အခိၚ်လဵုလေဝ် လိက်ကသုက် NCA လီုလာ်အာဟွံသေၚ်ပုဟ် က္ဍိုပ်သ္ကိုပ်ပၞာန်ဟီု

နေပျဳဒဝ်၊ အံက်တဝ်ဗာ(၁၇)

လိက်ကသုက် NCA ဂှ် ဒှ်လိက်ကသုက်လုပ်ဝၚ် နူကဵုကၠတ်ထဝ်ကၟိန်ဍုၚ် သ္ပကဵုလဝ်ဒ္တန်တုဲ အခိၚ်လဵုလေဝ် လီုလာ်အာဟၟဲတုဲ ဟိုတ်နူဒှ် လိက်ကသုက် တန်ကြန်ဒၟံၚ်လၟိုန်ဂှ်ရ နကဵုဒပ်ပၞာန် လ္တူလိက်ကသုက် NCA ဂှ်ဟေၚ် သ္ပဂရုရေၚ်တၠုၚ်အာရောၚ်ဂှ် က္ဍိုပ်သ္ကိုပ်ပၞာန် ဟီုလဝ်ရ။

ပ္ဍဲကဵုအခန်ကၞာထ္ပက်လဝ်စၟတ်တဲ လိက်ကသုက်ဒေါံပန်ပှော်အလုံကၟိန်ဍုၚ် (NCA) ပေၚ် ၈ သၞာံ နူကဵုကံၚ်ဇြဳပၞာန် က္ဍိုက်က္ဍိုပ်ကၠောန်ဗဒှ်လဝ်ဂှ် က္ဍိုပ်သ္ကိုပ်ပၞာန် ဂအုပ်သ္ကိုပ်ဗိုလ်ဇၞော်မေန်အံၚ်လှာ ဟီုမြော်လဝ် ပ္ဍဲဂလာန်လၟိၚ်ရ။

က္ဍိုပ်သ္ကိုပ်ပၞာန်ဂှ် သွက်ကၟိန်ဍုၚ်ဂွံညိၚ်ဝတ်တန်ကြန် ဟိုတ်နူသ္ပဂရု ရေၚ်တၠုၚ်ကဵုအာ NCA ဂှ်ရ သွက်ဂွံဒက်ပ္တန် ဓဝ်ၜိုဟ်လလံလၟိုန်ထာဝရမာန်ဂှ် ဂကောံထ္ပက်လဝ်စၟတ်တဲ NCA တအ်လေဝ် သွက်ဂွံမၚ်မွဲအာ ကတိကဝတ်ပါလုပ် ပ္ဍဲ NCA ကီု သွက်ဂွံဆက်ဓမံက်အာရုပ်ရဴ နကဵုပရေၚ်ကၠးဖ္ဍး သီုကဵုပရေၚ်ကေတ်လျိုၚ်ပရေၚ်ဒုၚ်လျိုၚ်နွံနွံဂှ် ဗ္တိုက်ဖ္အောဝ်လဝ်ရ၊

သ္အာၚ်နူဂှ်ပၠန် အာဲကၟာဲပရေၚ်ဗၠးၜးသွက်ကၟိန်ဍုၚ်ဗၟာမွဲဂှ် ဂွံဒုၚ်ဂိုၚ်ကေတ်လဝ် နူဇရေၚ်ဇုဇဗဴလတမၠာတေံတုဲ သွက်အစေန်အဆက် ပ္ဍဲလက်ထက်ဇကု ညံၚ်ဂွံအပ်ပြာပ်ကဵုဏာအာဲကၟာဲဓဝ်ၜိုဟ်လလံလၟိုန်ထာဝရ တာလျိုၚ်နွံဒၟံၚ်ရဂှ် ဟီုလဝ်ရ။

မွဲလ္ပာ်ပၠန်ဂှ် EAO ဟွံဂွံထ္ပက်လဝ်စၟတ်တဲလ္ၚဵု ပါလုပ်သီုဂကောံ EAO ပိဂကောံ ထ္ပက်လဝ်စၟတ်တဲတုဲ ပၠန်ဂတးဒၟံၚ်ကဵု ကံၚ်ဇြဳပၞာန်တအ်ကီု သီုညးခါတ်အကာဲပရေၚ်ဍုၚ်ကွာန်တအ်ဂှ်မ္ဂး နူကဵုသီကေတ်အဝဵုတေံဂှ် ဖံက်ပ္ကဝ်ဏာလဝ် မူသ္ဇိုၚ် ပါပ္ဍဲ NCA တုဲတုဲဒၟံၚ်ရဂှ် ထံက်ထ္ၜးလဝ်ရ။

က္ဍိုပ်သ္ကိုပ်ပၞာန်ဂှ်မ္ဂး နကဵု EAO ဟွံဂွံထ္ပက်လဝ်စၟတ်တဲ ပ္ဍဲ NCA ဏီတအ်လေဝ် ညံၚ်ဂွံပါလုပ် ပ္ဍဲပရေၚ်ဖောအ်ဗြေဝ်တဴဴတက်ကၟိန်ဍုၚ်၊ ပရေၚ်ဒဳမဝ်ကရေဇြဳ သွက်ပရေၚ်ဘဝပရေၚ်ပိုန်ဒြပ်ညးဍုၚ်ကွာန် ဂွံဇၞော်မောဝ်တဴတက်ကီု သီုပ္ဍဲအရာဒက်ပ္တန်ကၟိန်ဍုၚ်ပံၚ်ကောံ ဒုၚ်သ္ဇိုၚ်ကဵုသၞောတ်ဖေတ်ဒရေဝ် ကတိုၚ်ၚ်ကၟဟ်ဟ်ဂှ် ဂါံကွာ်လုပ်ကၠုၚ် ပ္ဍဲပေါဲဆဵုဂဗသဳကၠဳအိုတ်ညိဂှ်လေဝ် ကော်ဘိက်လဝ်ပၠန်ရ။

ဟိုတ်နူကမၠောန်ပြဝကံၚ်ဇြဳပၞာန် ပ္တဝ်လဝ်ကဵုညးဍုၚ်ကွာန် ကၠောန်ရေၚ်တၠုၚ်ဒၟံၚ် ပရေၚ်ဗတိုက်ပန်ဂှ်တုဲ က္တဵုဗဒှ် ကဵုပရေၚ်လိက်ကသုက် NCA လီုလာ် သာတုဲခိုၚ်ဗိုန်ကၠုၚ်ရဂှ် ဂကောံ EAO ထ္ပက်စၟတ်တဲတုဲ ပၠန်ဂတးဒၟံၚ် ပိဂကောံတအ် လလောၚ်တြးလဝ် အကြာမွဲၜါတ္ၚဲ တုဲကၠုၚ်ဏံရ။

ဟိုတ်ဂှ်ရ တၚ်လလောၚ်တြးလစွံစိုတ် ပါလုပ်သီုတၚ်လုကဴဒပ်ပၞာန်ဟွံတိတ်နူပရေၚ်ဍုၚ်ကွာန်ဏီ မ္ဂးသွက်ဂွံသဳကၠဳဟၟဲဂှ် ဂကောံ EAO ထ္ပက်စၟတ်တဲတုဲ ပၠန်ဂတးဒၟံၚ် KNU CNF ကေုာံ ABSDF တအ် လလောၚ်တြးလဝ် ကၠးကၠးဖ္ဍးဖ္ဍးရ။

ဗော်တဴဴတက်ကောန်ဂကူကရေၚ်ဍာဲ (KNPP) ဟွံဂွံထ္ပက်လဝ်စၟတ်တ္ၚဲ ပ္ဍဲ NCA ဂှ်လေဝ် ကံၚ်ဇြဳပၞာန်သီကေတ်ဏာအဝဵုကၟိန်ဍုၚ်ဂှ် အလဵုဇကုဍေံတအ် ပလီုပလာ်ဏာလဝ် သၞောဝ်ဥပဒေသ္ဇိုၚ်ဒက်ပ္တန် ၂၀၀၈ ပါလုပ်သီု NCA ဂှ်ရ နကဵု KNPP စၟတ်သမ္တီကေတ်လဝ် ဒဒှ်ရ NCA လီုလာ်အာတုဲရဂှ် လလောၚ်တြးလဝ် ပ္ဍဲတ္ၚဲတုဲကၠုၚ်တေံရ။

ပရိုၚ် – သြၚ်လောန်တိုၚ်(မ်)

ဗီု – MOI