ပ္ဍဲဍာ်ဗု ကလေၚ်ဆဵု ဇွသၟတ်ဗြဴဒပ်ပၞာန်ရပ်ဒက်ဏာလဝ်

ဍာ်ဗု၊ အံက်တဝ်ဗာ(၁၇)

ရးဒေသဇၞော်တၞၚ်သြဳ၊ ပွိုၚ်ဍုၚ်ဍာ်ဗု၊ ဗ္ဒါဲဒဒန်ကွာန်ဝေတ်ချံၚ်ဂှ် ကလေၚ်ဆဵုလဝ် ဇွသၟတ်ဗြဴဒပ်ကံၚ်ဇြဳပၞာန်ရပ်ဒက်ဏာလဝ်မွဲတၠဂှ် နကဵုဘဲဝပ်သေနာတ် သီုကဵုလမျီုဟၟဲရဂှ် ညးဒေသတံဟီုရ။

ကရောၚ်ပၞာန်ကံၚ်ဇြဳပၞာန်ဂှ် တုဲကၠုၚ်ဂိတုသေပ်တေမ်ဗာ စၟတ်တ္ၚဲ (၂၂)ဂှ် ပါလုပ်သီုမစန္ဒာခိုၚ် အာယုက်ပွဳူ(၂၀)သၞာံဂှ် ရပ်ဒက်ဏာလဝ် ညးဒေသ (၈)တၠ နူကွာန်ခမံက်ချံၚ်၊ ပွိုၚ်ဍုၚ်ဍာ်ဗုဂှ်ရ။

ဇွမစန္ဒာခိုၚ် ကံၚ်ဇြဳပၞာန်ရပ်ဒက်ဏာလဝ်ဂှ် ကလေၚ်ဆဵုလဝ် ပ္ဍဲဗ္ဒါဲဒဒန်ဝေတ်ချံၚ် သီုကဵုလမျီုဟွံမွဲ ပ္ဍဲဂိတုအံက်တဝ်ဗာ စၟတ်တ္ၚဲ(၁၄) ပ္ဍဲအခိၚ်သဝ်တ္ၚဲ ၜိုတ်(၅)နာဍဳဂှ်ရ။

အခိၚ်ကလေၚ်ဆဵုဇွမစန္ဒာခိုၚ်ဂှ် နကဵုဘဲဝပ်မကမ်ကၠိုဟ်လုပ် ပ္ဍဲမုက်ဂှ် ချိုတ်မံၚ် ပ္ဍဲကၟာဆီဂှ် ညးကွာ်ဍာန်တံ ဆဵုလဝ်ရ။

အတိုၚ်လဟီုညးဒေသတံဂှ်မ္ဂး ညးဒေသကံၚ်ဇြဳပၞာန်ရပ်ဒက်ဏာ (၈)တၠတံဂှ် ၜိုန်ကလေၚ်ဗၠးကၠုၚ် (၆)တၠကီုလေဝ် မစန္ဒာခိုၚ် ကေုာံ ကိုဝ်တာဂါန်တံဂှ် ဆက်တုဲဒးဒုၚ်ရပ်ဒက်လဝ်ရဂှ် သ္ဂးရ။

ဆ္ဂး ပ္ဍဲလၟေၚ်ဒဒှ်ဏံဂှ် ဒပ်ကံၚ်ဇြဳပၞာန်တံ ဂစိုတ်ထောံမစန္ဒာခိုၚ်ဟာ၊ ဂကောံတံဂစိုတ်ထောံဟာဟီုဂှ် ညးတီချိုတ်တ်ပၠိုတ်တ်ဂှ် ဟွံမွဲရ။

ညးဒေသလ္ၚဵုတံဂှ်တှ်ေ မစန္ဒာခိုၚ်ဂှ် ဒးဒုၚ်ရပ်ဒက်ကဵုဒပ်ပၞာန်တုဲ ပ္ဍဲဂိတုအံက်တဝ်ဗာ သတ္တာဟပထမဂှ် ကလေၚ်ဗၠးကၠုၚ်လဝ်တုဲ ပ္ဍဲဂိတုအံက်တဝ်ဗာ စၟတ်တ္ၚဲ (၁၄)ဂှ် ကြဴနူဂကောံရပ်လွဟ်ကယျိုၚ်အရာပ်တံ ထပ်ရပ်ဒက်ဏာတုဲ ဒးဒုၚ်ပန်ဂစိုတ်လဝ် ကဵုသေနာတ်ရဂှ် ပွဟီုဂးမံၚ် နွံရ။

ပ္ဍဲရးဒေသဇၞော်တၞၚ်သြဳဂှ် တုဲကၠုၚ် ပ္ဍဲဂိတုသေပ်တေမ်ဗာဏံ ကောန်အရာပ် (၂၉)တၠ ဒးဒုၚ်ဂစိုတ်ဂယိုၚ်လဝ်တုဲ တၠတဲဟွံမံက်ပုဟ်ဂှ် ဂွံတီကေတ် အတိုၚ်တၚ်လလောၚ်တြး FE5 Tanintharyi မဒှ်ဂကောံသုတေသနဂှ်ရ။

ပရိုၚ်-သြၚ်လောန်တိုၚ်မ်

ဗီု- Social Media