ဒၟါနူကျအာ ဂကောံဂျဝ်ဂျဳယာတုဲ ဂကောံသေံ ဒုၚ်ဂုဏ်ဇံသဝ် ကုပရိသာတ်ဂမၠိုၚ်

ၜၚ်ကံက်၊ အံက်တဝ်ဗာ (၁၅)

ဂကောံမခ္ဍံကျာရုဲစှ်ဍုၚ်သေံဂှ် ဒၟါနူကျအာ ဂကောံဂျဝ်ဂျဳယာတုဲ ဂအုပ်ဂကောံမခ္ဍံကျာသေံ ပ္ဍဲဂိတုအံက်တဝ်ဗာ (၁၃) တေံ ဒုၚ်ဂုဏ်ဇံသဝ် ကုပရိသာတ်ဂမၠိုၚ်တုဲ ဗွဲကြဴ ပွမဒးကျဗြံဇၞော်ဇၞော်သာ်ဏံ ဟွံသ္ကဵုဒှ်ရပုဟ်ဂှ် ကဵုလဝ်ကတိရ။

ဂကောံမခ္ဍံကျာရုဲစှ်ဍုၚ်သေံဂှ်ဝွံ ပ္ဍဲဂိတုအံက်တဝ်ဗာ (၁၂) တုဲကၠုၚ်တေံ ပ္ဍဲကဵုပေါဲစမ်ဇိုၚ် ဂအုပ်ဂကောံမခ္ဍံကျာဂၠးတိ (FIFA) မဝေၚ်လဝ် ကုဂကောံဂျဝ်ဂျဳယာဂှ် ဒးကျအာလဝ် ၈ ဂဝ်၊ ဂဝ်ဟွံမွဲရ။

သွက်ဂကောံမခၞံကျာသေံ ပ္ဍဲကဵုလ္ပာ်မခၞံကျာဂှ်မ္ဂး မၞိဟ်တီဂၠိုၚ် နဒဒှ် “War Elephants” ဂှ် မ္ဒးကျအာအလန်ဏံဂှ်ဝွံ ဒှ်အလန်ဒုတိယတုဲ အလန်ပထမဂှ် ပ္ဍဲကဵုပေါဲပြိုၚ်မခၞံကျာအိုဝ်လာံပေတ် မကၠောန်ဗဒှ်လဝ် ပ္ဍဲသၞာံ ၁၉၅၆ တေံ အခိၚ်ဆဵုဂဗကဵု ဂကောံအေန်ဂလာန်ဂှ် ကျအာလဝ် ဒ္စိတ်ဂဝ် ဂဝ်ဟွံမွဲရ။

ကြဴနူလၟေၚ်ပေါဲပြိုၚ်ဏံ ကျအာမွဲဝါပၠန်တုဲဂှ် ပရိသာတ်ဂမၠိုၚ် ပါ်ပါဲဒၟံၚ် လ္တူဇာဇၞိက်ပရေၚ်မၞိဟ် ဒဒှ်ရဂကောံမခ္ဍံကျာသေံ ဟွံတောတက်ကၠုၚ်ဂှ်ကီု၊ ဒဒှ်ရပရေၚ်ကောပ်ကာဲ ဗၠေတ်တ်တံကီု၊ ဒဒှ်ရကၟာတ်လဝ် သၟာဝေၚ်ဇြဟတ်ဒယှ်ဒယှ်တံ နူကဵုအခေါၚ်ဝေၚ်တံ မဒှ်ရ။

ဥက္ကဌ ဂအုပ်ဂကောံမခ္ဍံကျာသေံဂှ် ပရေၚ်ပါ်ပါဲစပ်ကဵုပရေၚ်ကောပ်ကာဲဗၠေတ်တ် ဂကောံမခ္ဍံကျာဍုၚ်သေံတံဂှ် ဒဒှ်ရဒုၚ်တဲဂှ်တုဲ ဒၟါနူဂကောံမခ္ဍံကျာလ္ၚဵုတံ ဟွံကဵုသၟာဝေၚ်ဇြဟတ်ခိုဟ်အိုတ် ပ္ဍဲကဵုဂကောံညးတံ ပါလုပ် ပ္ဍဲဂကောံကဆံၚ်ဍုၚ်တံ ဒှ်တမ် သာ်ဝွံ ဟီုဂးလဝ်ရ။

“အပ္ဍဲကာလကောပ်ကာဲအုပ်ဓုပ်ကၠုၚ် ဂကောံဏံ ပွိုၚ် ၁၆ သၞာံဂှ် တ္ၚဲဏံဂှ်တှ်ေ ဒှ်တ္ၚဲအောန်စိုတ်အိုတ်ရ။ ညံၚ်ရဴပရိသာတ် အလုံဍုၚ်တံကီု ဂကောံပိုယ် မ္ဒးကျအာလဝ်ဂှ် အဲလေဝ် ဒးဗဵုလဝ် သီုကဵုဗွဲမဂိသ္ကေဝ်ရ” သာ်ဝွံ ဟီုဂးလဝ်ရ။

တၚ်ပါ်ပါဲနူကဵုညးဂမၠိုၚ်တံဂှ် ကေတ်အာ နဒဒှ်ခန်လ္ၚတ်တုဲ ဂကောံသေံဝွံ ဗွဲကြဴ ညံၚ်ဂွိုအ်ထပ်ဒှ်သာ်ဏံဂှ် ရေၚ်တၠုၚ်အာဏောၚ် ဟီုဂးလဝ်ရ။

သ္အာၚ်နူဂှ်ပၠန် ဒးပြိုၚ်ပ္ကာန် ကုဂကောံမခ္ဍံကျာဥရဝ်ပတံဂှ်ဝွံ သွက်ဂွံသၠုၚ်ပ္တိုန် ဂကောံသေံ ပ္ဍဲကဵုသွာၚ်ဇဳဂှ် ဒှ်တၚ်ဆဵုဂဗခိုဟ်ဟ်မွဲတုဲ ဂကောံသ္ပစၞးကဆံၚ်ဍုၚ် သွက်ဂွံပလေဝ် ညံၚ်ဇြဟတ်ဂွံခိုဟ်အာဂှ် နကဵုညး ရေၚ်တၠုၚ်အာဏောၚ် ဟီုဂးလဝ်ရ။

ညးထ္ၜးနဲကဲဂကောံရုဲစှ် မာနဝ်ပိုဝ်ကေန်ဂှ် နကဵုဂကောံဏံ သွက်ဂွံဂွံ သွဟ်ခိုဟ်ဟ်ဂှ် စၟဳစလဝ်ကီုလေဝ် ဒးဆေၚ်လဝ်မုက် ကုတၚ်ကော်ဆဴ တၟာဂလိုၚ်ရောၚ် ဟီုဂးလဝ် ပ္ဍဲကဵုအေန်တာဗျူမွဲရ။

ပ္ဍဲကဵုဂလာန် ညးထ္ၜးနဲကဲမခ္ဍံကျာ ဍုၚ်သေံဂှ် ၜိုန်ရသွဟ်သာ်ဏံတိတ်ကၠုၚ်ကီုလေဝ် နကဵုညး ဟွံပါ်ပါဲလဝ် သၟာဝေၚ်ဇြဟတ်တံဂှ်တုဲ ဒဒှ်ရသ္ပစၟတ်သမ္တီ ကုပွမကၠေံစိုတ်ညးတံရောၚ်ဂှ် ပါလုပ်ရ။

Ref: The Nation Thailand