ဗာကဵု ဆေၚ်ဗဳယာ ပ္ဍဲၜၚ်ကံက်တအ်ဂှ် ကဵုအာအခေါၚ်ပံက် စဵုကဵု ၄ နာဍဳပယျဵုဂယးဏောၚ်

ၜၚ်ကံက်၊ အံက်တဝ်ဗာ(၁၇)

ကမၠောန်လဟိၚ်စိုတ် ပ္ဍဲဍုၚ်ၜၚ်ကံက် ကၟိန်ဍုၚ်သေံတအ်ဂှ် သွက်ဂွံကဵုအခေါၚ်ပံက် စဵုကဵုပယျဵုဂယး (၄) နာဍဳကီု သီုသွက်ဂွံဖ္အောန်ဖျေံ ပရေၚ်ဗရုညာန်ညေဲမာန် ပိုၚ်ခြာအာ ဒၞာဲအပိုၚ်ခြာရောၚ်ဂှ် ဂကောံအုပ်ဓုပ်ဍုၚ်ဇၞော်ၜၚ်ကံက် ဟီုလဝ် ပ္ဍဲဂိတုအံက်တဝ်ဗာ စၟတ်တ္ၚဲ(၁၆)ဏံရ။

ဆေၚ်ဗဳယာလ္ၚဵုကဵု ဗာတအ်ဂှ် ဒဒှ်ရပံက်ဒၟံၚ် စဵုကဵုအခိၚ်ပယျဵုဂယး (၂) နာဍဳဟွံလုပ်ကဵုသၞောဝ်ဂှ်လေဝ် တီဒၟံၚ်ကီု ဒၞာဲလဟိၚ်စိုတ် အခိၚ်ဗ္တံသီုဖအိုတ်ဂှ် ညံၚ်ဂွံကၠောန်ရေၚ်တၠုၚ်အာ အတိုၚ်သၞောဝ်ဥပဒေဂှ် ညးပိုၚ်ပြဳအဝဵုၜၚ်ကံက်တအ် စဳဇန်ဒၟံၚ်ရ။

နကဵုဂကောံအုပ်ဓုပ်ဍုၚ်ဇၞော်ၜၚ်ကံက် (BMA) ဂှ် ပြဒ္ဒညာစပ်ကဵုကမၠောန်လဟိၚ်စိုတ် အခိၚ်ဗ္တံလ္ၚဵုဂှ်တုဲ ဆဵုဂဗသဳကၠဳလဝ်ကဵု ကဝ်မတဳမဟာဗျူဟာကီု ညံၚ်မၞိဟ်အယုက်ဟွံပေၚ်ဏီတအ် ဂွံလုပ်စိုပ်ကၠုၚ်ဟွံမာန်ဂှ်လေဝ် ဖျေံပိုၚ်ခြာအာ တၚ်ဗၞတ်ဗ္ၜတ်အပိုၚ်အခြာတအ်ရောၚ်ဂှ် သၞာဲဒဴပရေၚ်အုပ်ဓုပ်မာဿတာချာတ်ချာ ဟီုလဝ်ရ။

နမကဵုအာအခေါၚ်ပံက်ကမၠောန်လဟိၚ်စိုတ် စဵုကဵုအခိၚ်ပယျဵုဂယး (၄) နာဍဳဂှ် ကမၠောန်အာတရဴသၟးဟေၚ်ဟွံသေၚ် ပါလုပ်သီုသၟာသွံဖျာဗ္တံတအ်ကီု သီုညးဒဳယာဉ်တက္ကသဳတအ် ပရေၚ်ပိုန်ဒြပ်ညးမဆေၚ်စပ်ကဵုကဏ္ဍဏံသီုဖအိုတ်ဂှ်လေဝ် ဒှ်သၠုၚ်ပ္တိုန်ကဵုရဂှ် ညးဟီုလဝ်ရ။

ဝန်ဇၞော်ပရေၚ်အပ္ဍဲဍုၚ်ကၟိန်ဍုၚ်သေံ အနူတေန်ဂှ်လေဝ် နကဵုဌာနဝန်ဇၞော်ဂှ် ဒဒှ်ရသဳကၠဳလဝ်ကဵု ဂကောံဒပ်ဗၠာဲသၟိၚ်ကေုာံ ညးရေၚ်တၠုၚ်ကၠောန်ဒၟံၚ်ကမၠောန်လဟိၚ်စိုတ်တအ်တုဲရဂှ် ဟီုလဝ် ပ္ဍဲကဵုဂိတုဏံရ။

တၚ်အပိုၚ်ခြာပံက်ဗာ၊ ဆေၚ်ဗဳယာစဵုကဵုပယျဵုဂယး (၄) နာဍဳဂှ် ကၠာနူဟွံဂွံကၠောန်ရေၚ်တၠုၚ် သၠဲသၠဲလးလးဏီ ပ္ဍဲကဵုဒၞာဲလ္ၚဵုတအ်ဂှ် နဒဒှ်ဗီုပြၚ်စမ်ၜတ် ရေၚ်တၠုၚ်ကၠောန်အာရောၚ်ဂှ်လေဝ် ဝန်ဇၞော်အနူတေန် ဟီုလဝ်ရ။

Ref – Thai PBS World