ကောန်ဒပ် ABSDF တိုန်စိုပ်လဝ် အခန်ကၞာ NCA (၃) တၠ ဒးဒုၚ်ရုပ်သီလဝ် နူတာလျိုၚ်

နေပျဳဒဝ်၊ အံက်တဝ်ဗာ(၁၈)

ကောန်ဒပ်တိုန်စိုပ်လဝ် အခန်ကၞာလိက်ကသုက်ဒေါံပန်ပှော် NCA ပေၚ် ၈ သၞာံ ကံၚ်ဇြဳပၞာန်က္ဍိုက်က္ဍိုပ်တုဲကၠောန်ဗဒှ်လဝ် ပိတၠတအ်ဂှ် ရုပ်သီဏာလဝ် နူတာလျိုၚ်ရဂှ် ABSDF လလောၚ်တြးလဝ် ပ္ဍဲအခိၚ်ဇိုၚ်သဝ်တ္ၚဲ တ္ၚဲဏံရ။

ကောန်ဒပ်တိုန်စိုပ်လဝ် အခန်ကၞာ NCA ပိတၠတအ်ဂှ် ဒစဵုဒစးကဵု မူလစွံစိုတ် တၚ်ဒတူလာၚ်နူကဵု ABSDF ဖျေံလဝ်ဂှ်တုဲ ဟိုတ်နူတိုန်စိုပ်လဝ် နကဵုပၟိက်ဆန္ဒလစွံစိုတ်ညးတအ်သက်က် ဂွံညာတ်ကေတ်လဝ်ရဂှ် ဟီုလဝ်ရ။

ဟိုတ်ဂှ်ရ တ္ၚဲဏံ ပ္ဍဲဂိတုအံက်တဝ်ဗာ စၟတ်တ္ၚဲ ၁၆ ဂှ် အတိုၚ်တၚ်သ္ဂုတ်သွာတ် ကောံဓရီုကာတၟေၚ်ကဝ်မတဳဗဟဵုဂှ် ရုပ်သီထောံလဝ် တာလျိုၚ်သွာၚ်ပရေၚ်ဍုၚ်ကွာန် ကေုာံသွာၚ်ပၞာန်ညးသ္ကအ် သီုဖအိုတ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

ညံၚ်ဟွံဂွံဆက်ကၠောန်ရေၚ်တၠုၚ်အာ အရာဒစဵုဒစးကဵုတၚ်ဒတူလာၚ် ဒပ်ပၞာန်ပၠန်တရဴဴဒဳမဝ်ကရေတ်တေတ်ကွးဘာ ဆေၚ်ကဵုကၟိန်ဍုၚ်ဗၟာ ABSDF ဂှ် ကဵုလဝ်သတိ ကုညးတအ်ရဂှ် ဟီုလဝ်ရ။

ပ္ဍဲကဵုအခန်ကၞာ ထ္ပက်စၟတ်တဲလိက်ကသုက်ဒေါံပန်ပှော်အလုံကၟိန်ဍုၚ် NCA ပေၚ် ၈ သၞာံကၠောန်ဗဒှ်လဝ် ပ္ဍဲဂိတုအံက်တဝ်ဗာစၟတ်တ္ၚဲ (၁၅) ဂှ် ကောန်ဒပ် ABSDF သ္ဂံၚ်မျိုဝ်ဝေန်၊ သ္ဂံၚ်မေန်ဇြဝ် ကေုာံ သ္ဂံၚ်မောၚ်ဥူတအ်တိုန်စိုပ်လဝ်ရ။

ပ္ဍဲကဵုပရိုၚ်တြးဝါဒကံၚ်ဇြဳပၞာန်တအ်ဂှ်မ္ဂး သုၚ်စောဲလဝ်ဝေါဟာ ဥူမျိုဝ်ဝေန် မဒှ်က္ဍိုပ်သ္ကိုပ် EAO ပါလုပ်ထ္ပက်လဝ်စၟတ်တဲ NCA တုဲ သှ်ေမၞိဟ်ၜါတၠဂှ်မ္ဂး ဓမံက်ထ္ၜးလဝ်ယၟု ဟၟဲရ။

ABSDF ဂှ် ကိုပ်ကၠာနူဟွံစိုပ် တ္ၚဲ NCA ပေၚ်သၞာံ ၜါပိတ္ၚဲဏီဂှ် မွဲကရောံကဵု KNU ၊ CNF မဒှ်ဂကောံပၠန်ဂတး EAO ထ္ပက်လဝ်စၟတ်တဲ ဒေါံပန်ပှော်တအ်ဂှ် စပ်ကဵုပေါဲသဳကၠဳပတောံ ဒုၚ်သဇိုၚ်ကဵု NCA ပါလုပ်သီုအခန်ကၞာ NCA ဂှ် ပံၚ်တောဲလလောၚ်တြးလဝ် တၚ်လစွံစိုတ်ရ။

ဒပ်ပၞာန်ကွးဘာ ABSDF ဂှ် မံက်ဂတဝ်တိတ်ကၠုၚ် နူပၠန်ဂတးညးဍုၚ်ကွာန် သၞာံ ၁၉၈၈ တေံတုဲ ပ္ဍဲလက်ထက်အလဵုအသဳ သမ္မတဥူတုၚ်ဇြုၚ် သၞာံ ၂၀၁၅ ဂှ် ထ္ပက်လဝ်စၟတ်တဲ ပ္ဍဲလိက်ကသုက် NCA မွဲကရောံကဵု EAO တၞဟ်တအ် မွဲစွံရ။

ဆ္ဂးဟိုတ်နူဒပ်ပၞာန် ထပ်သီကေတ်အဝဵု ပ္ဍဲဂိတုဖေဖဝ်ဝါရဳ သၞာံ ၂၀၂၁ မွဲအလန်ပၠန်တုဲ မွဲကရောံကဵု KNU ၊ CNF ထ္ပက်လဝ်စၟတ်တအ်မွဲစွံ ကရဴထောံစးကဵု NCA တုဲ ပါလုပ်ဒၟံၚ် ပ္ဍဲပၠန်ဂတးက္ညၚ်ညးဍုၚ်ကွာန်ရ။

ပရိုၚ် – သြၚ်လောန်တိုၚ်(မ်)

ဗီု – MOI