ပ္ဍဲကာန်ပံက် ကမၠောန်တိုက်သြန်ပုဂ္ဂလိကသီုဖအိုတ် ဒေါအ်ဇူအာတုဲ ညးဒေသတံ ဒးဂဗဒၟံၚ်အခက်အခုဲ

ဍာ်ဗု၊ အံက်တဝ်ဗာ (၁၃)

ကမၠာန်တိုက်သြန်ပုဂ္ဂလိက မပံက်လဝ် ပ္ဍဲကဵုဍုၚ်ကာန်ပံက်၊ ပွိုၚ်ဍုၚ်ဍာ်ဗု၊ ရးဒေသဇၞော်တၞၚ်သဳတံ ဒေါအ်ဇူအာဂှ်ရ သွက်စုတ်လှုဲ၊ ပြၚ်လှုဲတံကဵု ကမၠောန်ပရေၚ်ပိုန်ဒြပ်တံဂှ် ဒးဂဗဒၟံၚ်အခက်အခုဲရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ပ္ဍဲကဵုဒေသကာန်ပံက်ဂှ် တိုက်သြန် သမဝါယမကဵု တိုက်သြန် (ကမ္ဘာ့ရတနာ) တံ နွံဒၟံၚ်တုဲ ပ္ဍဲကဵုဏံ တိုက်သြန်သမဝါယမဂှ် ကြဴနူဒပ်ပၞာန်သီအဝဵုတုဲ ကၟာတ်အာတုဲ တိုက်သြန် (ကမ္ဘာ့ရတနာ) မသှ်ေဒၟံၚ်လက္ကရဴအိုတ်ဂှ်လေဝ် ပ္ဍဲဂိတုအံက်တဝ်ဗာ (၇) တေံ ဒေါအ်ဇူအာကမၠောန်ရ။

တိုက်သြန် (ကမ္ဘာ့ရတနာ) ဂှ်ဝွံ ဟိုတ်နူအကာဲအရာ ဒးဂွိၚ်တဴကဵုပရေၚ်ဂီုကၠီုဂှ်ရ ကၟာတ်သီအာကမၠောန်ဂှ် ညးဒေသတံ ဟီုဂးဒၟံၚ်ကီုလေဝ် နကဵုသြၚ်လောန်တိုၚ်(မ်) သၟာန်သၟုက်လဝ် ဇရေၚ်ညးတာလျိုၚ်တိုက်သြန်တံဖိုဟ်ရ။

ဟိုတ်နူကမၠောန်တိုက်သြန်ပုဂ္ဂလိကတံ ဒေါအ်ဇူအာဂှ်ရ ကမၠောန်ပရေၚ်ပိုန်ဒြပ်၊ ပရေၚ်ထတ်ယုက် ကေုာံ ကမၠောန်ပရေၚ်မၞိဟ်တံသၟးဟွံက သီုကဵုစုတ်လှုဲ၊ ပြၚ်လှုဲတံဂှ် က္တဵုဒှ်ဒၟံၚ်အခက်အခုဲ နာနာသာ်ရောၚ် ညးဒေသမွဲတၠ ဟီုရ။

ကမၠောန်တိုက်သြန်တံ ဒေါအ်ဇူအာဂှ်ရ နူကဵု Kpay, Wave pay, CB pay တံဂှ် လှဲပြၚ်လှုဲတံဂွံကီုလေဝ် ပမာဏလှုဲဂၠိုၚ်ၚ် လှဲပြၚ်ဟွံဂွံဂှ်ရ ဒးဂဗဒၟံၚ်အခက်ရောၚ် မဒှ်ရ။

သ္အာၚ်နူဂှ်ပၠန် လၟိဟ်ပမာဏလှုဲ ဗွဲမဂၠိုၚ်တံဂှ်မ္ဂး ဒးအာလှဲပြၚ်ဒၟံၚ် စဵုကဵုလ္တူဍုၚ်ကလိန်အံၚ်တုဲ ပ္ဍဲကဵုတရဴဂၠံၚ်ဂှ် ဒးဂွိၚ်ဒၟံၚ် အန္တရာယ်မၞိဟ်ပၠံၚ်ၜးကၠတ်ဂၠံက်တံရ။

ညးဒေသကာန်ပံက်တံဝွံ သွက်ကမၠောန်ရဝ်ဗာ၊ သြောံသ္ၚုသြောံဂန် တိတ်နူဒေသ၊ ကမၠောန်ဍာ် ကေုာံ ကမၠောန်သွံရာန်ဗၞိက်တံဂှ် ကၠောန်သ္ပလှဲပြၚ်ကၠုၚ်လဝ်လှုဲ နူကဵုတိုက်သြန်ပုဂ္ဂလိကတံဂှ် ဂွံတီကေတ် ဇရေၚ်ညးဒေသတံရ။

ပရိုၚ်−သြၚ်လောန်တိုၚ်(မ်)

ဗီု−CJ