ကအ်ကြိက်၊ အံက်တဝ်ဗာ(၁၄)
တွဵုရးကရေၚ်၊ ဍုၚ်ကအ်ကြိက်၊ ပ္ဍဲဂတမုက်ဘာတန်သၠုၚ် မၞုံအရာပ် စၟတ် (၂) ဂှ် ဟိုတ်နူဗုမ်ဒရုမ်ဒတုံစှ်ေပါ်ခတိုဟ်လဝ်တုဲ ကောန်ကွးဘာညးဗြဴ (၁) တၠ ဒးချိုတ်လဝ်တုဲ ဇီုကပိုက်ဒးလဝ်ဘဲဝပ် (၃) တၠရဂှ် ဂွံတီကေတ် နူညးဒေသတအ်ရ။
ဂိတုအံက်တဝ်ဗာ စၟတ်တ္ၚဲ (၁၃) အခိၚ်ဒေါဝ်တ္ၚဲ (၁၂) နာဍဳဂှ် သီုပေါဲဗတိုက်ဟၟဲမွဲသာ် ဗုမ်ဒရုမ်မွဲမ ဒတုံစှ်ေပါ်ခတိုဟ်လဝ် လ္ပာ်ဗၟံက်ဂတမုက်ဘာဗ္တောန်လိက်ဂှ်ရ။
အတိုၚ်ညးဒေသတအ်ဟီုလဝ်မ္ဂး အခိၚ်ဗုမ်ဒတုံစှ်ေပါ်ခတိုဟ်လဝ်ဂှ် ဟိုတ်နူဒှ်အခိၚ်ဗလးဘာတုဲ ကောန်ကွးဘာညးဗြဴဴတအ် ဇီုကပိုက်ဒးချိုတ်လဝ်ရဂှ် ဟီုလဝ်ရ။
ဟိုတ်နူဒရုမ်ဒတုံစှ်ေပါ်ခတိုဟ်လဝ်တုဲ ကောန်ကွးဘာညးဗြဴ ပန်တန် အယုက် (၁၁) သၞာံ မမိုဝ်မိုဝ်အေ ဒးချိုတ်လဝ်တုဲ ပါလုပ်သီုကွးဘာ ညးဗြဴတန်ပထမမွဲတၠ ကောန်ကွးဘာညးဗြဴ ဇီုကပိုက်ဒးလဝ်ဘဲဝပ် (၃) တၠရ။
ကောန်ကွးဘာညးဗြဴမမိုဝ်မိုဝ်အေ ဒးချိုတ်လဝ်ဂှ် ပလံၚ်ဗစိုပ်လဝ် ပ္ဍဲရုၚ်ဂဥုဲကအ်ကြိက်တုဲ ကောန်ကွးဘာညးဗြဴတန်ပထမ ဒးလဝ်ဘဲဝပ်သ္ကာတ်မြဟ် မဝေဝေနှေန်ကီု ကောန်ကွးဘာညးဗြဴ (၁၀) တန် မသုယေန်အေတအ်ဂှ် ပလံဗစိုပ်လဝ်ရုၚ်ဂဥုဲညးဍုၚ်ကွာန်ဘာအၚ် လွဳလွတ်ကဵုလဝ်ရဂှ် ဂွံတီကေတ်ရ။
ပ္ဍဲကဵုပွိုၚ်ဍုၚ်ကအ်ကြိက် ဗုမ်ဒရုမ်ပါ်ခတိုဟ်ဒၟံၚ် မွဲခနမွဲခနဂှ်မ္ဂး ပါဲနူဒပ်ကံၚ်ဇြဳပၞာန်တုဲ ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တအ် ကၠောန်ရေၚ်တၠုၚ်ဒၟံၚ် ပရေၚ်ချဳဒရာၚ်ပၞာန်ဒရုမ် နွံဒၟံၚ်ရ။
ပ္ဍဲကဵုဂိတုမေ စၟတ်တ္ၚဲ (၂၈) တုဲကၠုၚ်တေံဂှ်လေဝ် ဟိုတ်နူလွဟ်ဇၞော်ဒတုံစှ်ေပါ်ခတိုဟ်လဝ် ပ္ဍဲဍုၚ်ကအ်ကြိက် အရာပ်စၟတ် (၇) တုဲ ညးဒေသပါဲဘဲပၞာန်ကလေၚ်စဴကၠုၚ်ကေတ်စၞစဇွောံမပ္ဍဲသ္ၚိ သမ္ဘာကဵုတၠသ္ၚိညး (၂) ဒးချိုတ်လဝ်ရဂှ် ဂွံတီကေတ်နူညးဒေသတအ်ရ။
ပရိုၚ် – သြၚ်လောန်တိုၚ်(မ်)
ဗီု – ချာန်နေဝ်တြးဝါဒ
sanlontai