ပ္ဍဲတိဍာ် KNU ဟိုတ်နူလွဟ်ဇၞော်စှ်ေတုဲ ကောန်ၚာ်ဗြဴမွဲတၠ ဒးချိုတ် ၈ တၠ ဒးလဝ်ဘဲဝပ်

ညံၚ်လေဝ်ပေန်၊ အံက်တဝ်ဗာ(၃)

ပ္ဍဲခရိုၚ်ညံၚ်လေဝ်ပေန် တိဍာ်ဒပ်မဟာ (၃) ဗော်သွးကောန်ဂကူကရေၚ် KNU ဂှ် ဟိုတ်နူဒပ်ကံၚ်ဇြဳပၞာန် ပန်ဖျေံလွဟ်ဇၞော်တုဲ ကောန်ၚာ်ဗြဴဴ အယုက် (၁၄) သၞာံမွဲတၠ ဒးချိုတ်လဝ်တုဲ ၈ တၠ ဒးလဝ်ဘဲဝပ်ရဂှ် KNU ဗဟဵု လလောၚ်တြးလဝ် ပ္ဍဲဂိတုအံက်တဝ်ဗာ စၟတ်တ္ၚဲ ၁၂ ဂှ်ရ။

ပ္ဍဲကဵုဂိတုအံက်တဝ်ဗာ စၟတ်တ္ၚဲ (၁၀) တုဲကၠုၚ်တေံမွဲတ္ၚဲဓဝ်ဂှ် ပ္ဍဲပွိုၚ်ဍုၚ်ကျောက်ဂျဳကဵု ပွိုၚ်ဍုၚ်မုမ် မဒှ်ပွိုၚ်ဍုၚ်ခရိုၚ်ညံၚ်လေဝ်ပေန် KNU ဂှ် နူကဵုဒပ်ကံၚ်ဇြဳပၞာန် ပန်ဗတိုက်လဝ်ကဵုလွဟ် ဇၞော်ဟွံအောန်နူ (၄) ဝါရ။

ဟိုတ်နူဒပ်ကံၚ်ဇြဳပၞာန် ပန်ဖျေံလွဟ်ဇၞော်တုဲ ဂကောံသ္ၚိကၟိန် (၃) တၠ ပါလုပ်သီုကောန်ၚာ် ဒၟံၚ်ကွာန်ယွာကာန်လာန် အယုက် (၂) သၞာံမွဲတၠ ပွိုၚ်ဍုၚ်ကျောက်ဂျဳဂှ် ဒးလဝ်ဘဲဝပ်တုဲ ဂၠဴညးဒေသတအ်လွဳလဝ် (၂) ဂှ်လေဝ် ဒးချိုတ်လဝ်ရဂှ် ဓမံက်လဝ် ပ္ဍဲတၚ်လလောၚ်တြး KNU ရ။

သ္အာၚ်နူဂှ်ပၠန် ပ္ဍဲပရေၚ်လွဟ်ဇၞော်ဒတုံစှ်ေပါ်ခတိုဟ်လဝ် ပ္ဍဲကွာန်ကျဝ်လှ ပွိုၚ်ဍုၚ်မုမ်ဂှ် သၟတ်ဗြဴအယုက် (၁၄) သၞာံမွဲတၠ ဒးလွဟ်ဇၞော် ဒးချိုတ်လဝ်တုဲ သ္ၚိဒၟံၚ်မွဲမလေဝ် ဒးလီုလာ်လဝ်ရဂှ် ဓမံက်လဝ် ပ္ဍဲတၚ်လလောၚ်တြးဂှ်ရ။

ပါဲနူဂှ် ပ္ဍဲကွာန်တနာတ်ကွေန် လွဟ်ဇၞော်ဒတုံစှ်ေပေါ်ခတိုဟ်လဝ်ဂှ် ကျာ်ဇၞော်ဂ္ဇအ်ဘာကွာန် အယုက် (၇၄) သၞာံ မွဲဇကု ဒးလဝ်ကဝေက်မကမ်လွဟ်ဇၞော်တုဲ ဒးလဝ်ဘဲဝပ်ကီု၊ ကောန်အရာပ်ညးဍုၚ်ကွာန် ဒၟံၚ်ကွာန်နန္ဒမိတ် ပါလုပ်သီုကောန်ၚာ်အယုက် (၂) သၞာံမွဲတၠ ကောန်အရာပ် (၄) တၠ ဇီုကပိုက်ဒးလဝ်ဘဲဝပ်ရဂှ် ဓမံက်ထ္ၜးလဝ်ရ။

ဟိုတ်နူဒပ်ကံၚ်ဇြဳပၞာန် ပန်ဗတိုက်ဒၟံၚ်လွဟ်ဇၞော် ပ္တဝ်လဝ်ကဵု ကောန်အရာပ်ညးဍုၚ်ကွာန် ပ္ဍဲခရိုၚ်ညံၚ်လေဝ်ပေန်တုဲ ပန်ပှ်ောဒၟံၚ်ဂှ်ရ ကောန်အရာပ်ညးဍုၚ်ကွာန်တအ် ဒးချိုတ် ဂွံလဝ်ဘဲဝပ် က္တဵုဒှ်လဝ်တုဲ ကောန်ဒေသ ညးဍုၚ်ကွာန်တအ်ဂှ် ဒးဂယိုၚ်ဒၟံၚ်လမျီု သီုကဵုစိုတ်ဂွိၚ်ဂွာဲဖေက်ဂၟံက်ရဂှ် KNU လလောၚ်တြးလဝ်ရ။

အတိုၚ်တၚ်လလောၚ်တြး KNU မ္ဂး ပ္ဍဲတိဍာ်ဒပ်မဟာ (၃) ခရိုၚ်ညံၚ်လေဝ်ပေန်ဂှ် ဟိုတ်နူဒပ်ကံၚ်ဇြဳပၞာန် ပန်ဖျေံလွဟ်ဇၞော်တုဲ ပ္ဍဲကဵုဂိတုဏံ ပွိုၚ် (၁၀) တ္ၚဲဂှ် ကောန်အရာပ် ဒးချိုတ်လဝ် (၂) တၠ ဒးလဝ်ဘဲတပ် (၁၄) တၠတုဲ သ္ၚိဒၟံၚ် (၅) မ ဇီုကပိုက်ဒးလီုလာ်လဝ်ကီု မၞိဟ်ဗြဴ (၂) တၠလေဝ် ကံၚ်ဇြဳပၞာန်ရပ်ဒက်ဖျေံလဝ်ထံၚ်ရဂှ် ဂွံတီကေတ်ရ။

ပ္ဍဲတိဍာ်အုပ်ဓုပ် ကဝ်ဒူလေဝ်ဂှ် ပ္ဍဲမွဲကာလဒပ်ပၞာန်သီအဝဵုဏံ ဟိုတ်နူဒပ်ကံၚ်ဇြဳပၞာန် ဖံက်ပ္ကဝ်လဝ်အခေါၚ်အရာမၞိဟ် ပါလုပ်သီုပန်ဖျေံလွဟ်ဇၞော် ဗတိုက်ကဵုက္ၜၚ်ကျာတုဲ လၟိဟ်ညးပါဲဘဲပၞာန် ဒးဂြိပ်ဒဴပါဲဓလေတ်ဒၟံၚ်စဵုကဵု (၇) ကိုတ်ပြၚ် နွံကၠုၚ်ရဂှ် ဂွံတီကေတ်အတိုၚ်တၚ်လလောၚ်တြး KNU ရ။

ပရိုၚ် – သြၚ်လောန်တိုၚ်(မ်)

ဗီု – KNU