ဟိုတ်နူပရေၚ်သီအဝဵုတုဲ ညးဒးဂြိပ်ဒဴထောံသ္ၚိဌာန် စဵုကဵုဗ္ဒာဲ ၁ ဒသမ ၇ ပြကောဋိကိုတ် နွံကၠုၚ်

​သေတ်ဂါၚ်၊ အံက်တဝ်ဗာ (၁၃)

ပ္ဍဲမွဲကာလဒပ်ပၞာန်သီအဝဵုကၟိန်ဍုၚ်ဗၟာ ပွိုၚ်ၜါသၞာံပြၚ်ၚ်ဏံ ဟိုတ်နူပဋိပက္ခရပ်လွဟ်တုဲ ညးဒးဂြိပ်ဒဴ ထောံသ္ၚိဌာန် စဵုကဵုဗ္ဒာဲ ၁ ဒသမ ၇ ပြကောဋိကိုတ် နွံကၠုၚ်ရဂှ် ရုၚ်ပ္ညဳပ္ညပ်ဆေၚ်စပ်ကဵု ထံက်ရံၚ်ဗ္စာရဏာပရေၚ်မၞိဟ်ကုလသမဂ္ဂ UNOCHA လလောၚ်တြးလဝ် ပ္ဍဲဂိတုအံက်တဝ်ဗာ စၟတ်တ္ၚဲ (၁၂) ဂှ်ရ။

အတိုၚ် UNOCHA လလောၚ်တြးလဝ်မ္ဂး လၟိဟ်မၞိဟ် ဗ္ဒာဲ ၁ ဒသမ ၇ ပြကောဋိကိုတ် ဟိုတ်နူပဋိပက္ခက္တဵုဒှ်ကၠုၚ် ကြဴနူပရေၚ်သီအဝဵု သၞာံ ၂၀၂၁ ဂိတုဖေဖဝ်ဝါရဳကဵု ပရေၚ်ဟွံဂီုကၠီုတုဲ ဒှ်ညးထောံသ္ၚိဌာန်တုဲဒးဂြိပ်ဒဴလဝ်တုဲ ယဝ်ရပံၚ်ထောံကဵု ညးထောံသ္ၚိဌာန်တုဲ ဒးဂြိပ်ဒဴ နွံဒၟံၚ်ကၠာကၠာတေံ ၁ ဒသမ ၃ ပြကောဋိကိုတ်ဂှ်တှ်ေ အလုံမွဲကၟိန်ဍုၚ် လၟိဟ်မၞိဟ်ဒးဂြိပ်ဒဴ ထောံသ္ၚိဌာန် စဵုကဵုဗ္ဒာဲ ၂ ပြကောဋိကိုတ် နွံကၠုၚ်ရဂှ် ဟီုလဝ်ရ။

ပ္ဍဲကဵုဂိတုသေပ်တေမ်ဗာ သတ္တာဟလကြဴအိုတ်တေံ ပ္ဍဲလ္ပာ်ဒိုဟ်အဂၞဲကၟိန်ဍုၚ်ဂှ် လၟိဟ်မၞိဟ် ဗ္ဒာဲ ၄,၈၀၀ ဒးဒှ်လဝ် ညးသ္ၚိဌာန်ဟၟဲတုဲ ပ္ဍဲရးသေတ်ဂါၚ်ကဵု ရးမဂွေ မၞုံလ္ပာ်ဒိုဟ်ဗာယပ်ကၟိန်ဍုၚ် ဟိုတ်နူပေါဲဗတိုက်ရပ်လွဟ်တုဲ လၟိဟ်မၞိဟ် ဗ္ဒာဲ ၁၃,၀၀၀ ထောံသ္ၚိဌာန်တုဲ ဒးဂြိပ်ဒဴလဝ်ရဂှ်လေဝ် ဓမံက်လဝ်ပ္ဍဲတၚ်လလောၚ်တြးရ။

ပ္ဍဲကဵုဂိတုအံက်တဝ်ဗာ စၟတ်တ္ၚဲ (၉) တုဲကၠုၚ်ဏံ ဟိုတ်ဒပ်ကံၚ်ဇြဳပၞာန် ဗတိုက်ဂြာတ်ထောံဖျေံလဝ်ဗုမ် ပ္ဍဲဗဒိုပ်ပါဲဘဲပၞာန် မၞုံဗ္ဒာဲဍုၚ်လိုၚ်ဇြာတုဲ ကောန်အရာပ်ဂၠိုၚ်ကဵုဒါဇြေန် ပါလုပ်သီုညးဗြဴ ကေုာံကောန်ၚာ်သၟတ် မဒှ်ညးထောံသ္ၚိဌာန်တုဲ ဒးဂြိပ်ဒဴဒၟံၚ်ပ္ဍဲဍုၚ် ဒးချိုတ်လဝ်တုဲ ဒးလဝ်ဘဲဝပ် (၅၀) ပြၚ်ရ။

ဟိုတ်နူကံၚ်ဇြဳပၞာန်ဂြာတ်ထောံဖျေံဗုမ်တုဲ ကွာန်မွဲကွာန် ကေုာံဗဒိုပ်ဆုဲပြံၚ်ဖျေံသ္ဇိုၚ် အပံၚ်လၟိဟ်မၞိဟ် ၆,၀၀၀ ပြၚ် မံၚ်တန်တဴဒၟံၚ်လေဝ် ဇီုကပိုက်ဒးလဝ်ရဂှ် ပါလုပ် ပ္ဍဲတၚ်လလောၚ်တြး UNOCHA ရ။

သ္အာၚ်နူဂှ်ပၠန် ဟိုတ်နူပေါဲဗတိုက်တုဲ ညးဒေသ ပွိုၚ်ဍုၚ်ဖရူဇြော၊ တွဵုရးကရေၚ်ဍာဲတအ်ဂှ် ဒးဂြိပ်ဒဴဴပါဲဓလေတ်ဒၟံၚ် ပ္ဍဲဂြိုပ်ဒဵု ဒၞာဲကြပ်ညောန် ဗ္ဒာဲတအ်ဂှ်တုဲ နွံဒၟံၚ်ပၟိက်ကဵု ကၟဳဗ္ဒၚ်၊ ဇွောံမစၞစ ကေုာံကပေါတ်သ္ဇိုၚ်တၞဟ်တအ် နဒဒှ်ကာတၟေၚ်ရဂှ် UNOCHA ဟီုလဝ်ရ။

ဂၠံၚ်အဓိက မၞုံတွဵုရးကရေၚ်ဍာဲတအ်ဂှ် ဟိုတ်နူပေါဲဗတိုက် ဒးကၟာတ်လဒဵုဒၟံၚ်တုဲ ကွာန်မၞုံမွဲဒမြိပ်ပယျဵု သေံ-ကရေၚ်ဍာဲတအ်ဂှ် ညးဒေသတအ် ဒးဆဵုဂဗဒၟံၚ် ကပေါတ်ရီုဗၚ်ဟံၚ်ပြာ်ပိုတ်သ္ကုတ်တုဲ အခေါၚ်အရီုဗၚ်ဗ္စာရဏာပရေၚ်မၞိဟ် ဂွံလုပ်စိုပ်ဂှ်လေဝ် ဒှ်ဒၟံၚ်ခက်ခုဲဆိုအ်ဗရဂှ် ဂွံတီကေတ်ရ။

သၞာံဏံ ပ္ဍဲပထမကဝက်သၞာံဂှ် ဂကောံမိတ်ပွံၚ်အရီုဗၚ်ဗ္စာရဏာပရေၚ်မၞိဟ်တအ်ဂှ် ၜိုန်ရရီုဗၚ်ကဵုလဝ် လၟိဟ်မၞိဟ် ၁ ဒသမ ၈ ပြကောဋိကိုတ်ပြၚ် ပါလုပ်သီုညးဍုၚ်ကွာန်ဆုဲပြံၚ်ဖျေံသ္ဇိုၚ် ၇၀၀,၀၀၀ ပြၚ်ကီုလေဝ် နွံဒၟံၚ်ပၟိက်ကဵုသြန်ဂအုံံထပ်ရဂှ် UNOCHA လလောၚ်တြးလဝ်ရ။

ပရိုၚ် – သြၚ်လောန်တိုၚ်(မ်)

ဗီု – လလောၚ်ပရိုၚ်လၟေၚ်ဍာံ ပွိုၚ်ဍုၚ်ခေန်ဥူ