တၞၚ်သဳ၊ အံက်တဝ်ဗာ (၁၄)
ရးဒေသဇၞော်တၞၚ်သဳ၊ ပွိုၚ်ဍုၚ်တၞၚ်သဳ၊ ပ္ဍဲကွာန်တေတ်တပေန်ကဵု ကွာန်လေဝ်ဒံၚ်ယာဂှ် ဟိုတ်နူလွဟ်ဇၞော်ဒတုံဗ္တိုဟ်ထ္ကးဂှ်ရ ကောန်ၚာ်သၟတ်မွဲတၠ ချိုတ်တုဲ ၂ တၠ ကလိဂွံလဝ်ဝပ်ဂှ် ညးတာလျိုၚ် (ပကဖ) ရးတံကဵု ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ပ္ဍဲဂိတုအံက်တဝ်ဗာ (၁၂) အခိၚ်နူဂယး ၜိုတ် (၁၁) နာဍဳဂှ် နူကဵုခမရ ၅၅၇ ဖျေံသ္ဇိုၚ်ကွာန်အံက်ကေန် ပွိုၚ်ဍုၚ်တၞၚ်သဳဂှ်ကဵု နူကဵုဒပ် ခမရ ၅၅၈ ဖျေံသ္ဇိုၚ်ကွာန်ကမ္မလိုၚ်တံဂှ် ပန်ပှော်စုတ်လဝ် လွဟ်ဇၞော် ဟွံအောန်နူကဵု ၁၀ မရ။
ဟိုတ်နူလွဟ်ဇၞော် ဒတုံဗ္တိုဟ်ထ္ကးအာဂှ်ရ ကောန်ၚာ်သၟတ် အာယုက် ၁၀ သၞာံ နူကဵုကွာန်တေတ်တပေန်မွဲတၠ ချိုတ်တုဲ မွဲတၠ ကလိဂွံလဝ်ဝပ်တုဲ ကောန်ၚာ်သၟတ် နူကဵုကွာန်လေဝ်ဒံၚ်ယာမွဲတၠလေဝ် ထပ်ကလိဂွံလဝ်ဝပ်ဂှ် သ္ဂးရ။
ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်တုဲ ညးဒေသ နူကဵုကွာန်တေတ်တပေန် ကဵု ကွာန်လေဝ်ဒံၚ်ယာတံ ဒးဂြိပ်ဒဴပါဲဒလေတ်ဒၟံၚ် နွံဂှ် ဂွံတီကေတ်ရ။
ပ္ဍဲရးတၞၚ်သဳဂှ် အပ္ဍဲဂိတုသေပ်တေမ်ဗာ တုဲကၠုၚ်တေံ ညးဍုၚ်ကွာန်ကောန်အရာပ် ၂၉ တၠ နူကဵုပွိုၚ်ဍုၚ်ကအ်သံၚ်၊ ပွိုၚ်ဍုၚ်ဗိက်၊ တၞၚ်သဳ၊ ပဠဝ်၊ ဍာ်ဗု၊ လံၚ်လုၚ်၊ တယိတ်ချံၚ်တံ ဒးဒုၚ်ဂစိုတ်လဝ်ရောၚ် ဂကောံသုတေသန အပ္ဍဲဒေသတံ လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
လိက်စၞောန်ဗီု−အခိၚ်ညးဒေသ နူပွိုၚ်ဍုၚ်တၞၚ်သဳတံ ဒးဂြိပ်ဒဴပါဲဒလေတ်ဒၟံၚ် ဒၟါနူပရေၚ်ပန်ပှော်လွဟ်ဇၞော် နူကဵုဒပ်ပၞာန်
ဗီု−CJ
sanlontai