ဟိုတ်နူပရေၚ်ပါ်ခတိုဟ် ဗ္ဒာဲရုၚ်အကံက်အခေါန်ပွိဖျူတုဲ ကောန်ကဵုယာဲၜါ ဒးလဝ်ဘဲဝပ်

ပွိဖျူ၊ အံက်တဝ်ဗာ (၁၈)

ရးဒေသဇၞော်မဂွေ၊ ဗ္ဒာဲရုၚ်ဌာနအကံက်အခေါန်ပွိုၚ်ဍုၚ်ပွိဖျူဂှ် ဟိုတ်နူလွဟ်ဇၞော်ဒတုံစှ်ေပါ်ခတိုဟ်လဝ်တုဲ ကောန်ကဵုယာဲညးၜါ ဒးလဝ်ဘဲဝပ်ရဂှ် ဂွံတီကေတ် အတိုၚ်ညးဒေသတအ်ဟီုထ္ၜးလဝ်ရ။

တ္ၚဲတုဲကၠုၚ်တေံ ဂိတုအံက်တဝ်ဗာ စၟတ်တ္ၚဲ (၁၅) အခိၚ်နူဂယးၜိုတ် (၈) နာဍဳဂှ် ဗ္ဒာဲရုၚ်ဓာတ်လလဳ ကေုာံရုၚ်အကံက်အခေါန် ပွိုၚ်ဍုၚ်ပွိဖျူဂှ် လွဟ်ဇၞော် (၃) မဒတုံစှ်ေပါ်ခတိုဟ်လဝ်တုဲ ကောန်ကဵုယာဲ ပါလုပ်သီုကောန်ၚာ်အယုက် (၃) သၞာံ ဇီုကပိုက်ဒးလဝ်ဘဲဝပ်ရ။

“ပရေၚ်ပါ်ခတိုဟ်လဝ် ဗ္ဒာဲရုၚ်အကံက်အခေါန်ဂှ် ကောန်ကဵုယာဲၜါ ဒးလဝ်။ ကောန်ၚာ်ဂှ် အယုက်ပိသၞာံပြၚ်ညိကွေံ။ ခတိုဟ်လဝ်ဂှ် ဟွံဒးရုၚ်အကံက်အခေါန်တုဲ ဒးလဝ်တိုက်ကွာၚ်ကောၚ်မန် (ကောၚ်းမွန်မုန့်တိုက်) ဂတမုက်ဍေံဂှ်ရ။ ကဝေက်ဒ္ၚောဝ်တိုက်ကွာၚ်ဂှ် ဒးလဝ်ကအ်ကောန်ၚာ် သီုကဵုပ္ဍဲဒၞာဲတၞဟ်ဟ်ရ၊ ဒးဒှ်ဒၟံၚ်ဓဝိၚ်တုဲ သၠောဲပြံၚ်စၠောံလဝ်မဂွေရ”ဂှ် ညးဒေသမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

ရုၚ်အကံက်အခေါန်ပွိုၚ်ဍုၚ်ပွိဖျူဂှ် နွံဒၟံၚ်လ္ပာ်ပလိုတ် ကၠအ်ပ္ကဴပွိုၚ်ဍုၚ်ကဵု တၠုဖျာတုဲ အခိၚ်ပါ်ခတိုဟ်ဂှ် ဟိုတ်နူဒှ်အခိၚ်နူဂယး ၈ နာဍဳဂှ်ရ ဒှ်အခိၚ်ညးဍုၚ်ကွာန်ရာန်ဖျာတအ် အာကၠုၚ်ဒၟံၚ်ရဂှ် ညးဒေသတအ်ဟီုလဝ်ရ။

ပရေၚ်တံဒပ်စၟတ် ၄ ခရိုၚ်မေန်ဗူ ဗတိုက်ပန်လဝ်ဂှ် ပန်ဖျေံလဝ်လွဟ်ဇၞော် ပ္ဍဲရုၚ်ဇြဟတ်ဓာတ်လလဳ၊ ဗဒိုပ်ဗၠာဲသၟိၚ် ပွိုၚ်ဍုၚ်ပွိဖျူတအ် နကဵု ၄၀ မမ တုဲ ရုၚ်အကံက်အခေါန်ဂှ်မ္ဂး ဖံက်ခတိုဟ်လဝ် နကဵုမာၚ်ထိၚ်ခရာဇမ္ၚောဲရ။

အခိၚ်ဓမံက်ရုပ်ရဴချဳဒရာၚ်ပရေၚ်ပၞာန်ဗီုလၟုဟ်ဏံ ဟိုတ်နူဟွံဗၠးၜးတိတ် နူညးဍုၚ်ကွာန်တအ်တုဲ ၜိုတ်ထေက်ကဵုစိုပ်တရဴ ဟွံစိုပ်လဝ်ဂှ် ၜိုန်ရဒုၚ်လဝ်ဂုဏ် ညးဍုၚ်ကွာန်တအ်ကီုလေဝ် ပရေၚ်ကောန်ကဵုယာဲၜါ ဇီုကပိုက်ဒးလဝ်ဂှ်မ္ဂး တံဒပ်စၟတ် ၄ ခရိုၚ်မေန်ဗူ ကဵုလဝ်သမ္တီ ဟီုဂးလဝ်မမိက်ကဵုမွဲမွဲ ဟၟဲရ။

နကဵုညးဍုၚ်ကွာန်တအ်ဂှ် ဂတနူဏံလေဝ် ညံၚ်ဟွံဂွံလုပ်နှဴဴရဴကဵု အထံက်တိုၚ်ကံၚ်ဇြဳပၞာန်ကီု၊ ပရေၚ်ပါ်ခတိုဟ် ပရေၚ်ပန်ပှ်ောညးသ္ကအ်ဒှ်ကၠုၚ်မ္ဂး သွက်ဂွံမံၚ်ကဵုသ္ၚိတ်တ်ဇြဇြ ကေုာံ ညံၚ်ဟွံဂွံသ္ပပရေၚ်တိတ်မ္ၚးတုဲစိစောတ်ဂၠိုက်ဂၠာဲဂှ် တံဒပ်မေန်ဗူ စၟတ် ၄ ကဵုလဝ်သတိရ။

သ္အာၚ်နူဂှ်ပၠန် ဟိုတ်နူသၠုၚ်ပ္တိုန်အာ အသိၚ်ပရေၚ်ပၞာန်ဂှ်ရ နူကဵုဒပ်တဵုလွဳဒုန်၊ ရုၚ်ဇြဟတ်ဓာတ်လလဳ၊ ရုၚ်အုပ်ဓုပ်၊ ရုၚ်အကံက်အခေါန်၊ ရုၚ်လဝကတအ်ဂှ် ၜိုတ်သ္ပမာန် ညံၚ်ဂွံဝေၚ်ပါဲကဵု သ္ၚောဲ​​သ္ၚောဲခြာခြာကီု ဂတမုက်သ္ၚိဇကု ပၟိက်ဟွံဇၞော်မ္ဂး ညံၚ်ဟွံဂွံဗ္ဂပ်စုတ်လဝ် CCTV တအ်ဂှ် အာတ်မိက်ဒုၚ်လဝ်ဂုဏ် ဗွဲမေတ္တာရ။

ပရိုၚ် – သြၚ်လောန်တိုၚ်(မ်)

ဗီု – Social Media