ပရေၚ်ဗတိုက်ပန်ဗဒိုပ်ပါဲပၞာန် မုမ်လိုၚ်ခေတ်ဂှ် ဒပ်ပၠန်ဂတးဍုၚ်မန် ပျုတ်ဗ္ဒေက်သ္ကာတ်တ်မြဟ်ဟ်

ရေဝ်၊ အံက်တဝ်ဗာ(၁၄)

တွဵုရးကချေၚ်၊ ဗဒိုပ်ပါဲဘဲပၞာန် မၞုံဗ္ဒာဲဍုၚ်လိုၚ်ဇြာဂှ် ပ္ဍဲလ္တူဒပ်ကံၚ်ဇြဳပၞာန်သီအဝဵု ဗတိုက်ဂြာတ်ထောံဖျေံလဝ်ဗုမ် ကဵုဒရုမ်ဂှ် ဒဒှ်ရဒပ်ပၠန်ဂတးဍုၚ်မန် (MSRF) ပျုတ်ဗ္ဒေက်သ္ကာတ်တ်မြဟ်ဟ်ဂှ် လလောၚ်တြးလဝ် ပ္ဍဲတ္ၚဲဏံရ။

အတိုၚ်တၚ်လလောၚ်တြးဂှ်မ္ဂး ပ္ဍဲဂိတုအံက်တဝ်ဗာစၟတ်တ္ၚဲ (၉) ဂှ် ဟိုတ်နူဒပ်ကံၚ်ဇြဳပၞာန် ဗတိုက်လဝ်ကဵုပၞာန်ကျာတုဲ ပါလုပ်သီုညးဗြဴဴ ကောန်ၚာ်သၟတ်(ကောန်ၚာ်ကဵုဂိတု) ကောန်အရာပ် ဒးချိုတ်လဝ် (၃၀) ပြၚ်တုဲ ဇီုကပိုက်ဒးလဝ်ဘဲဝပ် ဟွံအောန်နူ (၅၀) တၠ နွံရ။

ကြဴနူဒပ်ပၞာန်သီကေတ်အဝဵုတုဲ သ္ကုတ်လကြဴဏံ အလုံံမွဲကၟိန်ဍုၚ် ကံၚ်ဇြဳပၞာန်ကလိလောန်လဝ် ဂဗုတ်ဗွဲမဂၠိုၚ် ပါလုပ်သီုဂဗုတ်ဂြာတ်ထောံဖျေံဗုမ်ကဵုက္ၜၚ်ကျာ သ္ကဵုချိုတ်လဝ်ဗွဝ်ကဵုဗွဝ်ဗွဲမဂၠိုၚ်တုဲ ပ္ဍဲတွဵုရးကချေၚ် သီုအလန်ဏံမွဲအလန်မ္ဂး ဒှ်ဗတိုက်ပန်လဝ် မရနုက်ကဵုဒုတိယရ။

စွံလဝ်တၚ်ပ္တဝ်လ္တူကောန်အရာပ်တအ်တုဲ ဗတိုက်ပန်ဒၟံၚ်ဂှ် ဒှ်ကမၠောန်ပြဝမၞိဟ်ဟွံသေၚ်တုဲ ကၟိန်ဍုၚ်ဂၠးကဝ် ပါလုပ်သီုကၟိန်ဍုၚ်အာဇြဳယာန်တအ်လေဝ် သွက်ဂွံကေတ်အရေဝ်ကဵုကံၚ်ဇြဳပၞာန်သီအဝဵု နွံဒၟံၚ်ပၟိက်ရဂှ် MSRF ဗတိုက်ဖ္အောဝ်ရ။

စွံလဝ်တၚ်ပ္တဝ် လ္တူကောန်အရာပ်တုဲ ဗတိုက်ပန်ဒၟံၚ်ဂှ် ဒှ်ဂဗုတ်ပြိုက်ဂစိုတ်ကမၠက်ဒၟံၚ် လ္တူကောန်ဂကကူမၞိဟ်တုဲ ပ္ဍဲလ္တူကမၠောန်ပြဝ ဍေံတအ်ကၠောန်ဒၟံၚ်ဂှ် ဒးကေတ်တာလျိုၚ်ရောၚ် ဒပ်ပၠန်ဂတးဍုၚ်မန် ဟီုသ္ဂးလဝ်ရ။

နကဵုဒပ်ပၠန်ဂတးဍုၚ်မန် ( MSRF) ဂှ် ပံၚ်တောဲကဵုကောန်ဍုၚ်အရၚ် ဒးဒုၚ်ပ္ဍဵုပ္ဍိုက်ဘဝတုပ်တအ်၊ ဂကောံဇြဟတ်ဒဳမဝ်ကရေဇြဳ ပၠန်ဂတးဗတိုက် ဒၟံၚ်ကဵုကံၚ်ဇြဳပၞာန် ညးဍုၚ်ကွာန်တအ်တုဲ စဵုကဵုကၟိန်ဍုၚ်ပံၚ်ကောံဖေတ်ဒရေဝ် မံက်ဂတဝ်တိုန်တှ်ေ ဆက်လုပ်အာပေါဲဗတိုက်ရောၚ်ဂှ် လလောၚ်တြးလဝ် တၚ်လစွံစိုတ်ရ။

ပရိုၚ် – သြၚ်လောန်တိုၚ်(မ်)

ဗီု – Social Media