ရးဒေသတၞၚ်သြဳ ပ္ဍဲကဵုသၞာံဏံ သ္ၚိဒၟံၚ် ဗ္ဒာဲ ၇၀၀ ဒးဒုၚ်စံၚ်ပလီုလဝ်

တၞၚ်သြဳ၊ အံက်တဝ်ဗာ(၁၇)

ပ္ဍဲရးဒေသဇၞော်တၞၚ်သြဳ နူကဵုဂိတုဂျာန္နဝါရဳ စဵုကဵုဂိတုသေပ်တေမ်ဗာသၞာံဏံ ပ္ဍဲပွိုၚ် (၉) ဂိတုဂှ် ဒပ်ကံၚ်ဇြဳပၞာန် စံၚ်ပလီုဏာလဝ် သ္ၚိဌာန်ညးဍုၚ်ကွာန်တအ် (၆၇၀) ပြၚ်ရဂှ် ဂွံတီကေတ် နူဂကောံသုတေသနဖျေံသ္ဇိုၚ်တၞၚ်သြဳ FE5 Tanintharyi လလောၚ်တြးလဝ်ရ။

အတိုၚ်တၚ်လလောၚ်တြး FE5 Tanintharyi မ္ဂး ပ္ဍဲပွိုၚ်ဍုၚ်ပလဝ် သ္ၚိဒၟံၚ် (၃၈၉) ပြၚ်၊ ပွိုၚ်ဍုၚ်လံလုၚ် ဗ္ဒာဲ (၁၈၀)မ ၊ ပွိုၚ်ဍုၚ်ထဝါဲ သ္ၚိဒၟံၚ် (၃၀) မပြၚ်၊ ပွိုၚ်ဍုၚ်တယျေတ်ချောၚ် ဗ္ဒာဲ (၂၀) မ၊ ပွိုၚ်ဍုၚ်ဍာ်ဗု (၂၅) မ၊ ဍဲပွိုၚ်ဍုၚ်တၞၚ်သြဳ ဗ္ဒာဲ (၃၀) ဒးစံၚ်ပလီုဏာလဝ်ရဂှ် ဟီုလဝ်ရ။

သ္ၚိဌာန်ညးဍုၚ်ကွာန်တအ်ဂှ် ဒးဒုၚ်စံၚ်ပလီုဒၟံၚ်ကဵုဒပ်ကံၚ်ဇြဳပၞာန် ပ္ဍဲပေါဲဗတိုက်ကီု၊ ဒးဒုၚ်စံၚ်ပလီုဒၟံၚ် နကဵုတၚ်စောတ်စောဲ ထံက်ပၚ် ဒၟံၚ်ကဵု PDF တအ်ကီုရ။

ညးတာလျိုၚ်ဒပ်စဵုဒၞာညးဍုၚ်ကွာန် (ပကဖ) တၞၚ်သြဳဂှ်မ္ဂး ပရေၚ်ဒပ်ကံၚ်ဇြဳပၞာန် စံၚ်ပလီုပလာ်ဒၟံၚ် သ္ၚိဌာန်ညးဍုၚ်ကွာန်တအ်ဂှ် ဒှ်ကမၠောန်ပြဝကၠောန်ဒၟံၚ် ညံၚ်ညးဍုၚ်ကွာန်တအ် ဟွံဂံၚ်ထံက်ပၚ် PDF ပၠုပ်ဒၟံၚ်စိုတ်ဖေက်ရဂှ် ဟီုပါ်ပါဲလဝ်ရ။

မွဲလ္ပာ်ပၠန်ဂှ် အခိၚ်ဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန် ပ္ဍဲကဵုကွာန်တအ်ဂှ် ရပ်ကေတ်ဒၟံၚ်ညးဒေသတအ် နဒဒှ်ဒေၚ်ဒုၚ်ဒၞာမၞိဟ် သီုစံၚ်ပလီုဒၟံၚ်သ္ၚိဒၟံၚ်ကီု၊ ဒကဵုဂၟာဲသ္ၚိဒၟံၚ်တအ်တုဲ ကေတ်ဏာ ကပေါတ်နွံကဵုၚုဟ်မးတအ်ဂှ် ကၠောန်ဒၟံၚ် အဆက်က်ရ။

ပ္ဍဲကဵုဂိတုသေပ်တေမ်ဗာ တုဲကၠုၚ်တေံဂှ် ဟိုတ်နူဒပ်ကံၚ်ဇြဳပၞာန် ထ္ပက်ကရောၚ်ပၞာန်တုဲ ညးဒေသကောန်ဍုၚ်ကွာန် ၅၀,၀၀၀ ပြၚ် ထောံသ္ၚိဌာန်တုဲ ဒးဂြိပ်ဒဴပါဲဓလေတ်လဝ်ရဂှ် ဂွံတီကေတ်ရ။

အတိုၚ်တၚ်လလောၚ်တြး ISP – Myanmar လလောၚ်တြးလဝ်မ္ဂး ပ္ဍဲမွဲကာလသီအဝဵုပွိုၚ်ၜါသၞာံပြၚ်ပြၚ်ဏံ အလုံမွဲကၟိန်ဍုၚ် သ္ၚိဒၟံၚ် ၈၆,၀၀၀ ပြၚ် ဒးဒုၚ်စံၚ်ပလီုလဝ်တုဲ ပ္ဍဲကဵုဂှ် ပ္ဍဲရးသေတ်ဂါၚ် ပါလုပ်ဒၟံၚ်ဂၠိုၚ်အိုတ်ရဂှ် လလောၚ်တြးလဝ် ပ္ဍဲဂိတုသေပ်တေမ်ဗာ စၟတ်တ္ၚဲ(၂၉)ရ၊

ပရိုၚ် – သြၚ်လောန်တိုၚ်(မ်)

ဗီု – Social Media