မတ်မလီု၊ အံက်တဝ်ဗာ (၁၇)
နကဵုကံၚ်ဇြဳပၞာန် ဟွံဒ္ဂေတ်ဗက်လိက်ကသုက် NCA တုဲ ကၠောန်ဗဒှ်တ္ၚဲ NCA ပေၚ် ၈ သၞာံဂှ် ဂွဟွံလေပ်တုဲ ဒှ်ကမၠောန်ဟၟဲကဵုသိက္ခာရဂှ် သမ္မတယာယဳ NUG ဒူဝါလယှဳလ ဟီုဂးပါ်ပါဲလဝ်ရ။
ပ္ဍဲကဵုဂလာန်လၟိၚ် သမ္မတယာယဳ အလဵုအသဳညဳသၟဟ်ကောန်ဂကူ (NUG) ဟီုမြော်လဝ် ကဵုညးဍုၚ်ကွာန် ပ္ဍဲဂိတုအံက်တဝ်ဗာ တုဲကၠုၚ် စၟတ်တ္ၚဲ (၁၄) ဂှ် ဟီုစုတ်လဝ်ရ။
သမ္မတယာယဳဂှ် ဟိုတ်နူဒပ်ပၞာန်သီအဝဵုတုဲ ဒဒှ်ရ လိက်ကသုက် NCA လီုလာ်အာယျကီု ပရေၚ်ဒဒှ်လိက်ကသုက်လီုလာ်အာဂှ် ဂကောံရပ်လွဟ်ကောန်ဍုၚ်အရၚ် (၃) ဂကောံ KNU, CNF , ABSDF တအ်လေဝ် ကဵုလဝ်သမ္တီ ကုညးဍုၚ်ကွာန်တအ်တုဲရဂှ် ဟီုလဝ်ရ။
ဟိုတ်ဂှ်ရ ကံၚ်ဇြဳပၞာန်ဂှ် ဟွံဒ္ဂေတ်ဗက်လိက်ကသုက် NCA ဟွံသ္ပရှ်ေသှ်ေ မူသ္ဇိုၚ် NCA၊ ဖံက်ပ္ကဝ်လဝ်တုဲမှ ကၠောန်ဒၟံၚ် တ္ၚဲ NCA ပေၚ်သၞာံဂှ် ဒှ်ကမၠောန်မုက်ဂွဟၟဲတုဲ ဒှ်ကမၠောန်ဟၟဲကဵုသိက္ခာရဂှ် ဟီုပါ်ပါဲလဝ်ရ
အလုံမွဲကၟိန်ဍုၚ်လေဝ် နူကဵုဒပ်ကံၚ်ဇြဳပၞာန် ဟိုတ်နူက္လိလောန်ဒၟံၚ်ပရေၚ်ပြိုက်ဂစိုတ်ဂယိုၚ် လ္တူကောန်အရာပ်ညးဍုၚ်ကွာန်ဂှ်ရ ပေါဲပေၚ်သၞာံ NCA ကံၚ်ဇြဳပၞာန် ကၠောန်ဗဒှ်ဂှ် နကဵုဂကောံရပ်လွဟ်ကောန်ဍုၚ်အရၚ်တအ်ကီု သီုကဵုတွဳဗွိုၚ်ကၟိန်ဍုၚ်နာနာတအ် တိုန်စိုပ်ဟွံထေက်ရဂှ် ထံက်ထ္ၜးလဝ်ရ။
ကံၚ်ဇြဳပၞာန်သီအဝဵုဂှ်မ္ဂး ကၠောန်ဗဒှ်လဝ်အခန်ကၞာ လိက်ကသုက်ဒေါံပန်ပှော်အလုံကၟိန်ဍုၚ် NCA ပေၚ် ၈ သၞာံပ္ဍဲကဵုနေပျဳဒဝ် ကၠုၚ်စိုပ် ပ္ဍဲဂိတုအံက်တဝ်ဗာ စၟတ်တ္ၚဲ ၁၅ ဂှ်ရ။
ပေါဲ NCA ပေၚ်သၞာံ ကံၚ်ဇြဳပၞာန်ကၠောန်ဗဒှ်ဒၟံၚ် တ္ၚဲဏံဂှ် ပါလုပ်သီုဂကောံရပ်လွဟ်ကောန်ဍုၚ်အရၚ် ထ္ပက်လဝ်စၟတ်တဲဒေါံပန်ပှ်ော (၇) ဂကောံ သီုကလုတ်တမာန်ကၟိန်ဍုၚ်နာနာ ကၠောန်သ္ပဒၟံၚ်ပရေၚ်လုက်စုက်ဆက်ဆောံကဵု ကံၚ်ဇြဳပၞာန်ပါလုပ်သီုကြုက်လ္ၚဵုတအ်ဂှ် တိုန်စိုပ်လဝ်ရ။
ပရိုၚ် – သြၚ်လောန်တိုၚ်(မ်)
ဗီု – NUG
sanlontai