မတ်မလီု – အံက်တဝ်ဗာ (၁၃)
ညးလုပ်ဂကောံအလဵုအသဳ အလဵုအသဳညဳသၟဟ်ကောန်ဂကူတအ်ဂှ် ဆဵုဂဗကဵုလဝ်ဇြဟတ် သ္ဂံၚ်ပၠန်ဂတးညးဍုၚ်ကွာန်တအ် နူကဵုအောန်လာၚ် မွဲကဆံၚ်ရဂှ် ဌာနဝန်ဇၞော်ပရေၚ်စဵုဒၞာ NUG လလောၚ်တြးလဝ် ပရိုၚ်ရ။
ဆဵုဂဗကဵုလဝ်ဇြဟတ် ပ္ဍဲဂိတုအံက်တဝ်ဗာ စၟတ်တ္ၚဲ (၁၀) တုဲကၠုၚ်တေံ နူအခိၚ်ဇိုၚ်သဝ်တ္ၚဲ စဵုကဵုအခိၚ်ဗ္တံရဂှ် ဂွံတီကေတ်ရ။
ကိုပ်ကၠာနူပေါဲသဳကၠဳဟွံဂွံစဏီဂှ် သွက်ကောန်အရာပ်ညးဍုၚ်ကွာန် ကေုာံကောန်ၚာ်သၟတ် ဒးချိုတ်လဝ် ဟိုတ်နူဒပ်ကံၚ်ဇြဳပၞာန် ပ္တဝ်လဝ်ကဵုကောန်အရာပ် သီုတၚ်ရန်တၟံနွံနွံတုဲ ပန်ပှော်လဝ် ဗဒိုပ်ပါဲဘဲပၞာန်မုမ်လိုၚ်ခေတ် ပ္ဍဲဍုၚ်လိုၚ်ဇြာဂှ် ညိၚ်ဝတ်လဝ် ပွိုၚ် (၃၀)စက္က ရာဒၞာမိက်ဖျေံလဝ်မေတ္တာရဂှ် ဂွံတီကေတ်ရ။
သမ္မတယာယဳ ဒူဝါလယှဳလ၊ သ္ကိုပ်ဝန်ဇၞော်မာန်ဝေန်ခိုၚ်တာန် ကေုာံဥက္ကဋ္ဌကဝ်မတဳသ္ပစၞးကၠတ်ထဝ်ကၟိန်ဍုၚ် (CRPH) ဥူအောၚ်ကျဳညောအ်တအ် ပံက်လဝ်ဂလာန်ဟီုဗ္ကန်လဝ် ကုသ္ဂံၚ်ပၠန်ဂတးညညးဍုၚ်ကွာန်တအ်ရ။
သ္အာၚ်နူဂှ်ပၠန် ဒံက်တာသလိုၚ်လျေန်မုမ်သာခေါၚ် ဝန်ဇၞော်ကၟိန်ဍုၚ် ဌာနဝန်ဇၞော်ကေၚ်ကာဖေတ်ဒရေဝ် မဒှ်ဝန်ဇၞော်လုပ်ဂကောံကံၚ်ဇြဳပရေၚ်ဂီုကၠီု ကေုာံပရေၚ်စဵုဒၞာညးဍုၚ်ကွာန်ကဵု ဥူလွေၚ်ကိုဝ်လေတ် ဝန်ဇၞော်ကၟိန်ဍုၚ် ဌာနဝန်ဇၞော်ပရေၚ်အပ္ဍဲဍုၚ် ကေုာံပရေၚ်ကောပ်ကာဲပရေၚ်မၞိဟ်လုပ်တိတ်တအ် ဟီုလဝ်ဂလာန် ကဵုဇြဟတ်စိုတ်ရ။
ကြဴနူဂှ် ညးတာလျိုၚ်ဒပ်ပၞာန်စဵုဒၞာညးဍုၚ်ကွာန် ဌာန်ဂအုပ်ဒေသပၞာန်၊ ရးပၞာန်၊ ဌာနပၞာန်ရးတအ်၊ ညးတာလျိုၚ်ဂကောံစဵုဒၞာညးဍုၚ်ကွာန် (ပ.က.ဖ) ရး/တွဵုရး ခရိုၚ်တအ် ပ္တိုန်ထ္ၜးလဝ် အကာဲအရာပရေၚ်ပၠန်ဂတး ပ္ဍဲဒေသမဆေၚ်စပ် ကေုာံတၚ်ရန်တၟံပၠန်ဂတး ကုသမ္မတယာယဳဒူဝါလယှဳလ၊ သ္ကိုပ်ဝန်ဇၞော်မာန်ဝေန်ခိုၚ်တာန် ညးသ္ကအ်ရဂှ် ဂွံတီကေန်ရ။
အခန်ကၞာဂှ် သမ္မတယာယဳ ဒူဝါလယှဳလ၊ သ္ကိုပ်ဝန်ဇၞော်မာန်ဝေန်ခိုၚ်တာန်၊ ဥက္ကဋ္ဌကဝ်မတဳသ္ပစၞးကၠတ်ထဝ်ကောန်ကၟိန်ဍုၚ် (CRPH) ဥူအောၚ်ကျဳညောအ်၊ ညးလုပ်ဂကောံကံၚ်ဇြဳပရေၚ်ဂီုကၠီု ကေုာံပရေၚ်စဵုဒၞာညးဍုၚ်ကွာန်တအ်၊ ဝန်ဇၞော်ကၟိန်ဍုၚ် ဌာနဝန်ဇၞော်ပရေၚ်စဵုဒၞာ ဥူယျဳမန်၊ ဒုတိယဝန်ဇၞော်ကၟိန်ဍုၚ် နာဲကောရတ်၊ ဌာနဝန်ဇၞော်ပရေၚ်စဵုဒၞာ ဝန်ပ္ဍဲဒ္တန်၊ ဒုဝန်ပ္ဍဲဒ္တန်၊ သ္ကိုပ်ဂအုပ်စၞောန်ပ္ညုၚ်၊ သ္ကိုပ်စၞောန်ပ္ညုၚ်၊ သၞာဲဒဴဂအုပ်ရုၚ်ပၞာန် ဒပ်ပၞာန်စဵုဒၞာညးဍုၚ်ကွာန် (PDF)၊ ညးတာလျိုၚ် ဌာန်ဂအုပ်ဒေသပၞာန်၊ ဌာန်ဂအုပ်ရးပၞာန်၊ ဌာနရးပၞာန် ဒပ်စဵုဒၞာညးဍုၚ်ကွာန်တအ်ကဵု ဂကောံစဵုဒၞာညးဍုၚ်ကွာန် (ပ.က.ဖ) ရး/တွဵုရး ခရိုၚ်တအ် တိုန်စိုပ်လဝ်ရ။
ပရိုၚ် – သြၚ်လောန်တိုၚ်(မ်)
ဗီု – MOD
sanlontai