က္ဍိုပ်သ္ကိုပ် UWSA ကြုက်ပ္တိတ်လဝ်ဝရာန်ရပ်ၜါတၠဂှ် ဒးဒုၚ်ဖျေံနူကဆံၚ်

မတ်မလီု – အံက်တဝ်ဗာ(၁၈)

ပရေၚ်ဆက်စပ်ဒၟံၚ်ကဵုဂိုဏ်လီဠာန်သြန်အောန်လာၚ် နွံဒၟံၚ်ဂးတုဲ က္ဍိုပ်သ္ကိုပ်ဒပ် (UWSA) “ဝ” ဒးဒုၚ်ပ္တိတ်လဝ်ဝရာမ်ရပ် နူလ္ပာ်ဍုၚ်ကြုက်ၜါတၠဂှ် ပလှ်ဖျေံလဝ်နူကဵုကဆံၚ်ဌာနန္တရရဂှ် ဒပ်ပၞာန်ညဳသၟဟ်ဍုၚ် “ဝ” (UWSA) လလောၚ်တြးလဝ် ပရိုၚ်ရ။

ညးတအ်ဂှ် ဖံက်ပ္ကဝ်လဝ် သၞောဝ်ကၟိန်ဍုၚ်ကြုက်တုဲ ပါဲနူကၟိန်ဍုၚ်ဇိုၚ်ဝုတ်ဒိုဟ် ဒေသ “ဝ” တုဲ သီုကၠောန်သ္ပလဝ် ညံၚ်ဂွံဇီုကပိုက်ဒးပရေၚ်ဆက်ဆောံကၟိန်ဍုၚ်နာနာရဂှ် ဓမံက်ထ္ၜးလဝ် ပ္ဍဲတၚ်လလောၚ်တြး UWSA ရ။

ပရေၚ်ဒဒှ်ဏံ ဟိုတ်နူဇီုကပိုက်ဒး ဓဝ်ပတှ်ေကၟိန်ဍုၚ်ဇိုၚ်ဝုတ်ဒိုဟ် အတိုၚ်ပရေၚ်ဍုၚ်ကွာန် သီုကပရေၚ်ဆက်ဆောံဂှ်ရ ပါဲနုက်ပ္တိတ်လဝ် နူကဆံၚ်ဌာနန္တရ အခိၚ်လၟုဟ်ရဂှ် ဟီုလဝ်ရ။

သ္ကိုုပ်ဌာနဇၞော်ပရေၚ်သိုၚ်ခၞံ ပေါက်အိုက်ပါန် ကေုာံ သ္ကိုပ်ခရိုၚ်မိုၚ်လေန် အိုက်ဟအ် တွဵုရး “ဝ” UWSA ဒးဒုၚ်ပတှ်ေကေတ်လဝ် ဆက်စပ်ဒၟံၚ်ကဵု ဂိုဏ်လီဠာန်သြန်အောန်လိုၚ်တအ်ညးၜါတၠဂှ် ယဝ်ရပ်ဂွံမ္ဂး ဖျေံကဵုလာဘ် သြန်ယွောန် နူမွဲကိုတ် စဵုကဵုမသုန်ကိုတ်ရောၚ်ဂှ် နူလ္ပာ်ကၟိန်ဍုၚ်ကြုက် ပ္တိတ်လဝ်ဝရာန်ရပ် ပ္ဍဲဂိတုဏံ စၟတ်တ္ၚဲ (၁၂)ဂှ်ရ။

ဒပ်ပၞာန်ညဳသၟဟ်ဍုၚ် “ဝ” (UWSA) ဂှ် နူကဵုဂိတုသေပ်တေမ်ဗာ တုဲကၠုၚ်တေံဏံ ရပ်ကေတ်လဝ် ကောန်ဍုၚ်ကြုက် ပါလုပ်ဒၟံၚ် ပ္ဍဲဂိုဏ်လီဠာန်သြန်အောန်လာၚ်ဂးတုဲ သၠောဲပြံၚ်စၠောံကဵုလဝ် လ္ပာ်ကၟိန်ဍုၚ်ကြုက်ဏီရ။

စပ်ကဵုအကာဲအရာလၟုဟ်တုဲ ၜိုန်ရဆက်စၠောံလဝ်ကဵု ညးတာလျိုၚ်ရုၚ်ပရေၚ်ဆက်ဆောံ (UWSA) “ဝ”ဖျေံသ္ဇိုၚ်လာယှိုဝ် ဥူညဳရာမ်ကီုလေဝ် ဆက်စၠောံဟွံဂွံလဝ်ရ။

ဆ္ဂး ပ္ဍဲကဵုမဳဒဳယာ အပ္ဍဲဍုၚ်တအ်ဂှ် ဒှ်အတိုၚ်တၚ်လလောၚ်တြးဟေၚ်ရဂှ် ဟီုသှ်လဝ်ဂှ် ဂွံညာတ်ကေတ်လဝ်ရ။

ပရိုၚ် – သြၚ်လောန်တိုၚ်(မ်)

ဗီု – Social Media