ပ္ဍဲရးတၞၚ်သဳ အပ္ဍဲအကြာတ္ၚဲတံဏံ သ္ၚိဒၟံၚ်ညးဒေသ ဒးဒုၚ်စံၚ်ပလီုပလာ်ဒၟံၚ်အဆက်က်

ထဝါဲ၊ အံက်တဝ်ဗာ (၁၂)

ရးဒေသဇၞော်တၞၚ်သဳ၊ ပ္ဍဲကဵုပွိုၚ်ဍုၚ်ပဠဝ်၊ တယိတ်ချံၚ်၊ ထဝါဲ ကေုာံ ပ္ဍဲကဵုပွိုၚ်ဍုၚ်ဍာ်ဗုတံဂှ် အပ္ဍဲဂိတုဏံ သ္ၚိဒၟံၚ်ညးဒေသတံ ဒးဒုၚ်စံၚ်ပလီုပလာ်ဒၟံၚ် အဆက်က်ဏောၚ်ဂှ် ဂွံတီကေတ် ဇရေၚ်ညးတာလျိုၚ် ဂကောံဒပ်စဵုဒၞါညးဍုၚ်ကွာန်ရးတၞၚ်သဳ (ပကဖ) ရ။

ဒပ်ကံၚ်ဇြဳပၞာန်ဝွံ အခိၚ်ထ္ပက်ကရောၚ်ပၞာန် အပ္ဍဲကွာန်ဂမၠိုၚ်ဂှ် ညးဒေသဂမၠိုၚ် နကဵုတၚ်စောတ်စောဲ ထံက်ပၚ်ကဵု PDF တံကီု၊ ထံက်ဂလာန်ကဵုဇြဟတ်တံကဵု ထံက်ပၚ်ရီုဗၚ်ကဵုတံဂှ် ကၠောန်သ္ပဒၟံၚ်ဏောၚ် မပ္တံသာ်ဏံဂှ်တုဲ ကလိလောန်ကၠုၚ် ပရေၚ်ပလီုပလာ်စံၚ်သ္ၚိတံဂှ်ရ။

ကွာန်ဒပ်ကံၚ်ဇြဳပၞာန် မစံၚ်ပလီုပလာ်ဏာဂမၠိုၚ်ဂှ်ဝွံ ကြဴနူဒပ်ကံၚ်ဇြဳပၞာန်ကဵု ဂကောံဒပ်စဵုဒၞါညးဍုၚ်ကွာန်တံ ဒှ်ပေါဲဗ္တိုက်တုဲဂှ် ဒးဒုၚ်စံၚ်ပလီုပလာ်လဝ်ဂၠိုၚ်အိုတ် မဒှ်ရ။

အတိုၚ်တၚ်နၚ် နူကဵုသြၚ်လောန်တိုၚ်(မ်) ပကောံပကေဝ်ဂွံလဝ် ၜိုတ်က္ဍစိုပ်ဂှ်မ္ဂး နူဂိတုအံက်တဝ်ဗာ (၁) စဵုကဵု (၁၀) အပ္ဍဲပွိုၚ် (၁၀) တ္ၚဲဂှ် သ္ၚိဒၟံၚ်ညးဍုၚ်ကွာန်ကောန်အရာပ်ပိုၚ် ပ္ဍဲကဵုရးတၞၚ်သဳဂှ် (၂၀) ဟွံအောန် ဒးဒုၚ်စံၚ်ပလီုပလာ်လဝ်ရ။

ညးတာလျိုၚ်ပကဖ ရးတၞၚ်သဳမွဲတၠဂှ် ပြဝဒပ်ကံၚ်ဇြဳပၞာန်ဂှ်ဝွံ ပၠောပ်ဒၟံၚ်ဓဝ်ဖေက် လ္တူညးဍုၚ်ကွာန်တံဂှ်တုဲ ညံၚ်ညးဍုၚ်ကွာန်တံ စိုတ်ဂွံအိုတ် လ္တူ PDF တံဂှ် ကၠောန်ဒၟံၚ် နကဵုတၚ်ရန်တၟံနွံနွံရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ရံၚ်အာမ္ဂး ပ္ဍဲဂိတုအံက်တဝ်ဗာ (၁၀) တေံ ကြဴနူဒပ်ကံၚ်ဇြဳပၞာန် ထ္ပက်ပၞာန်လုပ်စိုပ်ကၠုၚ် အပ္ဍဲကွာန်ပဂဝ်ဇြောန် ကေုာံ ကွာန်ယလိုၚ် ပွိုၚ်ဍုၚ်ဍာ်ဗုတုဲဂှ် စံၚ်ပလီုပလာ်ဏာလဝ် သ္ၚိဒၟံၚ်ညးဒေသ ဟွံအောန်နူကဵု (၄) မရ။

အပ္ဍဲဂိတုသေပ်တေမ်ဗာတုဲကၠုၚ်တေံ ပ္ဍဲကဵုရးတၞၚ်သဳ နူကဵုပွိုၚ်ဍုၚ်ပဠဝ်ဂှ် သ္ၚိ (၃၃) မ၊ ပ္ဍဲပွိုၚ်ဍုၚ်ဍာ်ဗုဂှ် သ္ၚိ (၅) မ၊ ပ္ဍဲပွိုၚ်ဍုၚ်တယိတ်ချံၚ်ဂှ် သ္ၚိ (၂) မ၊ အပံၚ်ဖအိုတ် ဟွံအောန်နူကဵု (၄၀) မ ဒးဒုၚ်စံၚ်ပလီုပလာ်လဝ်ဂှ် ဂကောံသုတေသနဒေသတံ လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−Social Media