လုကဴဒပ်ပၞာန်ဟွံတိတ်နူပရေၚ်ဍုၚ်ကွာန်မ္ဂး ဂွံသဳကၠဳဟွံမွဲပုဟ်ဂှ် KNU, CNF ကေုာံ ABSDF တံ ပံၚ်တောဲလလောၚ်တြး

မတ်မလီု၊ အံက်တဝ်ဗာ (၁၃)

နကဵုဒပ်ပၞာန်သီအဝဵု လုကဴဟွံတိတ်နူပရေၚ်ဍုၚ်ကွာန်ဂှ် ဂွံသဳကၠဳဆဵုဂဗ ဟွံမွဲပုဟ်ဂှ် ဂကောံရပ်လွဟ်ကောန်ဍုၚ်အရၚ်ထ္ပက်လဝ်စၟတ်တဲ ပ္ဍဲလိက်ကသုက် NCA ပိဂကောံ KNU, CNF ကေုာံ ABSDF တံ ပံၚ်တောဲလလောၚ်တြးလဝ် ပ္ဍဲဂိတုအံက်တဝ်ဗာ (၁၂) တေံရ။

လ္တူအသေအဟာန်လိက်ကသုက်ဒေါအ်ပန်ပှော်အလုံဍုၚ် NCA ပေၚ် (၈) သၞာံ နူကဵုကံၚ်ဇြဳပၞာန် မသ္ကိုပ်သ္ကကၠောန်ဗဒှ်အာဂှ် ဗော်သွးကောန်ဂကူကရေၚ် KNU, ဒပ်ပၠတရဴကောန်ဂကူချေၚ် CNF ကေုာံ ဒပ်ပၠတရဴဒဳမဝ်ကရေတ်တေတ်ကွးဘာ ABSDF တံ အခိၚ်ပ္တိတ်လိက်လလောၚ်တြးဂှ် ဟီုစုတ်လဝ်ကီုရ။

ဂကောံ (၃) ဂကောံဏံဂှ် ပရေၚ်သီအဝဵုဂှ်ဝွံ ဒှ်ပလီုပလာ် မူသ္ဇိုၚ် NCA ကဵု တၚ်ရန်တၟံတံဂှ်တုဲ သီုကဵုပလီုကၠေံ သၞောဝ်သ္ဇိုၚ်ဒက်ပ္တန် ၂၀၀၈ ဂှ်ရ လၟေၚ်ကမၠောန်ဒုၚ်သ္ဇိုၚ်ကဵု NCA တံကဵု ဂၠံၚ်တရဴပေါဲသဳကၠဳတံ ဒေါအ်ဒေၚ်အာလဝ်ယျဂှ် သ္ဂးရ။

သ္အာၚ်နူဂှ်ပၠန် ဟိုတ်နူပြဝကံၚ်ဇြဳပၞာန် မကၠောန်သ္ပဒၟံၚ် ပရေၚ်ဗ္တိုက်စွံပွန် လ္တူညးဍုၚ်ကွာန်ကောန်အရာပ်တံဂှ်ရ ဒဒှ်ရ လိက်ကသုက် NCA လီုအာဂှ် သ္ကဵုခိုၚ်ကၠိုက်တဴတုဲ ဒဒှ်ရဒပ်ပၞာန် သၠးထောံ နဲကဲဂၠါဲသွဟ်ပ္ညဳပ္ညပ် ဗွဲမၜိုဟ်လလမ်ဂှ် သ္ကဵုပြာကတ်တဴရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးပံၚ်တောဲဂှ်ရ။

ဒုၚ်သ္ဇိုၚ်ကဵု လိက်ကသုက် NCA ဂှ်တုဲ ကၠောန်သ္ပပေါဲသဳကၠဳ ထ္မံက်ရုပ်ရဴ ထ္ၜးစတံဂှ်ကီု၊ ညံၚ်သၞောဝ်သ္ဇိုၚ်ဒက်ပ္တန်နွံမံၚ်ကီု ကၠောန်သ္ပဒၟံၚ်ပေါဲသဳကၠဳ ပရေၚ်ပလေဝ်ပလေတ်သၞောဝ်သ္ဇိုၚ်တံဂှ်ဝွံ က္တဵုဗဒှ်ကဵု အကြေပ်အဂြတ်ပရေၚ်ဍုၚ်ကွာန် သာတုဲဇြိုဟ်နက်ကၠေံတုဲ ကၠောန်သ္ပဒၟံၚ် ညံၚ်ပဋိပက္ခဂွံဂၠိၚ်သ္ၚောဲရောၚ် လလောၚ်ပ္တိတ်လဝ်ရ။

ဟိုတ်ဂှ်ရ KNU, CNF ကေုာံ ABSDF တံဝွံ ပ္ဍဲကဵုပြသၞာပရေၚ်ဍုၚ်ကွာန်လၟုဟ်ဏံဂှ် ဖျေံစၟတ်လဝ် တၚ်ရန်တၟံပရေၚ်ဍုၚ်ကွာန် စပ်ကဵုပရေၚ်ဒက်ပ္တန်ကၟိန်ဍုၚ်ပံၚ်ကောံ ဖေဝ်ဒရာဒဳမဝ်ကရေဇြဳ (၅) တၚ်ကဵု တၚ်ဒတူလိုၚ်ပရေၚ်ဍုၚ်ကွာန် (၆) တၚ်တံရောၚ်ဂှ် ပါလုပ် ပ္ဍဲတၚ်လလောၚ်တြးဂှ်ရ။

ပ္ဍဲကဵုတၚ်ရန်တၟံပရေၚ်ဍုၚ်ကွာန် (၅) တၚ်ဂှ် ညံၚ်ဂွံဖအိုတ်ကၠေံ ဒဒှ်မဒပ်ပၞာန်ပါလုပ် ပ္ဍဲပရေၚ်ဍုၚ်ကွာန်ဂှ်ကီု၊ ကလေၚ်ဒက်ပ္တန်ဒပ်ပၞာန်တုဲ သွက်ဂွံစွံသၟဝ်အုပ်ဓုပ်ကောပ်ကာဲအလဵုအသဳကောန်အရာပ်ပေၚ်ၚ်ဂှ်ကီု၊ သွက်ဂွံချူဓဇက် သၞောဝ်သ္ဇိုၚ်ဒက်ပ္တန်တၟိ မဒုၚ်သ္ဇိုၚ်ကဵု ဖေဝ်ဒရာ ကေုာံ ဒဳမဝ်ကရေဇြဳတံဂှ်ကီု၊ သွက်ညးမ္ဒးဒုၚ်ကလိလောန်လဝ် အပ္ဍဲပဋိပက္ခတံဂှ် ညံၚ်ဂွံဂွံဗဗွဲဓဝ်ဂှ်ကီု တၚ်နၚ်တံဏံ ပါလုပ်ရ။

နကဵုဒပ်ကံၚ်ဇြဳပၞာန် ဒုၚ်တဲကုတၚ်ရန်တၟံပရေၚ်ဍုၚ်ကွာန်တံဏံဂှ်တုဲ ဟွံပတုဲဒှ်ထောံ ပရေၚ်ပကီုပရာပ် လ္တူညးဍုၚ်ကွာန်တံမွဲသာ် ဟွံသေၚ်မ္ဂး ဟွံဖအိုတ်ကၠေံမွဲသာ် သွက်ဂွံကၠောန်သ္ပ ပေါဲသဳကၠဳလဵုမှဟွံမွဲပုဟ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးပံၚ်တောဲဂှ်ရ။

သ္အာၚ်နူဂှ်ပၠန် ညးမပါလုပ်လဝ် အပ္ဍဲပရေၚ်ဍုၚ်ကွာန်တံဂှ်ဝွံ နွံပၟိက်ကဵု အပြံၚ်အလှာဲသၞောတ်သၟးဟွံက၊ နူကဵုသၞောတ်တၠအဝဵုပၞာန် ပြံၚ်လှာဲအာ ဗီုပြၚ်တၞဟ်ဟ် ဟွံသေၚ်မ္ဂး ပြၚ်လှာဲအာ နကဵုဗီုပြၚ်အလဵုအသဳကောန်အရာပ်တၠအဝဵုဂှ်လေဝ် ဂွံဒုၚ်တဲ ဟွံမွဲတုဲ ပရေၚ်ပါ်ပရအ်အဝဵု အကြာရဲဂွံလဝ်အခေါၚ်တၟေၚ် ပ္ဍဲပရေၚ်ဍုၚ်ကွာန်တံရေၚ်သ္ကအ်ဂှ်လေဝ် ဒုၚ်အာတဲဟွံသေၚ်ပုဟ်ဂှ် လလောၚ်တြးလဝ်ရ။

KNU, CNF ကေုာံ ABSDF ဂမၠိုၚ်ဝွံ ကြဴနူဒပ်ပၞာန်သီအဝဵုတုဲ ပံၚ်တောဲကဵု ဂကောံဇြဟတ်ပၠန်ဂတးဂမၠိုၚ် ပါလုပ်သီုကဵုဒပ်ပၞာန်စဵုဒၞါညးဍုၚ်ကွာန် PDF တံတုဲ ဒှ်ဂကောံဒပ်ရပ်လွဟ်ကောန်ဍုၚ်အရၚ် မဗ္တိုက်ပ္တိတ်ပၠန်ဂတးဒၟံၚ် ကုဒပ်ကံၚ်ဇြဳပၞာန်မွဲရ။

ပရိုၚ်−သြၚ်လောန်တိုၚ်(မ်)

ဗီု−Social Media