အပ္ဍဲပံၚ်တောဲ ကဝ်မတဳ ပရေၚ်သၠာဲဂတးဗၞိက် ကေုာံ ပရေၚ်ဗၞိကဇွောဝ်စှ်ေ သ္ဂောံမြက်ဇက်ဍာံစၟတ်တံဂှ်ရ။
ဗိုလ်ဇၞော်CDM ကံၚ်တူဝေန်ဂှ်လေဝ် ၜိုန်ရကံၚ်ဇြဳပၞာန်တံ ဖျေံစၟတ်လဝ်ဒဏ်ထံၚ်မွဲအာယုက် လ္တူသ္ကိုပ်ဗိုလ်ပၞာန်ၜါတၠဂှ်ကီုလေဝ် ကိုပ်ကၠာနူသၞာံဟွံပေၚ်ဂှ် ကလေၚ်ဗၠးကၠုၚ်မာန်မံၚ်ရဂှ် ဟီုရ။
“သ္ကိုပ်ဗိုလ်ပၞာန်တံ ဒးထံၚ်မ္ဂး အကာဲအရာ ဒးမံၚ်ဝါတ်တ်ကျာတ်တ် ဍောၚ်ၚ်ၜိုတ်တ် ဗီုကောန်ထံၚ်ဒးမံၚ်ထံၚ် နကဵုအမှုရာဇဝတ်တၞဟ်ဟ်တံဂှ် ဟွံမွဲရ။ ဍေံတံဂှ် ဂွံမံၚ်ၜိုဟ်ဟ်သြိုဟ်ဟ် သက်က်သာသာဂှ်ရ ဂၠိုၚ်ရ။ တုဲပၠန် ပ္ဍဲထံၚ်ဂှ်လေဝ် ဍေံတံသုၚ်စောဲလှုဲမာန်မ္ဂး ၜိုတ်မာန်ဂှ် ဍေံတံဂွံမံၚ်ၜိုဟ်ဟ်သြိုဟ်ဟ်ရ။ တုဲပၠန် ဍေံတံဂှ် မွဲအခိၚ်တေံဂှ် ဒှ်ညးကေတ်လဝ်တာလျိုၚ်ကၟိန်ဍုၚ် ဒၞါဲကဆံၚ်သၠုၚ်ၚ်တံဂှ်တှ်ေ ပ္ဍဲဒၞါဲဒးဒုၚ်မၚ်ရံၚ်ကဵု ညးယိုက်ဝန်ထံၚ်တၞဟ်ဟ်တံဂှ်လေဝ် သက်သာအိုတ်ရ။ တုဲပၠန် တ္ၚဲဗၠး၊ တ္ၚဲယအ်တံဂှ်လေဝ် မၞိဟ်တံဏံဂှ် အတိုၚ်လၟေၚ်ဍာံဂှ် ယအ်တုဲတှ်ေ (၂၀)သၞာံရ ဟီုဟီုရ။ စိုပ်အခိၚ်မ္ဂး သၞာံဟွံပေၚ်မွဲသာ် အကာဲအရာဗၠးကၠုၚ်ကဵုတ္ၚဲယအ်အ်တံ နွံမံၚ်ရ” သာ်ဝွံ ဟီုဂးလဝ်ရ။
ဒၞါဲဒုသ္ကိုပ်ဗိုလ်ဇၞော်မိုဝ်မျေတ်ထောန် ဒးဒုၚ်ဖျေံလဝ်ဒဏ်ထံၚ်မွဲအာယုက်ဂှ် က္ဍိုပ်သ္ကိုပ်ပၞာန် ထ္ပက်အဇာခါန်ကၞက်လဝ် သ္ကိုပ်ဗိုလ်ဇၞော် မျထောန်ဥူရ။
အတိုၚ်ပရိုၚ်ပ္ဍဲဒပ်တံဂှ်မ္ဂး ဒုသ္ကိုပ်ပၞာန်ဇၞော် မိုဝ်မျေတ်ထောန်ဂှ် သုၚ်စောဲထောံ ဒဝ်ဠာအမေရိကာန် ဗ္ဒါဲ(၅) ဘဳလျာန်တံ ဒၞါဲဗၠေတ်တ်ရဂှ် သ္ဂးလဝ်ကီုလေဝ် ကံၚ်ဇြဳပၞာန်ဂှ်တှ်ေ လလောၚ်ပ္တိတ်လဝ် ချိုတ်တ်ပၠိုတ်တ်တံ ဟွံမွဲဏီရ။
ကုသ္ကိုပ်ဗိုလ်ၜါတၠ ကၠောန်သ္ပလဝ် ညံၚ်ပရေၚ်ပိုန်ဒြပ်ကၟိန်ဍုၚ် သာတုဲသ္ဂောံကြေပ်ဂြတ်ကၠုၚ်တံဂှ် ထေက်ကဵုဒးကၠောန်သ္ပ ပရေၚ်ကေတ်အရေဝ် သာတုဲစိုပ်တရဴတံရောၚ်ဂှ် ပွထံက်ထ္ၜးတံ နွံမံၚ်ရ။
ပွဖျေံစၟတ်ဒဏ်ထံၚ်မွဲအာယုက် ကုသ္ကိုပ်ဗိုလ်ၜါတၠ ဗီုလၟုဟ်ဂှ် ထိၚ်ဒဝ်ညံၚ်ပ္ဍဲဒပ်ဟွံဂွံဒှ် ပရေၚ်ကလိုက်ကၟဵုရဂှ် ညးခါတ်အကာဲပရေၚ်ဍုၚ်ကွာန်တံ သ္ၚဳဂၠိပ်လဝ်ရ။
ပရိုၚ်-သြၚ်လောန်တိုၚ်မ်
ဗီု-MOI
sanlontai